Хэрэгүүд 23
23
1Павел Зүблэлэй гэшүүдые шэртэн хараад:
– Аха дүүнэр! Бүхы наһаараа энэ үдэр хүрэтэр би Бурханда үнэн сэхээр алба хээб, – гэжэ хэлэбэ.
2Анания гэжэ нэрэтэй ахамад санаарта хажуудань байһан зондо нюур амыень альгадагты гэжэ захирба.
3– Ай, сагаанаар будагдаһан хана, шамайе Бурхан сохихо, – гэжэ тэрээндэ Павел хэлэбэ. – Хуулиин ёһоор намайе шиидхэхэ гэжэ эндэ һууһан аад лэ, намайе сохигты гэжэ захирхадаа Хуули эбдэбэш.
4– Ши Бурханай ахамад санаартые доромжолнош, – гэжэ хажуудань байһан хүнүүд хэлэбэ.
5– Аха дүүнэр, энэ хүн ахамад санаарта гэжэ би мэдээгүйлби, – гэжэ Павел харюусаба. – «Арадайнгаа удамаршые хараажа бү бай», – гэжэ Нангин Бэшэг соо бэшээтэй юм.
6Зүблэлэй гэшүүдэй нэгэ зариманиинь саддукейнэр, нүгөөдүүлынь фарисейнүүд байна гэжэ харахадаа, Павел шангаар ооглобо:
– Аха дүүнэрни, би фарисейнүүдэй хүбүүнби, өөрөө фарисей хүнби. Үхэһэн зон амидырха гэһэн найдалтай байһанаймни түлөө намайе шүүбэрилжэ байна.
7Иигэжэ хэлэһэнэйнь һүүлээр фарисейнэр ба саддукейнэр хоорондоо арсалдажа, сугларһан зоной һаналнуудынь хубаарба. 8Ушарынь юуб гэхэдэ, саддукейнэр үхэһэн хүнүүд амидырдаггүй, Бурханай Эльгээмэлнүүдшье, һүлдэшье үгы гэжэ баталдаг, харин фарисейнүүд эдэ бүгэдэ бии гэжэ тоолодог байгаа. 9Шанга хүхирэлдөөн боложо, фарисейнүүдэй дундаһаа хэдэн Хуули заадаг багшанар бодоод:
– Энэ хүниие гэмнэхээр нэгэшье юумэ олоногүйбди. Энэ хүнтэй Һүлдэ гү, али Бурханай Эльгээмэл хөөрэлдэһэн байхадаа болохо, – гэжэ хэлэбэ.
10Арсалдаанай улам шангадахада, Зүблэлэй гэшүүд Павелые таһара удара татана аа гү гэжэ түмэнэй дарга айгаад, сэрэгшэдтэй суглаанай таһалга руу ороод, Павелые абажа, хэрэм туужа абаашахыень захирба. 11Хойто һүнинь Эзэн Павелай урда бии боложо: «Зоригтой бай! Иерусалимда Нам тухай гэршэлһэндээл адляар, ши мүнөө Рим хотодо гэршэлхэш», – гэбэ.
Павелые алаха гэһэн нюуса хэлсээн
12Хойто үдэрынь еврейнүүд хоорондоо хэлсээ үүдхэн сугларжа, Павелые алаагүй һаа, юумэ эдихэ уухагүйбди гэжэ тангариглаба. 13Энэ хэлсээе дүшэ гаран зон үүдхэһэн байгаа. 14Тэдэнэр түрүү санаартадта болон ахамадуудта ерээд:
– Павелые алаагүй һаа, юушье амсахагүйбди гэжэ тангариглаабди. 15Мүнөө таанар, мүн Зүблэлэй гэшүүд Павелай хэрэгые дахин шалгажа хараха һанаатайбди гэһэн хэбэр үзүүлэн, түмэнэй даргада хүнүүдые эльгээжэ, тэрэниие асаруулагты. Бидэ бэлэн байхабди, иишэ орохоһоонь урда тэрэниие алахабди, – гэбэ.
16Гэбэшье энэ хэлсээн тухай Павелай эгэшын хүбүүн мэдээд, хэрэм ерэжэ, Павелда дуулгаба. 17Тиихэдэ Павел зуунай даргые дуудуулаад:
– Энэ хүбүүн түмэнэй даргада юушьеб дуулгаха һанаатай байна. Энээниие тэрээндэ хүргэжэ үгыт, – гэбэ.
18Зуунай дарга хүбүүниие түмэнэй даргада хүргэжэ:
– Хаалтада байһан Павел намайе дуудажа, энэ хүбүүн танда юушьеб дуулгаха һанаатай гэжэ хэлээд, энээниие танда асархыемни гуйгаа, – гэжэ элидхэбэ.
19Түмэнэй дарга тэрэ хүбүүе гарһаань хүтэлжэ хажуу тээшэнь абаашаад:
– Зай, намда юу дуулгахаяа байнабши, – гэжэ һураба.
20– Павелые Зүблэлэй гэшүүдтэ абаашахые танһаа гуйха тухай еврейнүүд хоорондоо үгэсэн хэлсэбэд, – гэжэ хүбүүн харюусаба. – Тэдэ Павелай хэрэгые дахин шалгажа хараха һанаатайбди гэһэн хэбэр үзүүлхэ. 21Гэбэшье та тэдэнэй үгэдэ бү этигээрэйгты. Павелые алаагүй һаа, юумэ эдихэ уухагүйбди гэжэ тангариглаһан дүшэ гаран хүн тэрэниие һахин хүлеэжэ байха. Тэдэ мүнөөшье бэлэн байна, гансал танай захиралта хүлеэнэ.
22– Намда хөөрэһэн юумэеэ ши хэндэшье бү хэлээрэй, – гэжэ түмэнэй дарга хүбүүндэ хэлээд, тэрэниие табиба.
Павелые Феликс захирагшада эльгээбэ
23Тиигээд түмэнэй дарга хоёр зуутаниие дуудажа:
– Хоёр зуун сэрэгшэдые, далан морин сэрэгшэдые ба хоёр зуун жадашадые бэлдэгты. Тэдэнэр үдэшын юһэн сагта Кесари ошохо ёһотой. 24Павелда моридые бэлдээд, захирагша Феликсдэ тэрэниие бүтэн бүрин зандань хүргэжэ үгэгты, – гэбэ.
25Түмэнэй дарга Феликсдэ иимэ бэшэг бэшээ: 26«Эрхим хүндэтэ захирагша Феликс, таниие би, Клавдий Лисий амаршалнаб. 27Энэ хүниие еврейнүүд баряад, алаха гээ. Тэрэ римэй эрхэтэн байна гэжэ мэдэхэдээ, би бүлэг сэрэгшэдтэйгээ тэрэниие абарааб. 28Юундэ тэрэниие зэмэлнэб гэжэ тодоруулха һанаатайгаар тэрэниие Зүблэлэй гэшүүдтэ асараа һэнби. 29Амииень хороохоор, али түрмэдэ хаахаар нэгэшье муу юумэ хээгүй, харин тэдэнэй Хуулиин арсалдаатай асуудалай түлөө тэрэниие зэмэлжэ байна гэжэ би элирүүлбэб. 30Энэ хүнэй урдаһаа нюуса хэлсээн үүдхэгдэжэ байна гэһэн мэдээсэл абамсаараа, энээниие танда эльгээжэ, харин гэмнэгшэдтэнь өөрынгөө гэмнэлгые танда хэлэхыень захирбаб».
31Абаһан захиралтынгаа ёһоор сэрэгшэд Павелые һүниндөө Антипатри хүргэбэ. 32Хойто үдэрынь морин сэрэгшэдые Павелтай ябуулаад, сэрэгшэд өөһэдөө хэрэмээ бусажа ерэбэ. 33Харин морин сэрэгшэд Кесари хүрэжэ ерээд, захирагшада Павелые, түмэнэй даргын бэшэг дамжуулжа үгэбэ. 34Захирагша абаһан бэшэгээ уншаад, ямар можоһообши гэжэ Павелһаа һураба. Килики можоһоо гэжэ мэдэхэдээ:
35– Шинии гэмнэгшэдэй иишэ хүрэжэ ерэхэдэ би хэрэгыешни шагнуужамби, – гэжэ тэрэ хэлэбэ.
Тиигээд захирагша Павелые Иродэй ордондо харуул доро байлгаха гэһэн захиралта үгэбэ.
Currently Selected:
Хэрэгүүд 23: BurBBL2024
Highlight
Share
Copy
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
