Марк 3

(Мт 12:9-14; Лк 6:6-11)

1Иисүүсэй дахинаа мүргэлэй гэртэ ошоходонь, тэндэ хатаһан гартай хүн байба. 2Баһа буруу юумэ хэһэнэйнь түлөө Иисүүсые зэмэлхэ һанаатайшуулшье байжа, үбшэн хүниие субботодо аргална аа гү гэжэ Тэрэниие ажаглан хаража байбад.

3– Бодоод, хүн зоной урда гара! – гээд Иисүүс хатаһан гартай хүндэ хэлэбэ. 4Тиигээд хүн зонһоо: – Субботодо бидэ һайн юумэ бүтээхэ ёһотой гүбди, али харата юумэ үйлэдэхэ гү? Хүнэй ами наһые абарха гү, али һүнөөхэ гү? – гэжэ һураа бэлэй.

Тиигэхэдэнь хүн зон абяа аниргүй байгаа һэн. 5Иисүүс тэдэниие сухалтайгаар хараад, зүрхэ сэдьхэлэйнь мохооршоһондо уйдан гашуудажа, үбшэн хүндэ хандан:

– Гараа һарбай, – гэбэ. Үбшэн хүнэй гараа һарбайхадань, хатаһан гарынь эдэгэшэһэн байба. 6Фарисейнүүд мүргэлэй гэрһээ гараад, дары Иродэй талынхидаар уулзажа, Иисүүсые яажа алаха тухайгаа зүбшэн хэлсэбэ.

Далайн хажууда олон зон сугларба

7Иисүүсэй шабинартайгаа хамта далайн эрьедэ ошоходонь, Тэрэниие үй түмэн зон дахажа ябаа. Тэдэ зон Галилей, Иудей можонуудһаа, 8Иерусалим хотоһоо, Идумейһээ, Иордан голой саада бэеһээ, Тиир, Сидоон хотонуудай оршон тойронһоо сугларһан байгаа. Тэдэнэр булта Иисүүсэй бүтээһэн хэрэгүүд тухайнь дуулаад, Тэрээндэ ерэбэ. 9Иисүүс эдэ үй түмэн зондо шахуулжа, низа даруулшахагүйн тула онгосо бэлдээд байхыень шабинартаа захиба. 10Тэрэнэй ехэ олон хүнүүдые эдэгээһэн хадань үбшэн хүнүүд Тэрээндэ гараараа хүрөөд абаха һанаатайгаар Тэрэнэй зүг руу түлхилсэжэ байгаа. 11Досоогоо ада шүдхэртэй хүнүүд Иисүүсые харахадаа, урдань һүгэдэн унаад:

– Та Бурханай Хүбүүн мүн, – гэжэ хашхаралдадаг байгаа. 12Бурханай табисуурта байһыемни нэгэшье хүндэ бү мэдүүлэгты гэжэ Иисүүс ада шүдхэрнүүдтэ хатуугаар захирдаг һэн.

Иисүүс арбан хоёр элшэнэрээ шэлэжэ абаба

13Иисүүс хэдэн шабинартайгаа хада өөдэ гараба. 14Тэдэнэйнгээ дундаһаа Иисүүс арбан хоёрыень шэлэжэ абаад, элшэнэрээр томилоо бэлэй. Тэдэнь Иисүүстэй хамта ябалсахаһаа гадна Һайн Мэдээсэл дэлгэрүүлхэ уялгатай, 15ада шүдхэрнүүдые үлдэхэ эрхэ засагтай байгаа. 16Арбан хоёрой нэгэнь Симон байгаа, Иисүүс тэрэниие Пётр гэжэ нэрлээ. 17Баһа Яков ба Иоанн гэдэг Зэбэдэйн хоёр хүбүүд байлсаа. Иисүүс тэдэ хоёрто тэнгэриин дуунай хүбүүд гэһэн удхатай «Боанэргээс» гэһэн нэрэ алдар үгэбэ. 18Элшэнэрэй тоодо Андрей, Филипп, Варфоломей, Матвей, Фома, Алфейн Яков хүбүүн, Фаддей, Симон Кананит#3:18 Эхэ бэшэгтэ «Кананит» гэжэ нэрлээтэй байдаг. Тиигэжэ римэй дарлалтын урдаһаа эсэрэгүүсэн тэмсэжэ байһан еврей бүлгэмэй гэшүүдые нэрлэдэг байгаа., 19һүүлдэнь Иисүүстэ урбаһан Иуда Искариот байгаа.

Иисүүс ба ада шүдхэрнүүдэй ноён Бээлзэбүүл

20Иисүүсэй гэртээ ерэхэдэнь, баһал хүн зон олоороо сугларжа, Тэрэ шабинартаяа эдеэлхэшье забгүй болобо. 21Тэрээн тухай Иисүүсэй түрэлхидынь дуулахадаа, ухааниинь муудаа гэжэ бодоод, Тэрэнээ хүсөөр асархаяа ошобо.

22Иерусалим хотоһоо ерэһэн Хуули заадаг багшанар:

– Энэ хүн Бээлзэбүүлэй, ада шүдхэрнүүдэй ноёной мэдэлдэ байна! Бээлзэбүүлэй аша туһаар ада шүдхэрнүүдыешье үлдэнэ! – гэжэ хэлсэбэ.

23Тиихэдэнь Иисүүс тэдэ багшанарые дуудаад, һургаалта үгэнүүдые хэлэбэ:

– Бодоод үзыт, сатана яажа өөрыгөө үлдэхэ юм? 24Хубааралдаад, хоорондоо дайлалдажа байһан хаан орон удаан байнгүй бутарха. 25Хубааралдаад, хоорондоо арсалдажа байһан гэр бүлэ удаан байнгүй һалаха. 26Хэрбээ шолмосой хаан оронойхин хоорондоо хубааралдаад, хёморолдожо барисалдажа байбал, хаан орониинь удангүй хосорхо юм. 27Бар хүсэтэй хүнэй гэртэ ороод, түрүүн эзэнииень хүлижэ уяагүй һаа, хэншье эд зөөрииень тоножо шадахагүйл. Эзэнииень хүлиһэн хойноол гэр барааень дээрмэдэхэ бшуу. 28Хүнэй үйлэдэһэн нүгэл шэбэлнүүдэй, хэлэһэн харата үгэнүүдэй хэдышье ехэ хара нүгэлтэй байбалнь, Бурхан тэдэниие хүлисэхэ юм, 29харин Арюун Һүлдые муудхаһан хүниие Бурхан хэзээдэшье хүлисэхэгүй, нүгэл шэбэлынь тэрэ хүниие хэтэ заяандаа дахажа ябаха гэжэ таанадта үнэн зүбые хэлэнэб.

30Досоогоо ада шүдхэртэй байна гэжэ Хуули заадаг багшанарай хэлсэдэг хадань, Иисүүс иимэ юумэ хөөрэһэн ушартай юм.

Иисүүсэй эжы болон дүүнэрынь

31Иисүүстэ Тэрэнэй эжы, дүүнэрынь ерэбэ. Тэдэнэр газаа байгаад, гэр руу хүниие эльгээбэ. 32Иисүүсые тойроод һууһан олон зон:

– Харагты даа, эжытнай, дүүнэртнай ерээд, Таниие хүлеэнэ, – гэлдэбэ. 33Тиигэхэдэнь Иисүүс:

– Минии эжы хэн бэ? Минии аха дүүнэр хэд бэ? – гэжэ урдаһаань һураба. 34Тиигээд тойроод һууһан зониие шэртээд: – Эдэ Минии эжы, Минии аха дүүнэр гээшэ. 35Бурханай эрхэ хүсэлые дүүргэжэ байһан хүн бүхэн лэ Минии аха дүүнэр, эгэшэ дүүнэр, эжымни гээшэ, – гэбэ.

Currently Selected:

Марк 3: BurBBL2024

Highlight

Copy