Марк 5

(Мт 8:28-34; Лк 8:26-37)

1Иисүүс шабинартайгаа Галилей далай гаталаад, Гераса хотын шадар ерэбэ. 2Тэрэнэй онгосоһоо буухатайнь сасуу досоогоо ада шүдхэртэй нэгэ хүн агы нүхэн хуурсагуудһаа шамдуухан гаража ерэбэ. 3Тэрэ хүнэй агы нүхэн хуурсагуудта байрладаг хадань, хэншье тэрэниие хүлин барижа шададаггүй бэлэй. 4Тэрэнэй гар хүл оло дахин гэнжээр хүлибэшье, тэрэ гэнжэнүүдые таһа татадаг, түмэр шүдэрнүүдые эбдэдэг байгаа. Хэншье тэрэниие диилэжэ мэдэлдээ абажа шададаггүй бэлэй. 5Тэрэ хүн үдэр һүнигүй хада уулаар гү, али агы нүхэн хуурсагуудаар тэнэжэ, хашхаржа, бэеэрээ шулуу нэшэжэ байдаг һэн.

6Тэрэ хүн Иисүүсые холоһоо хараһаар хажуудань гүйжэ ерээд, хүлдэнь унажа:

7– Иисүүс, Дээдэ Бурханай Хүбүүн, би Танда ямар хамаатай хүнбиб? Намайе бү зобоогыт даа гэжэ Бурханай нэрээр гуйнаб! – гэжэ байгаад бархирба. 8Тиигэжэ бархирһанайнь ушар гэбэл, Иисүүс тэрэ хүндэ ороһон ада шүдхэрнүүдтэ:

– Энэ хүнһөө зайлагты! – гэжэ захирһан байгаа. 9Тиигээд Иисүүс: – Нэрэшни хэн бэ? – гэжэ һураба.

– Үй түмэн гэжэ нэрэтэйб, юундэб гэхэдэ, бидэ угаа олонбди, – гэжэ үнөөхи хүниинь харюусаба.

10– Энэ орон нютагһаа ада шүдхэрнүүдые бү үлдыт даа, – гэжэ тэрэ дахин дахин Иисүүсые гуйба. 11Тэрэ үедэ хадын хаяагаар һүрэг гахай бэлшэжэ байгаа.

12– Маанадые энэ гахайн һүрэгтэ эльгээгыт даа, гахайнууд соо орохыемнай зүбшөөгыт даа, – гэжэ ада шүдхэрнүүд Иисүүсые гуйба. 13Иисүүсэй зүбшөөхэдэ, ада шүдхэрнүүд үнөөхи хүнһөө гараад, гахайнууд руу оробо. Тиин хоёр мянган тооной шахуу гахайн һүрэг эгсэ эрьеһээ далай руу һүрэжэ шэнгэшоо бэлэй.

14Гахай манаашад хото хүдөөгөөр ябаад, энэ ушар тухай зондо дуулгаба. Тиигээд хүн зон юунэй болоһые харахаяа тэрэ газарта ерэбэ. 15Тэдэнэй Иисүүстэ ерэхэдэнь, үй түмэн ада шүдхэрнүүдтэ барюулаатай байһан хүн хубсалаад, элүүр ухаантай һууба, тиимэһээ хүн зон ехээр айжа һүрдэбэ. 16Ада шүдхэрнүүдтэ барюулаатай байһан хүнтэй, гахайн һүрэгтэй юунэй болоһые хараһан зон суглараашадта хөөрэжэ үгэбэ. 17Тиихэдэнь зон Иисүүсые нютагһаань гаража ошохыень гуйба.

18Иисүүсэй онгосодоо һуужа байхадань, урдань досоогоо ада шүдхэрнүүдтэй байһан хүн суг ябалсахаар зүбшөөл гуйба. 19Теэд Иисүүс зүбшөөбэгүй, харин:

– Гэртээ харижа, шамда Эзэнэй хэды ехэ юумэ бүтээһэн тухай, үршөөл хайратай байһан тухай гэртэхиндээ хөөрэжэ үгэ, – гээ һэн.

20Тиимэһээ тэрэ хүн Арбан хотын оршон тойроноор ябажа, тэрээндэ Иисүүсэй хэды ехэ юумэ бүтээһэн тухай хүн бүхэндэ хөөрэбэ. Энэ ушар тухай дуулаһан лэ хүн ехээр гайхажа ханаба.

Үхэһэн басаган ба үбшэн эхэнэр

21Иисүүс онгосоороо дахин Галилейн далай гаталжа, нүгөө эрьедэнь гараба. Тэндэнь Тэрэниие тойроод олон зон суглараа бэлэй. 22Мүргэлэй гэрэй дарганарай нэгэн болохо Яһиир гэжэ нэрэтэй хүн тиишэ ерээ. Иисүүсые хараад, тэрэ хүлдэнь унажа, 23ехээр гуйжа оробо:

– Үхимни үхэхэеэ хэбтэнэ. Ошожо, адислыт даа, тиигээ һаатнай эдэгэхэ, амиды ябахал. 24Иисүүс тэрэ хүнтэй гэртэнь ошобо. Хойноһоонь үнөөхил олон зон дахасалдан, эндэ тэндэһээнь түрисэлдэн ябаба.

25Тэрэ зоной дунда арбан хоёр жэлэй турша соо шуһа гоожоод тогтодоггүй үбшэнтэй нэгэ эхэнэр ябалсаа. 26Тэрэ эхэнэр олон эмшэдээр ябажа, бүхы алта мүнгэеэ бараһаншье һаа, оройдоо һайжараагүй, харин бүри муудажал байгаа. 27Иисүүс тухай дуулахадаа, тэрэ улад зоноор түрисэлдэн Иисүүсэй араһаа дүтэлөөд, мэдүүлэнгүйгөөр хубсаһандань халта хүрэбэ. 28Иисүүсэй хубсаһандань халташье хүрөө һаа эдэгэхэб гэжэ тэрэ этигэжэ байгаа. 29Тиигэхэтэйнь сасуу үнэхөөрөө шуһаниинь гарахаяа болижо, тэрэ эдэгэһэнээ мэдэрбэ. 30Тэрэ үедэ Иисүүс хүсэ шадалайнгаа буураһые ойлгобо.

– Хэн Намайе хүрөөб? – гэжэ Тэрэ асууба. 31Багшынгаа юун тухай һураһыень ойлгоогүй шабинарынь:

– Таниие тойроод байһан зон эндэ тэндэһээтнай түринэл. «Хэн Намайе хүрөөб» гэжэ юундэ асуугаа юмта? – гэбэ.

32Тиихэдэнь Иисүүс хубсаһандань хүрэһэн хүниие харахаяа тойрон шэртэбэ. 33Үнөөхи эхэнэр өөртэйнь юунэй ушарһые тухайлаад, айһан һүрдэһэн, шэшэрһэн юумэ Иисүүстэ дүтэлэн, урдань һүгэдэн унажа, сэхыень хэлэбэ.

34– Басаган, этигэлшни шамайе абараа. Ши амгалан тайбан, элүүр энхэ, үбшэ хабшангүй ябыш даа, – гэжэ Иисүүс эхэнэртэ хэлэбэ.

35Тиигэжэ байтарнь мүргэлэй гэрэй даргада хэдэн хүн ерэжэ:

– Басагантнай наһа бараа, та багшые бү тухашаруулыт, – гэжэ хэлэбэ. 36Зүгөөр Иисүүс хэлээшыень тоонгүй:

– Бү ай. Этигээд лэ бай, – гэжэ Яһиирта хэлэбэ.

37Тиигээд Пётр, Яков, тэрэнэй Иоанн дүү гурбанһаа ондоо хэндэшье хойноһоонь ябахые Иисүүс зүбшөөбэгүй. 38Тэдэ мүргэлэй гэрэй даргында ерээд, зоной хөөрсэгэнэхые, бахардан үймэхые, шангаар уйлалдахые, бархиралдахые хараба. 39Иисүүс гэртэ ороод:

– Юундэ иитэрээ бархиралдана гээшэбта? Басаган үхөөгүй, миин лэ унтажа байна, – гэбэ. 40Тиигэхэдэнь тойроод байһан улад зон Иисүүсые наада барин энеэлдэбэ.

Иисүүс бүгэдэ зониие гаргаад, үнөөхи басаганай аба эжытэй, гурбан шабинартайгаа басаганай хэбтэһэн таһалгада оробо. 41Тиигээд басаганай гарһаань баряад:

– Талита кум! – гэбэ (энэнь: «Басаган, бодо!» – гэһэн удхатай). 42Басаган тэрэ дороо бодоод, таһалгаараа ябаба. Тэрэ арбан хоёр наһатай байгаа. Энэ ушарай гэршэ болоһон зон ехэ гайхажа ханаба. 43Иисүүс энээн тухай нэгэшье хүндэ бү дуулгагты гэжэ захираа һэн. Тиигээд:

– Басаганда эдихэ юумэ үгэгты, – гэбэ.

Currently Selected:

Марк 5: BurBBL2024

Highlight

Copy