Марк 10
10
(Мт 19:1-9)
1Иисүүс тэндэхи газарһаа гараад, Иордан голой нүгөө талада оршодог Иудей можо ерэбэ. Дахяад лэ ехэ олон зон Тэрээндэ ерэжэ, Иисүүс тэдэниие урдынхидаал адляар һургаба. 2Хэдэн фарисейнүүд тэндэнь ерээд, Иисүүсые үгэдэнь торгоохо һанаатайгаар:
– Хэлыт даа, Хуулиин ёһоор үбгэн һамганһаа һалаха эрхэтэй гү? – гэжэ һураба. 3Урдаһаань Иисүүс:
– Моисей таанадта юун гэжэ захяа һэн бэ? – гэжэ һураба.
4– Һалаха тухай гэршэлгэ һамгандаа үгөөд, һалажа болохо гээд Моисей захяа һэн, – гэжэ фарисейнүүд харюусаба. 5Тиихэдэнь Иисүүс хэлэбэ:
– Шулуун сэдьхэлтэй байһан хадатнай Моисей тиимэ ёһо заншал таанадта тогтоогоо юм. 6Тиихэдэ юртэмсэ дэлхэй зохёон бүтээхэдээ, Бурхан нэн түрүүн эрэ эмэ хоёрые бүтээгөө юм. 7Тиимэһээл эрэ хүн эхэ эсэгэеэ орхёод, һамгантайгаа нэгэдэхэ, 8тиин тэрэ хоёр ганса бэе болон эблэрхэ гэжэ хэлээ юм. Тиихэлээрээ тэдэ хоёр болбол хоёр бэшэ, харин нэгэ бэе гээшэ. 9Тиимэһээ Бурханай нэгэдүүлһэн юумэ хүн хубааха ёһогүй.
10Һүүлдэнь гэртээ ерээд байхадаа шабинарынь үнөөхи һургаһан юумэн тухайнь һураба.
11– Һамганһаа һалаад, ондоо эхэнэртэй һууһан хүн түрүүшынгээ һамганда урбаба гээшэ. 12Тон тиигэжэл нүхэрһөө һалаад, ондоо эрэтэй һууһан эхэнэр түрүүшынгээ нүхэртэ урбаба гээшэ, – гэжэ Иисүүс тайлбарилба.
Иисүүс үхибүүдые адислана
13Зарим хүнүүд үхибүүдээ адиста хүртүүлхэеэ Иисүүстэ асарба. Зүгөөр шабинарынь тэдэ үхибүүдые багшадаа ойртуулбагүй. 14Тиигэхыень хараад, Иисүүс уурлажа:
– Үхибүүдые наашань табигты, Намда ерэхэдэнь һаалта бү хэгты. Эдэ үхибүүдтэл адли зон Бурханай хаан түрын мэдэлдэ юм. 15Эдэ үхибүүд мэтээр Бурханай хаан орониие тогтоон абаагүй хүн тэндэ хэзээшье орожо шадахагүй гэжэ баталан хэлэнэб, – гэбэ. 16Тиигээд Иисүүс үхибүүдые тэбэреэд, адислаба.
Баян хүн
17Иисүүсэй харгыда ябахада нэгэ хүн Тэрээндэ гүйжэ ерээд, үбдэг дээрээ һүгэдэн унажа:
– Эрхим багша! Мүнхын амидаралда хүртэхын тула би юу хэхэ ёһотойбиб? – гэжэ һураба. 18Иисүүс харюудань хэлэбэ:
– Юундэ Намайе эрхим гэбэш? Имагтал Бурхан эрхим гээшэ. 19Ши захяа заабаринуудые мэдэнэ ха юмши. «Бү ала, ханидаа бү урба, хулгай бү хэ, бусад тухай худал юумэ бү хэлэ, хүниие мэхэлжэ, юумыень бү аба. Эхэ эсэгэеэ хүндэлэ».
20– Багша аа, эдэ захяа заабаринуудые бултыень би эдир наһанһаа сахижа ябадаг хүнби, – гэжэ үнөөхи хүниинь хэлэбэ. 21Иисүүс тэрэ хүниие шэртэжэ, һайшаан хэлэбэ:
– Шамда нэгэл юумэн дутана: ошожо зөөри зөөшэеэ бултыень худалдаад, мүнгыень үгытэйшүүлдэ хубаажа үгэ, тиигээ һаа, тэнгэри дээрэ баялиг зөөритэй болохош. Тиигээд Намда ерэжэ, хажуудамни ябаарай.
22Тиигэжэ хэлэхыень дуулахадаа, үнөөхи хүнэй шарайнь хубилба. Тэрэ уйдхартайгаар саашалба, ушарынь юуб гэхэдэ, тэрэ хүбүүн аргагүй ехэ эд зөөритэй байгаа. 23Иисүүс тойрожо хараад:
– Баян хүнүүдэй Бурханай хаан орондо орохонь бэрхэтэйл байха даа! – гэжэ шабинартаа хэлэбэ. 24Эдэ үгэнүүдыень дуулахадаа, шабинарынь сошолдон гайхалдаба. Харин Иисүүс дабтажа:
– Үхибүүдни, Бурханай хаан орондо орохонь бэрхэтэйл байха даа! 25Баян хүнэй Бурханай хаан орондо орохоһоонь бэлээр зүүнэй һүбөөр тэмээн ороод гарахал, – гэжэ хэлэбэ.
26Шабинарынь бүришье ехээр гайхалдан:
– Тиихэдээ хэн абарагдаха аргатайб? – гэжэ бэе бэеһээн һураба. 27Иисүүс тэдэнээ шэртэн хараад:
– Хүнүүд өөһэдыгөө абаржа шадахагүй, харин юушье хэхэ аргатай Бурхан тэдэниие абаржа шадаха, – гэбэ. 28Тиигэхэдэнь Пётр:
– Бидэ хамаг юумэеэ орхёод, Таниие дахаабди, һаныт, – гэбэ.
29– Минии тулада, Һайн Мэдээсэлэй аша туһада гэрээ гү, аха дүүнэрээ гү, эгэшэ дүүнэрээ гү, аба эжыгээ гү, һамга үхибүүдээ гү, али эдлэжэ байһан газараа орхиһон хүн 30энэ дэлхэйдэ бүришье ехэ юумэндэ хүртэхэ гэжэ Би баталнаб. Тэдэнэр зуу дахин олон гэрнүүдтэй, аха дүүнэртэй, эгэшэ дүүнэртэй, эжынэртэй, үхибүүдтэй, эдлэхэ газартай байха, хашалга мүрдэлгэнүүдыешье өөр дээрээ мэдэрхэ, тиин ерээдүйдэ мүнхын ажамидаралтай болохо. 31Зүгөөр мүнөө түрүү зэргэдэ байгшадай олониинь һүүл зэргэдэ орохо, тиихэдэ мүнөө һүүл зэргэдэ байһанай олониинь түрүүлэн гараха.
Иисүүс үхэхэ тухайгаа гурбадахияа хэлэнэ
32Иисүүс шабинартайгаа Иерусалим руу зорибо. Тэрэ айһан зобоһон шабинарайнгаа урдань алхалба, харин тэдэнэй хойноһоо баһа айшаһан хүн зон һубарилдан ябаба. Нэгэ һабаандаа Иисүүс арбан хоёр шабинараа хажуу тээшэнь абаашаад, Өөртэйнь юу ушарха тухай хөөрэжэ үгэбэ.
33– Мүнөө бидэ Иерусалим орохомнай. Тэндэ Хүн түрэлхитэнэй Хүбүүниие түрүү санаартанай, Хуули заадаг багшанарай гарта тушааха. Тэдэнэр Хүбүүе гэмнэн, үхэлэй саазада хүртөөхэ гэжэ шиидээд, бусад арадай гарта тушааха. 34Тэдэнь Тэрэниие баһаха, нёлбохо, сохихо, хожомынь алаха. Зүгөөр Хүбүүн гурбадахи үдэртөө амидырха.
Яков Иоанн хоёрой гуйлта
35Яков Иоанн гэдэг Зэбэдэйн хоёр хүбүүд Иисүүстэ ерэжэ:
– Багша аа, бидэ Таниие нэгэ юумэн тухай гуйхамнай, – гэбэ.
36– Юун тухай гуйнабта? – гэжэ Иисүүс һураба.
37– Алдарта хаан түрынгөө шэрээдэ һуухадаа, бидэ хоёрой нэгыемнай баруун таладаа, нүгөөдыемнай зүүн таладаа һуулгажа хайрлыт даа, – гэжэ тэдэ Иисүүсһээ гуйба.
38– Таанад юун тухай гуйжа байһанаа үнэхөөрөө ойлгоногүйт. Минии амсаха ёһотой зоболонгой аягаһаа таанад уужа амсажа шадаха аалта? Минии хүртэхэ ёһотой зоболонто уһан арюудхалгада таанад хүртэжэ шадаха аалта? – гэжэ Иисүүс хэлэбэ.
39– Шадахабди, – гэжэ Яков Иоанн хоёр харюусаба.
– Үнэхөөрөө таанад Минии зоболонгой аягаһаа амсахат, Минии хүртэхэ уһан арюудхалгада хүртэлсэхэт. 40Теэд баруун таладамни, зүүн таладамни һууха хүнүүдые һунгахань Минии мэдэлдэ бэшэ. Тэдэ һууринуудта Бурханай табиһан хүнүүд һууха, – гэжэ Иисүүс хэлэбэ.
41Бусад арбан шабинарынь энээн тухай дуулахадаа, Яков Иоанн хоёрто сухалаа ехээр хүрэбэ. 42Тиимэһээ Иисүүс тэдэниие дуудаад хэлэбэ:
– Арад зоной захирагшад гэжэ нэрлэгдэдэг хариинхид тойроошо арад зоноо зонхилхо дуратай байдаг, мүн түшэмэд һайдуудыньшье албатанаа захирха бүрин засагтай байдаг. 43Харин таанад тэдэндэл адляар бэеэ абажа бү ябагты. Агууехэ болохо һанаатай хүнтнай бусадайнгаа бултанайнь зараса болохо ёһотой. 44Али түрүү зэргэдэ гараха һанаатай хүнтнай бусадайнгаа барлаг болохо ёһотой. 45Ушарынь юуб гэхэдэ, Хүн түрэлхитэнэй Хүбүүн хүнүүдые зарахаяа ерээ бэшэ, харин бусад уладта алба хэхэеэ, мүн үнэтэ ами наһанайнгаа сэнгээр олон хүнүүдые абархаяа ерээ.
Иисүүс һохор Бартимейе эдэгээбэ
46Иисүүс шабинартайгаа Ерихоон хото ерэбэ. Хожом хотоһоо ехэ олон зоноор үдэшэлүүлэн гаража ябахадань, харгын хажууда Тимейн Бартимей гэдэг һохор хүбүүн юумэ гуйраншалжа һууба. 47Хажуугаарнь Назаредэй Иисүүс үнгэрнэ гэжэ дуулахадаа, тэрэ:
– Давидай үри һадаһан, Иисүүс! Намайе үршөөжэ хайрлыт даа! – гэжэ хашхарба. 48Олохон зон тэрээндэ дуугүй бай гэжэ зандарба, теэд тэрэнь бүришье шангаар:
– Давидай үри һадаһан, намайе үршөөн хайрлыт даа! – гэжэ хашхарба. 49Иисүүс зогсоод:
– Дуудагты тэрэниие! – гэбэ. Тэрэ һохор хүниие хүнүүд дуудан:
– Бү ай! Бодо, Тэрэ шамайе дуудана, – гэбэд. 50Бартимей һүрэн бодохотойгоо зэргэ гадар хубсаһаа тайлажа хаяад, Иисүүстэ ерэбэ.
51– Шамда юу хэжэ туһалхабиб? – гэжэ Иисүүс тэрээнһээ һураба.
– Багша, намайе харадаг болгыт даа, – гэжэ Бартимей харюусаба.
52– Яба даа, этигэлшни шамайе элүүр мэндэ болгобо, – гэжэ Иисүүс хэлэбэ. Һохор хүниинь тэрэ дороо харадаг боложо, Иисүүсэй хойноһоо ябаба.
Currently Selected:
Марк 10: BurBBL2024
Highlight
Share
Copy
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
