Яковай хандалга 5

Баяшуулда һэргылэмжэ

1Баяшуул, мүнөө таанад намайе шагнагты! Таанад орилон бархирагты, гэгэн уйлагты, тархи дээрэтнай гай гасалан буухаяа байна. 2Баялиг зөөритнай үмхирөө, хубсаһа хунартнай хибэндэ эдюулээ. 3Алта мүнгэнтнай жэбэдэ даруулаа, тиин тэрэ жэбэ таниие зэмэлхэ, бэеыетнай галда мэтэ шатаажархиха. Таанад зөөри зөөшэеэ эдэ һүүлшын үдэрнүүдтэ дэмы суглуулнат. 4Таряалан дээрэтнай ажаллаһан хүдэлмэришэдтэ хүлһыень түлэхэеэ таанад арсабат, харин мүнөө тэдэнэй түлэгдөөгүй салингынь таанадые зэмэлэн хашхарна. Һүр жабхаланта Эзэн ургасыетнай хадаһан хүдэлмэришэдэй гэгэхые дуулаа. 5Эндэ, газар дэлхэй дээрэ байхадаа, таанад гансал өөһэдынгөө гэдэһэ дүүргэхэ ба нааршаан сагаа үнгэргэхэ тухайл бододог байгаат. Харин мүнөө таанад гаргахаяа хүтэлэгдэһэн шахамал буруундал адли байнат. 6Таанадта эсэргүүсээшьегүй үнэн сэдьхэлтэниие таанад зэмэлжэ алаат.

Тэсэбэритэй, сагаан сэдьхэлтэй байгты

7Зай, аха дүүнэр, Эзэнэй заларан ерэтэр тэсэбэритэй байгты. Таряашаниие хараад үзыт, тэрэ газарһаа ургаса абахын тула ехэл тэсэбэритэйгээр намарай болон хабарай бороо хүлеэдэг. 8Таанадшье тэдэ таряашанда адли ехэ тэсэбэритэй байгты, зоригоо бү алдагты. Эзэнэй заларжа ерэхэ үдэр ойртоод байна.

9Аха дүүнэр, бэе бэедээ гомдохол бү баригты, тиигэбэл таанад гэмнүүлхэгүйт; Заргаша Бурхан үүдэнэй саана зогсоно. 10Эзэнэй нэрээр айладхажа байһан лүндэншэдые һанагты. Бэрхэшээл зоболондо ороходоо, тэдэнэй ехэл тэсэбэритэй байдагые жэшээ болгон һажаажа байгты. 11Аргагүй ехэ тэсэбэриинь түлөө бидэ тэдэ зониие жаргалтай гэжэ тоолодогбди. Таанад Иоовой ямар тэсэбэритэй байһые, Эзэнэй һүүлэй һүүлдэ тэрээниие буян хэшэгтээ хүртөөһые һаныт. Эзэн үршөөл хайратай, энэрхы сэдьхэлтэй дээрэһээ тиигэжэ туһалаа.

12Аха дүүнэрни, гол шухала юумэ хэлэхэмни: тэнгэреэршье, газар дэлхэйгээршье, ондоошье юумээр бү тангариглагты. Харин гэмнүүлхэгүйн тула «тиимэ» гээ һаа, зүбшөөгты, «үгы» гээ һаа, үгы гэһээрээ байгты. 13Зоболон бэрхэшээлдэ оробол, таанад зальбарагты. Баяртай хүхюутэй ябабал, Бурханиие магтаһан дуунуудые дуулагты. 14Хэн нэгэнэйтнай үбдөө һаа, һүзэглэгшэдэй бүлгэмһөө хүтэлэгшэдые дуудагты. Тэдэнэр Эзэнэй нэрэ алдарые дуудан, үбшэн хүнэй толгойдо оливай тоһо түрхеэд, хажуудань зальбарха. 15Этигэл һүзэгтэйгөөр зальбархада, үбшэн хүн эдэгэхэ, Эзэн тэрэниие хүл дээрэнь бодхоохо. Тэрэ хүнэй нүгэл үйлэдэһэн байбалынь, нүгэлынь хүлисэгдэхэ. 16Эдэгэхэ гэбэл, бэе бэедээ нүгэлөө хөөрөөд, бэе бэеынгээ түлөө зальбарагты: үнэн сэдьхэлтэнэй зальбаралга ехэ юумэ хэхэ аргатай. 17Элияа маанадтал адли хүн байгаад, бороо бү ороһой гэжэ ханалтайгаар зальбаран мүргөө, тиин бороо гурба хахад жэл соо ороогүй. 18Бороо ороһой гэжэ тэрэ дахин зальбаран мүргэбэ, тиихэдэнь огторгойһоо газар дээрэ бороо адхаржа, ургаса гараа.

19Аха дүүнэрни! Хэрбээ хүнэй зүб замһаа хадуурхада, хэн нэгэн тэрэниие сэхэ харгыдань оруулбал, 20нүгэлтэниие буруу харгыһаань холодуулһан хүн тэрэниие үхэлһөө аршалжа, тэрэнэй олон нүгэлынь хүлисүүлбэ гэжэ мэдэг.

Currently Selected:

Яковай хандалга 5: BurBBL2024

Highlight

Copy