Марк 2
2
(Мт 9:2-8; Лк 5:18-26)
1Хэдэн үдэрэй удаа Иисүүсэй Капернаум бусажа ерэхэдэнь, гэртээ байһан тухайнь һураг дары тараба. 2Удангүй хүн зон олоороо сугларжа, гэртэньшье, газаа үүдэндэшье багтахаар бэшэ болоо һэн. Иисүүсэй сугларһан зондо номножо байхада, 3дүрбэн хүн саа үбшэнтэй хүниие тэлээд ерэбэ. 4Хүн зоной угаа олон байһанһаа боложо, тэрэ үбшэн хүниие Иисүүсэй хажууда асарха арга бэдэрхэ болобо. Тиигээд тэрэ хүнүүд Иисүүсэй байһан газарай тушаа гэрэй хушалта задалжа, нүхэ гаргаад, үбшэн хүниие шэрдэгтэйнь доошонь буулгаба. 5Иисүүс тэдэ хүнүүдэй аргагүй ехэ этигэлтэй байһыень харахадаа, саа үбшэнтэндэ хандан:
– Хүбүүмни, нүгэлнүүдшни хүлисэгдэбэ, – гэбэ.
6Тэндэ һууһан Хуули заадаг зарим багшанар досоогоо:
7– Юугээ Тэрэ хэлэнэб? Бурханиие доромжолнол! Ганса Бурханһаа ондоо хэн хүнэй нүгэл хүлисэдэг юм? – гэжэ бодожо байгаа.
8Тиигэжэ бодожо байхыень Иисүүс гансата мэдээд:
– Юундэ тиигэжэ сэдьхэлдээ бодобот? – гэжэ асууба. 9– Саа үбшэнтэй хүндэ «Нүгэлнүүдшни хүлисэгдэбэ» гэхэдэ бэлэн гү, али «Бодоод, дэбисхэрээ абаад яба» гэжэ хэлэхэдэмни бэлэн гү? 10Хүн түрэлхитэнэй Хүбүүнэй газар дэлхэй дээрэхи нүгэл шэбэлнүүдые хүлисэхэ эрхэтэй байһые Би таанадта баталан харуулхаб.
Тиигээд саа үбшэнтэй хүндэ хандан:
11– Шамда хэлэнэб, бодоод, дэбисхэрээ абаад, гэртээ хари, – гэбэ.
12Бүхы хүнүүдэй хараһаар байтар үнөөхи үбшэн хүн бодоод, дэбисхэрээ абаад, гаража ябаба. Улад зон бултадаа айхабтар ехээр гайхалдан:
– Бидэ иимэрхүү юумэ нэгэтэшье үзөөгүйбди, – гэлдэн, Бурханиие магтаба.
Иисүүс Матвей Левийе шэлэжэ абаба
13Иисүүс дахин Галилей далайн эрьедэ ошобо. Ехэ олон зоной сугларан ерэхэдэ, Иисүүс тэдэниие һургаба. 14Нэгэтэ гансаараа ябатараа, татабари суглуулдаг Алфейн Левий хүбүүнэй ажаллахыень хараад:
– Хойноһоомни яба, – гэбэ. Тиихэдэнь Левий бодоод, хойноһоонь ябаба.
15Хожомынь Иисүүсэй шабинартайгаа хамта Левииндэ хоол барижа байхадань, Тэрэниие олоороо дахажа ябадаг алба татагшад, бусадшье нүгэл хэгшэд олоороо тэндэ сугларба. 16Хуули заадаг зарим багшанар ба фарисейнүүд#2:16 Фарисейнүүд болбол еврей шажанай шухала гурбан бүлгэмэй нэгэн болоно. Фарисейнүүд Моисейн Хуулиин бүхы зүйлнүүдые, мүн шажан тахилай дүримүүдые нарин нягтаар гүйсэдхэхые шаардана. Тэдэ Иисүүс Христоосто эсэргүүсэгшэд һэн. Иисүүсэй нүгэл хэгшэдтэй ба алба татагшадтай хамта эдеэлжэ байхыень харахадаа:
– Юундэ багшатнай иимэ зоноор хамта эдеэлнэб? – гэжэ шабинарһаань һураба.
17Иисүүс тэрэнииень дуулахадаа:
– Элүүр хүндэ эмшэн хэрэггүй, харин үбшэн зондо хэрэгтэй. Би үнэн сэдьхэлтэниие бэшэ, харин нүгэл хэгшэдые нүгэлөө гэмшэхыень дуудахаяа ерээб, – гэжэ хэлэбэ.
Масаг сахиха тухай асуудал
18Иоаннай шабинарай, мүн фарисейнүүдэй масаглажа байха үедэ зарим хүнүүд Иисүүстэ ерээд:
– Иоаннай, мүн фарисейнүүдэй шабинар масаг сахина, юундэ Танай шабинар масагланагүйб? – гэжэ асууба.
19Иисүүс адлихан жэшээ дурадхан, иигэжэ тэдэндэ харюусаба:
– Түрэ хуримда ерэһэн айлшад хүрьгэн хүбүүнтэй байхадаа, масаг сахиха аал? Үгыл даа! Хүрьгэн хүбүүнтэй байха сагтаа тэдэнэр масаглахагүйл. 20Зүгөөр хүрьгэн хүбүүниие тэдэнһээ абаад ябаха үдэрэй ерэхэдэнь, тэдэ айлшад масаглахал.
21– Хэншье хуушан хубсаһанда шэнэ бүдөөр халааһа табидаггүй бшуу, тиимэ халааһан хуушан хубсаһые удара татахал, хахархайень улам ехэ болгохол. 22Хэншье һая нэрэһэн үзэмэй архияа хуушан туламда хэдэггүйл, тиигээ һаа, тэрэ архинь эһээд, хуушан туламаа хахалжа, архиньшье, туламыньшье хэндээшье хэрэггүй болохол. Тиимэһээ һая нэрэһэн үзэмэй архи шэнэ туламда хэхэ хэрэгтэй юм.
Суббото тухай асуудал
23Нэгэ субботодо#2:23 Еврейнүүдэй ажал хэхэ ёһогүй үдэр. Иисүүс шабинартайгаа таряалангаар ябаба. Шабинарынь таряанай залаа таһалан үйрүүлээд, эдибэ. 24Зарим фарисейнүүд Иисүүстэ:
– Үгы, харыт, шабинартнай субботодо хэжэ болохогүй юумэ хэнэл, – гэбэ.
25– Давид хаанай хамта ябалсагшадтайгаа үлэсхэлэн ябахадаа юу хэһэн тухайнь таанар хэзээшье уншаагүй аалта? 26Тэрэ ушар Абиатаарай ахамад санаарта байхада тохёолдоо юм. Давид Бурханай гэртэ ороод, үргэлэй хилээмэ абажа эдеэд, суг ябаһан хүнүүдтээ үгэһэн байна. Харин санаартанһаа ондоо хэншье тэрэ хилээмэ эдихэ эрхэгүй һэн, – гэжэ Иисүүс тэдэндэ харюусаба.
27Түгэсхэлдэнь Иисүүс тэдэ фарисейнүүдтэ иигэжэ хэлэбэ:
– Хүн гээшэмнай субботын тулада бэшэ, харин суббото хүнэй туһада зохёогдоо юм. 28Тиимэһээ Хүн түрэлхитэнэй Хүбүүн субботыншье Эзэн мүн.
Currently Selected:
Марк 2: BurBBL2024
Highlight
Share
Copy
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
