Марк 13

(Мт 24:1-14; Лк 21:5-19)

1Иисүүсэй Һүмэһөө гаража ябахада, нэгэ шабинь:

– Багша аа, харалта даа, ямар үзэсхэлэнтэ гоё шулуунууд, байшангууд гээшэб! – гэбэ.

2– Эдэ томо байшангуудые харана гүш? Энэ һууринда ганса шулууншье үлэхэгүй, хуу баран һандаргагдаха, – гэжэ Иисүүс харюудань хэлэбэ.

3Удаань Иисүүсэй Элеон хада дээрэ, Һүмын тушаа һуухада Тэрээндэ Пётр, Яков, Иоанн ба Андрей дүрбэн ерэжэ:

4– Танай хэлээшэ бүхы юумэн хэзээ болохоб? Тэрэнэй болохын урда ямар дүлгэ тэмдэгүүд харуулагдахаб? – гэжэ асууба.

5– Хэн нэгэнэй мэхэдэ орохоһоо болгоомжолжо байгты. 6Юуб гэхэдэ, олон хүнүүд Минии нэрэ зүүжэ ерэхэ: «Би Бурханай табисууртаб», – гэжэ өөһэд тухайгаа гэршэлхэ, тиигэжэ олонииетнай мэхэдээ оруулха. 7Мүн байлдаанууд тухай, дайн сэрэг тухай һураг дуулабал, бү айгаарайгты. Тиимэрхүү юумэнүүд болохо ёһотой. Зүгөөр энэнь үшөөл эсэс бэшэ байха. 8Нэгэ арад нүгөө арадтаа добтолон орохо, хаан оронууд хоорондоо хёморолдон тэмсэхэ; эндэ тэндэ газар хүдэлхэ, үлэсхэлэн зоболон, үхэл тахал тохёолдохо. Зүгөөр эдэ бүхэн бэрхэшээл зоболонгуудай эхииень лэ табиха. 9Таанад өөһэдөө һэргэг байха ёһотойт. Таанадые зарга шүүбэриин газарта абаашажа тушааха, мүргэлэй гэр соо сохихо. Минии түлөө таанад захирагшадай, хаашуулай урда зогсоод, һүзэг тухайгаа хэлэхэт. 10Тиин юумэнэй эсэс болохын урда Һайн Мэдээсэл хамаг оршолонгоор бүхы арадуудта номногдохо. 11Таанадые барижа тушаахадань, юу хэлэхэ тухай эртэнһээ һанаагаа бү зобооройгты. Сагай ерэхэдэ хэрэгтэй зүб үгэнүүд һанаандатнай орохо. Зүгөөр таанад өөрһөө хэлэхэгүйт, харин Арюун Һүлдын хайрлаһан үгэнүүдые дабтахат. 12Аха дүүнэр, эгэшэ дүүнэр бэе бэеэ тушаажа алуулха, эсэгэнь үхибүүдээ баһал тушаажа алуулха; үхибүүдынь эхэ эсэгынгээ урдаһаа үһөөрхэн бодоод, тэдэнээ алаха. 13Минии түлөө таанадые булта үзэн ядаха; зүгөөр эсэстэнь хүрэтэр тэсэжэ гараһаниинь абарагдаха.

Бурханда жэрхэдэһэтэй хүн

14– Нэгэтэ таанад тиимэ юумэнэй байха ёһогүй газарта хооһоролго һүйдхэлдэ хүргэдэг «жэрхэдэһэтэй юумэнэй» байхые үзэхэт. Эдэ мүрнүүдые уншажа байһан хүн бүхэн ушар удхыень ойлгохые хэшээг лэ. Тиихэдэ Иудейдэ байһан хүнүүд хада гүбээ руу тэрьедээрэйгты. Уншажа байһан хүн бүхэн энээниие зүбөөр ойлгохые оролдохо ёһотой. Тиихэ үедэ Иудейдэ ажаһуудаг һаа, хада гүбээнүүд өөдэ гүйжэ гара. 15Гэрэй орой дээрэ байһан зон гэрһээн юумэ абахаяа доошоо бү буугаарайт. 16Хээрэ талада ябаһан зон хубсаһа хунараа абахаяа гэртээ бү бусаарайт. 17Тэдэ үдэрнүүдтэ хээлитэй, хүхөөр үхибүүдтэй эхэнэрнүүдтэ ехэл гай зоболон тудаха. 18Таанарай зугадаха саг үбэлэй хүйтэндэ бү тудаһай гэжэ Бурхандаа зальбарагты. 19Газар дэлхэй Бурханай зохёон бүтээхэһээ нааша мүнөөнэй үе саг болотор үзэгдөөгүй, дахинаашье үзэгдэхэгүй аймшагтай гай зоболон болохо. 20Хэрбээ Эзэн тэдэ аймшагтай үдэрнүүдэй тоое үсөөрүүлээгүй һаа, хэншье абарагдахагүй һэн. Зүгөөр шэлэжэ абаһан хүнүүдэйнгээ аша туһада Эзэн тэдэ үдэрнүүдэй тоо үсөөрүүлхэ юм. 21Хэрбээ тэрэ сагта: «Бурханай табисуурта Христоос эндэ байна», али «тэндэ байна» гэжэ таанарта хэн нэгэнэй хэлээ һаа, бү этигээрэйгты. 22Өөһэдыгөө Бурханай табисуурта гү, али лүндэншэн гэжэ нэрлэһэн олон мэхэшэд бии болохо. Тэдэ аргатайл һаа, Бурханай шэлэжэ абаһан хүнүүдыешье өөрынгөө мэхэдэ оруулхын тула элдэб янзын гайхамшагта тэмдэгүүдые, эди шэди харуулха. 23Тиимэһээ таанад һэргэг байгты. Болохо бүхы юумые Би таанадта эртэнһээ һэргылжэ хэлэбэб.

Хүн түрэлхитэнэй Хүбүүнэй заларан ерэлгэ

24– Тиигээд зоболонто тэдэ үдэрнүүдэй үнгэрһэн хойно наран балартаха, һарашье гэрэлтэхэеэ болихо, 25одо мүшэдшье тэнгэриһээ унаха, тэнгэриин хүсэнүүдшье тэнсүүриеэ алдаха. 26Тэрэ үедэ үүлэн дундуур Хүн түрэлхитэнэй Хүбүүнэй һүр хүсэтэйгөөр, алдар солотойгоор ерэжэ ябахань хүнүүдтэ үзэгдэхэ. 27Тиигээд Тэрэ Бурханай шэлэжэ абаһан зониие суглуулхын тула газар дэлхэйн заха хизаарһаа огторгойн заха хизаар хүрэтэр Эльгээмэлнүүдээ ябуулха.

Боди модон дээрэ харуулагдаһан жэшээ

28– Боди модонһоо жэшээ абагты: тэрэнэй һалаа мүшэрнүүдэй зөөлэрөөд, набша намаагайнь һалбархада, зун ойртобо гэжэ мэдэдэгта. 29Тон тиигэжэл Минии түрүүн хэлэһэн юумэнүүдэй болохые үзэхэдөө, саг дүхэжэ байна, бүри ойртоо гэжэ мэдэхэт. 30Мүнөө ажамидаржа байһан хүнүүдэй бултанайнь үхэжэ үрдеэгүй байхада Минии таанадта хэлэһэн бүгэдэ юумэн тохёолдохо гэжэ таанадта баталан хэлэнэб. 31Огторгой тэнгэри, газар дэлхэйшье һүнэн һалаха, харин Минии хэлэһэн үгэнүүд мүнхэ оршохо.

Тэрэ Үдэрэй, тэрэ сагай хэзээ ерэхые хэншье мэдэхэгүй

32– Тэрэ Үдэрэй, тэрэ сагай болзор хэншье мэдэхэгүй, тэнгэридэ оршодог Бурханай Эльгээмэлнүүдшье мэдэхэгүй, Хүбүүн Өөрөөшье мэдэхэгүй. Гансал Эсэгэ Бурхан тэрэниие мэдэхэ. 33Тиимэһээ һэргэг байгты, юундэб гэбэл, тэрэ үдэрэй, тэрэ сагай хэзээ ерэхые таанад мэдэнэгүй ха юмта. 34Бүхы юумэеэ зарасанартаа даалгаад, холын аянда гараһан хүнтэй энэ байдал сасуулмаар юм. Тэрэ хүн зараса бүхэндөө даабари үгөөд, үүдэнэй харуулшанда һэргэг байхыень захидаг. 35Тиимэһээ һэргэлэн байгты! Таанад гэрэй эзэнэй хэзээ бусажа ерэхыень мэдэнэгүй ха юмта. Тэрэ үдэшэндөөшье, али һүниин тэн багааршье, али эрэ тахяагай дуугархадашье, али үүр сайлганааршье, ямаршье сагта ерэжэ магадгүй. 36Харин гэнтэ ерэхэдэнь, таанад унтажа һажажа бү байгаарайт. 37«Һэргэг байгты» гэжэ таанадта хэлэһэнээ Би мүн бултанда хэлэнэб.

Currently Selected:

Марк 13: BurBBL2024

Highlight

Copy