Марк 11
11
(Мт 21:1-9; Лк 19:28-38; Ин 12:12-15)
1Иисүүс шабинартайгаа Иерусалимда, Элеон хадын хаяада оршодог Бэтпагээ ба Бэтаани тосхонуудта ойртоод, тиишэнь хоёр шабияа эльгээбэ.
2– Урдатнай байһан тосхон ошогты. Тэндэ оромсоороо хүн амитанай оройдоо унаагүй залуу элжэгэнэй уяатай байхые харахат. Тэрэниие уяаһаань тайлаад, наашань хүтэлжэ асарагты. 3Хэрбээ таанарһаа: «Юу хэжэ байнабта?» – гэжэ һураа һаань, «Энэ элжэгэн Эзэндэ хэрэгтэй болоо», – гэжэ харюусаарайт, тиихэдэтнай тэрэ элжэгэ абажа ябахыетнай дары зүбшөөхэ.
4Шабинарынь ошожо, гудамжада нэгэ гэрэй хажууда уяатай залуу элжэгэ олоод, тэрэниие уяаһаань тайлаба. 5Тэндэ байһан зон:
– Таанад юундэ энэ элжэгэ сэргэһээнь тайлабабта? – гэжэ һураба. 6Шабинар Иисүүсэй захиһан ёһоор харюусаба, тиихэдэнь хүнүүд тэдэниие табиба. 7Шабинар тэрэ элжэгэ асаржа, нюрган дээрэнь хубсаһаяа дэбдибэ, тиигээд Иисүүс тэрээниие унаба. 8Олон зон Иисүүсэй ябаха харгы дээгүүрнь хубсаһаяа дэбдибэ, зарим зон мүшэрнүүдые отолоод, харгы дээгүүрнь хаяба. 9Урдань ябаһан, хойноһоонь дахаһан зон булта:
– Бурханда алдар соло!
Эзэнэй нэрээр заларан Ерэгшэ
үршөөл хайратай байһай!
10Манай үбгэ эсэгэ Давид хаанай мандуулһан хаан түрэ
алдар солотой байһай!
Дээдын тэнгэридэ оршоһон Бурханда алдар соло! – гэжэ шанга шангаар хашхаралдаба.
11Иерусалимда ороод, Иисүүс Һүмэ ошожо, досоонь байһан бүхы юумэ анхаралтайгаар хараба. Тиигээд орой болошоһон дээрэһээ арбан хоёр элшэнэрээрээ хамта Тэрэ Бэтаани руу бусажа ошобо.
Иисүүс боди модо хараалдаа хүртөөбэ
12Хойто үдэрынь шабинартайгаа Бэтааниһаа гараад ябахадань, Иисүүсэй гэдэһэниинь үлдэбэ. 13Тэрэ холоһоо набшаһадаар бүрхөөгөөтэй боди модо хараад, тэндэнь эдихээр юумэн олдоно аа гү гэжэ харахаяа ошобо. Теэд модондонь набшаһадһаа бэшэ юушье байбагүй, ушарынь юуб гэбэл, боди модоной үрэ жэмэс үгэхэ саг болоогүй байгаа#11:13 Магадгүй, еврейнүүд боди модоной эртын гүлгэнүүдые эдидэг байгаа.. 14Тиимэһээ Иисүүс тэрэ модондо:
– Хойшодоо энэ модонһоо хүн хэзээдэшье жэмэс бү эдиһэй! – гэжэ хэлэбэ. Тиигэжэ хэлэхыень шабинарынь дуулаһан байгаа.
Иисүүс Һүмэ ошобо
15Иисүүс шабинартайгаа Иерусалим ерэхэдээ Һүмэ оробо. Тэндэһээ наймаашадые, юумэ худалдажа абагшадые намнажа оробо, мүнгэ танга һолигшодой шэрээнүүдые, гулабхаа худалдагшадай һандалинуудые хүмэрюулбэ. 16Тиигээд худалдаа наймаанай ямаршье юумэ Һүмэ соо абажа ябахые хорибо.
17– «Минии гэр бүхы арадуудай мүргэл зальбаралай гэр гэжэ нэрлэгдэхэ», – гэжэ Нангин Бэшэг соо бэшээтэй байдаг. Харин таанад энэ гэр дээрмэшэдэй шэбээлдэг үүр болгожорхёот, – гэжэ Иисүүс хэлэбэ.
18Тиигэжэ хэлэхыень түрүү санаартан, Хуули заадаг багшанар дуулаад, Тэрэниие хюдаха арга бэдэрбэ. Юундэб гэбэл, бүхы зон Тэрэнэй һургаал гайхан анхаржа байгаа, тиимэһээл тэдэнэр Иисүүсһээ айжа байгаа. 19Үдэшэ болоходо Иисүүс шабинартайгаа хотоһоо гаража ошобо.
Боди модонһоо абаһан хэшээл
20Хойто үглөөгүүрынь боди модоной хажуугаар үнгэрхэдөө, шабинарынь тэрэ модоной үндэһэндөө хүрэтэр хаташоод байхые хараба. 21Пётр урдань Иисүүсэй тэрэ модондо юумэ хэлэжэ байһыень һанаад:
– Рабби, харыт! Танай хараалда хүртэһэн модон хаташоод байнал, – гэжэ багшадаа хэлэбэ. 22Иисүүс харюудань хэлэбэ:
– Бурханда һүзэгтэй байгты! 23Хэрбээ Бурханда һүзэгтэй, зүрхэ сэдьхэлдээ ямаршье һэжэг маргалтагүй һаа, уулада хандан: «Эндэһээ хүдэлөөд, далай руу һүрэ» гээ һаатнай, захирһан бүхэнтнай бүтэхэ гэжэ Би баталан хэлэнэб. 24Тиимэһээ Бурханда зальбаржа юумэ гуйхадаа, ямаршье эриһэн юумэеэ заабол абахаб гэһэн этигэлтэй байгты, тиигэбэл тэрэ юумэеэ абахат. 25Баһа таанад зальбаржа байхадаа, хэн нэгэндэ гомдолтой һаа, тэрэ хүнөө хүлисэгты. Тиигэбэл тэнгэридэ оршодог Эсэгэтнайшье танай нүгэлые хүлисэхэ#11:25 Зарим эхэ бэшэгүүдтэ иимэ хэһэгээр үргэлжэлэгдэдэг: 26 Хэрбээ таанадай хүлисэхэгүй байбал, тэнгэридэхи Эсэгэтнай баһа танай нүгэлнүүдые хүлисэхэгүйл..
Иисүүсэй эрхэ засаг тухай асуудал
27Иисүүс шабинартайгаа дахин Иерусалим ерэбэ. Һүмөөр ябахадань, Тэрээндэ түрүү санаартан, ахамадууд, Хуули заадаг багшанар ойртобо.
28– Та иимэ юумэ хэхэ ямар эрхэтэйбта? Иимэ эрхэ засаг Танда хэн үгөөб? – гэжэ һурабад. 29Иисүүс:
– Бишье таанадһаа нэгэ юумэ һурахамни. Хэрбээ харюу үгэбэлтнай, иимэ юумэ хэхэ ямар эрхэтэй байһанаа таанарта хэлэхэб. 30Хэлыт даа, уһаар арюудхаха эрхэ Иоаннда Бурхан үгөө гү, али хүнүүд гү? – гэжэ урдаһаань асууба. 31Нүгөөдүүлынь хоорондоо шэбэнэлдэбэ:
– Хэрбээ Бурханһаа тиимэ эрхэ үгтөө гэбэлнай, тиигэбэл юундэ Иоаннда этигэдэггүй байгаабта гэхэл. 32Нүгөө талаһаа, хүн зон булта Иоанные лүндэншэн гэжэ тоолодог. Тиимэһээ уһаар арюудхаха эрхэ тэрээндэ юрэ хүнүүд үгөө гэхын аргагүйбди.
Тэдэнэр хүн зонһоо айжа байгаа ха юм. 33Тиимэһээ тэдэнэр Иисүүстэ:
– Бидэ мэдэнэгүйбди, – гэжэ харюусаба. Тиихэдэнь Иисүүс:
– Эдэ юумэнүүдые хэхэ эрхэ Намда хэнэй үгэһые Би баһа хэлэхэгүйб! – гэбэ.
Currently Selected:
Марк 11: BurBBL2024
Highlight
Share
Copy
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
