Марк 12

(Мт 21:33-46; Лк 20:9-19)

1Тиигээд Иисүүс тэдэндэ иимэ һургаалта үгэнүүдые хөөрэбэ:

– Нэгэ хүн үзэмэй сэсэрлиг таряад, тойруулжа хүреэлбэ, тиигээд сэсэрлиг соогоо үзэмэй шүүһэ шахажа байхаар нүхэ малтаба, харуулай үндэр самхаг бариба, тиигээд тэрэнээ үзэмшэдтэ хүлһэлөөд, аянда мордобо. 2Жэмэсэй эдеэшэхэ багта үзэмэй ургасаһаа өөрынь хуби абажа ерэхээр тэрэ эзэн үзэмшэдтэ зарасаяа эльгээбэ. 3Теэд үзэмшэд зарасыень барижа зада сохёод, һөөргэнь хооһоор бусаагаа һэн. 4Тиигэхэдэнь эзэн ондоо зарасаяа ябуулаа; теэд үзэмшэд тэрэнэй тархи хаха сохёод, баһажа баһажа ябуулба ха. 5Эзэнэй дахин ондоо зарасаяа эльгээхэдэ, тэрэнииень үзэмшэд алажархёо һэн. Сэсэрлигэй эзэн хойно хойноһоонь зарасанараа ябуулжал байгаа; харин үзэмшэд тэдэнэй зарим нэгыень зада сохиһоор, нүгөөдыень алаһаар лэ байгаа. 6Һүүлэй һүүлдэ эзэн хүбүүемни тэдэ хүндэлхэ аабза гэжэ һанан, үзэмшэдтэ ори ганса инаг хайрата хүбүүгээ ябуулба. 7Теэд үзэмшэд: «Энэ хүбүүн эсэгынгээ эд зөөри залгамжалха. Энээниие алая, тиигэбэл бүхы зөөринь манай болохо», – гэжэ өөһэд хоорондоо хэлсэбэ. 8Тиигээд тэрэ хүбүүень барижа алаад, бэеыень үзэмэй сэсэрлигһээ гаргажа хаяба.

9Зай, тиихэлээрээ үзэмэй сэсэрлигэй эзэн тэдэ үзэмшэдые яаха болоноб? – гэжэ Иисүүс һураба.

– Эзэн ерээд, тэдэ үзэмшэдые алаха, тиигээд ондоо үзэмшэдтэ сэсэрлигээ даалгаха. 10-11«Хэрэггүй гэжэ барилгашадай голожо хаяһан шулууниинь гэрэй гол шухала тулга шулууниинь болоо: энээниие Эзэн бүтээгээ, тиин манда ехэл үзэсхэлэнтэ гоёор харагдана», – гэжэ Нангин Бэшэг соо бэшээтэй байхые таанар хэзээшье уншаагүй аалта?

12Иисүүсэй хэлэһэн һургаалта үгэнүүдые дуулаад, түрүү санаартан ба фарисейнүүд өөһэд тухайнь хэлэжэ байна гэжэ ойлгобо. Тиимэһээ Иисүүсые барижа хэһээхэеэ хүсэбэ, теэд улад зонһоо айжа, Тэрэниие хүрэбэгүй.

Алба татабари тухай асуудал

13Һүүлдэнь тэдэ тушаалтан Иисүүсые үгөөрнь торгоожо хардахын тула Тэрээндэ хэдэн фарисейнүүдые, Иродэй талын хэдэн хүнтэй ябуулба. 14Тэдэнь Иисүүстэ ерээд:

– Багша аа! Та үнэн сэхэт, Бурханай бодото замаар ябахые һургадагта, хэнэйшье урда билдагуушалдаггүйт, юуб гэбэл, нюур харадаггүйт гэжэ бидэ мэдэнэбди. Тиимэһээ манда хэлыт, Римэй хаанда алба татабари түлэхэнь зүб гү, али буруу гү? – гэжэ асууба. 15Иисүүс тэдэнэй муу мэхые мэдээд:

– Таанар юундэ Намайе туршабат? Нэгэ динари Намда асаржа харуулагтыл даа, – гэбэ. 16Нүгөөдүүлынь нэгэ динари асаржа үгэбэ.

– Эндэ хэнэй дүрсэ зураатай, хэнэй нэрэ бэшээтэй байнаб? – гэжэ Иисүүс һураба.

– Римэй хаанай, – гэжэ тэдэнь харюусаба.

17– Тиимэһээ хаанай юумэ хаандань, Бурханай юумэ Бурханда үгэгты, – гэжэ Иисүүс тэдэндэ хэлэбэ. Энээниие дуулахадаа, тэдэ зон Иисүүсэй сэсэн ухаанда гайхалдаба.

Үхөөд амидырха тухай асуудал

18Хүнүүд үхөөд амидырдаггүй гэжэ тоолодог саддукейнэрэй зариманиинь Иисүүстэ ерэжэ хэлэбэ:

19– Багша аа, үхибүүгүй ахынгаа наһанһаа нүгшэхэдэ, тэрэнэй дүүнь бэлбэһэн эхэнэртэйнь һууха ёһотой, тиигээд тэдэнһээ гараһан үхибүүн нүгшэһэн ахынь үхибүүн гэжэ тоологдохо зэргэтэй гэжэ Моисей манда бэшэһэн байдаг. 20Зай, долоон аха дүүнэр байгаа гэе. Тэдэнэй ахань һамга абаад, үхибүүтэй болонгүйгөөр наһа бараба. 21Дүүнь ахынгаа һамгантай һуугаад, баһал үхибүүтэй болонгүйгөөр наһа барашаба. Гурбадахиньшье тиимэл табилантай байгаа. 22Тиигэжэл долоон аха дүүнэр бултадаа үнөөхи эхэнэрые һамга болгон абаад лэ, үхибүүтэй болонгүйгөөр хойно хойноһоо наһанһаа нүгшэжэ байгаа. Һүүлэй һүүлдэ тэдэнэй һамганииньшье наһа бараба. 23Теэд Бурханай үхэһэн хүнүүдые амидыруулхада тэрэ эхэнэр хэнэйнь һамган байхаб? Һүүлэй һүүлдэ тэрэ долоон аха дүүнэртэй бултантайнь һууһан байна ха юм.

24Иисүүс тэдээндэ хэлэбэ:

– Таанад Нангин Бэшэгэй юун гэжэ һургадагые, Бурханай һүр хүсэ мэдэдэггүй тула эндүүржэ байнат. 25Бурханай хүнүүдые амидыруулхада, тэдэ зон Бурханай Эльгээмэлнүүдтэл адли байха, тиин һамгашье абахагүй, хадамдашье гарахагүй. 26Зай, саашань үргэлжэлүүлбэл, үхэһэн зоной амидырха тухай таанад Моисейн номдо уншаагүй аалта? Шатажа байһан һөөг бургааһан сооһоо Бурхан Моисейдэ: «Би Абраһаамай Бурхан, Исаагай Бурхан, Яковай Бурханби», – гэжэ хэлээ һэн. 27Бурхан болбол үхэһэн хүнүүдэй бэшэ, харин амиды хүнүүдэй Бурхан юм. Тиимэһээ таанад саддукейнэр огто эндүүржэ байнат.

Эгээн шухала захяа заабари

28Иисүүсэй саддукейнэртэй арсалдажа байхада нэгэ Хуули заадаг багша ерэбэ. Тэрэ Иисүүсэй бодомжотой харюу үгэхые дуулаад, Тэрээнһээ:

– Бүхы захяа заабаринуудай эгээн шухалань алинь бэ? – гэжэ һураба. 29Иисүүс харюусаба:

– Эгээн шухала захяа заабари иимэ: «Израилиин арад, манай Эзэн Бурхан ори ганса Эзэн юм. 30Ши Эзэн Бурхандаа бүхы зүрхэ сэдьхэлээрээ, бүхы амин һүлдөөрөө, бүхы ухаан бодолоороо, байһан хүсэ шадалаараа дуратай бай». 31Хоёрдохи эгээн шухала захяа заабари иимэ: «Дүтынгөө хүндэ өөртөөл адли дуратай бай». Эдэ хоёрһоо үлэмжэ шухала захяа заабари үгы юм.

32Хуули заадаг багша Иисүүстэ хэлэбэ:

– Багша аа, Бурхан ори ганса юм, Тэрээнһээ ондоо Бурхан үгы гэжэ хэлэхэдээ Та тон зүб хэлэнэт. 33Тиин Эзэн Бурхандаа бүхы зүрхэ сэдьхэлээрээ, бүхы амин һүлдөөрөө, бүхы ухаан бодолоороо, байһан хүсэ шадалаараа дуратай бай; дүтынгөө хүндэ өөртөөл адли дуратай бай гэхэдээ Та баһал тон зүб хэлэнэт. Эдэ захяа заабаринууд маанадай үргэхэ аргатай бүхы түгэс шатаалта үргэлнүүдһээ, бүхы тахил бэлэгүүдһээ шухала юм.

34Хуули заадаг багшын иигэжэ бодомжотойгоор харюусахада, Иисүүс тэрээндэ:

– Та Бурханай хаан түрэһөө холо бэшэ байнат, – гэбэ. Тиигэхэһээнь хойшо Иисүүсһээ юумэ һурахаяа хэншье зүрхэлбэгүй.

Бурханай табисуурта хэнэй үри һадаһан бэ?

35Һүмэ соо зониие һургажа байхадаа Иисүүс һураба:

– Бурханай табисуурта болбол Давидай үри һадаһан байха гэжэ Хуули заадаг багшанар юундэ хэлэдэг бэ? 36«Бузар дайсадыеш хүл дорош дэбһүүлэн табитарни баруун гар таладам һуугаарай гэжэ Эзэн минии Эзэндэ айладхаба», – гээд Арюун Һүлдөөр урмашуулагдаһан Давид айладхаба. 37Тиихэлээрээ, хэрбээ Давид өөрөө Бурханай табисууртые Эзэмни гэжэ нэрлээ хадаа, яажа Бурханай табисуурта Давидай үри болохоб?

Тэндэ байһан олон зон Иисүүсые ехэ ханалгатайгаар шагнаба.

Иисүүс зониие Хуули заадаг багшанарһаа һэргылнэ

38Тэдэниие һурган Иисүүс үргэлжэлүүлбэ:

– Хуули заадаг багшанарһаа бэеэ һэргылжэ ябагты. Тэдэнэр ута суба үмдөөд ябаха, олон зоной дунда мэндэшэлүүлхэ дуратай байдаг. 39Мүн мүргэлэй гэртэ урдуур һууха, түрэ найрташье эгээн хүндэтэй һуури эзэлхэ дуратай байдаг. 40Тэдэнэр бэлбэһэн эхэнэрнүүдэй зөөри һэшхэлгүйгөөр үбэртэлдэг, олоной нюдэн дээрэ удаан мүргөөшэ болодог. Тиимэрхүү зон хатуу хэһээлтэдэ хүртэхэ даа.

Бэлбэһэн эхэнэрэй үргэл

41Иисүүс Һүмын үргэлэй сангай хажууда һуугаад, хүн зоной мүнгэ үргэхыень ажаглан хаража байба. Олон баяшуул ехэ мүнгэ үргэбэ. 42Харин нэгэ үгытэй бэлбэһэн эхэнэр ерэжэ, хоёр жэжэ мүнгэ табиба. 43Иисүүс шабинараа дуудаад:

– Энэ үгытэй бэлбэһэн эхэнэр хэнһээш ехэ үргэл һанда үргэбэ. 44Нүгөө зон бултадаа үлүү гараһан юумэеэ үргөө, харин энэ эхэнэр үгытэй ядуу байбашье, хоолойгоо тэжээхэ бии үгы юумэеэ дууһан үргэбэ, – гэжэ хэлээ һэн.

Currently Selected:

Марк 12: BurBBL2024

Highlight

Copy