Яковай хандалга 4

Бурханай мэдэлдэ байгты

1Юундэ таанад бэе бэедээ үһөөрхэлдэнэ, хоорондоо арсалданабта? Тэдэтнай танай бэеые мэдэлдээ абахын тула оролдодог хүсэлэнгүүдһээ болоно бэшэ гү? 2Таанад ямар нэгэн юумэтэй болохые хүсэнэт, теэд тиимэ юумэтэй боложо шаданагүйт, тиимэһээ таанад алахадашье бэлэн байнат. Юумэнүүдтэй байхые угаа ехээр хүсэнэт, теэд тэдэ юумэнүүдтэй болохо аргагүй байһанһаа хэрүүл ама гарганат, үһөөрхэнэт. Хүсэһэн юумэнүүдээ Бурханһаа гуйгаагүй хадаа таанад тэдэнээ абанагүйт. 3Тиихэдэ гуйхадаашье, тэдэ юумэнүүдээ абанагүйт, юундэб гэхэдэ, таанад һайн һайханай тула бэшэ, харин өөрынгөө хүсэлэнгүүдые хангахын тула гуйнат. 4Бурханда урбагша зон, энэ оршолон дэлхэйдэ дуратай байхадаа таанад Бурханай дайсад болонот гэжэ мэдэнэгүй аалта? Тиин энэ оршолон дэлхэйтэй нүхэсэхэеэ һанабал, Бурханай дайсан болонот. 5«Зосоомнай оршоһон һүлдын үнэн сэхэ байхые Бурхан хүсэнэ», – гэжэ Нангин Бэшэг соо дэмы хэлэгдээгүй юм. 6Тиихэдэ Бурхан маанадые бүришье элбэг дэлбэгээр үршөөл хайрадаа хүртөөнэ. «Омог бардам зониие Бурхан буруушаана, харин номгон даруу зониие үршөөл хайрадаа хүртөөнэ», – гэжэ Нангин Бэшэг соо хэлээтэй.

7Тиимэһээ Бурханай мэдэлдэ байгты. Шолмосто эсэргүүсэгты, тиигэбэлтнай тэрэ таанадһаа зайлаха. 8Бурханда дүтэлэгты, тиихэдэтнай Тэрэ танда ойртохо. Нүгэлтэн, ажамидаралаа арюудхагты; билдагуушад, зүрхэ сэдьхэлээ арюудхагты. 9Гашуудагты, бархирагты, гэгэн уйлагты. Энеэлдэхэеэ болёод, уйлалдагты. Баярлахын орондо гашуудажа байгты. 10Бурханай урда номгон даруу байгты, тиин Тэрэ таанадые дээшэнь үргэхэл.

Бэе бэеэ бү шүүмжэлэгты

11Аха дүүнэр, бэе бэеэ бү шүүмжэлэгты. Һүзэглэгшэ нүхэрөө шүүмжэлхэдээ, али зэмэлхэдээ, таанад Хуули шүүмжэлнэ, зэмэлнэ гээшэт. Зүгөөр Хуули зэмэлхэдээ, таанад Хуули сахигша бэшэ, харин Хуули шүүбэрилэгшэ болобо гээшэт. 12Гансал Бурхан Хуули үгэдэг ба шүүбэрилдэг юм. Гансал Тэрэ абарха, али үгы һаа, һүнөөхэ аргатай. Харин ши ондоо хүниие зэмэлхэдээ, өөрыгөө хэн гэжэ тоолобош?

Ехэрхүү зан бү гаргагты

13Зай, «Мүнөөдэр гү, али үглөөдэр тэрэ хото ошохобди, тэндэ нэгэ жэл соо худалдаа наймаа хээд, ехэхэн алта мүнгэ олохобди», – гэжэ хэлэдэг таанад мүнөө намайе шагнагты. 14Үглөөдэр таанадтай юу тохёолдохые таанад мэдэнэгүйлта. Таанад халта зуура уняараад, һүүлээрнь үгы болошодог утаа ууралтай адлит. 15«Эзэнэй хүсэбэл, бидэ амиды байхабди, тиимэ юумэ, али ондоо юумэ хэхэбди», – гэжэ хэлэжэ байхын орондо 16таанад бардам зангаараа бүдүүрхэнэт, теэд тиигэжэ бүдүүрхэхэнь буруу юм.

17Бидэ үлзытэй юумэ бүтээхэ ёһотой байһанаа мэдэжэ байгаад, хэдэггүй байбал, нүгэл үйлэдэнэбди.

Currently Selected:

Яковай хандалга 4: BurBBL2024

Highlight

Copy