Хэрэгүүд 24

Еврейнүүд Павелые зэмэлнэ

1Табан үдэрэй үнгэрһэн хойно ахамад санаарта Анания хэдэн ахамадуудтай, Тертулл гэдэг үмэглэгшэтэй хүрэжэ ерэбэ. Тэдэ Павелда тохожо байгаа гэмнэлгэеэ захирагшада мэдүүлбэ. 2Павелые дуудуулжа асархадань, Тертулл тэрэниие гэмнэн, захирагшада хандаба:

– Эрхим хүндэтэ Феликс! Танай ашаар бидэ энхэ тайбан ажаһуунабди, оюун ухаанайтнай хүсөөр энэ арад түмэнэй дунда хэгдэһэн ехэ хубилалтануудыетнай 3бидэ хэзээшье, ямаршье талаһаань һайшаадагбди, баярладагбди. 4Юумэ удаан хэлэжэ таниие хашараахаяа хүсэнэгүйб. Манай богони хөөрөөе шагнажа хайрлыт даа гэжэ гуйнаб. 5Энэ хүн Назорейн шажанай бүлгэм толгойлжо, хёмороо татадаг хүн юм, юртэмсэ дэлхэйгээр хаа хаанагүй ажаһуудаг еврейнүүдэй дунда үймөө татаа юм. 6Энэ хүн Һүмыешье бузарлаха һанаатай байгаа, теэд бидэ энээниие барижа үрдеэбди#24:6 Зарим эхэ бэшэгүүдтэ иимэ хэһэгээр үргэлжэлэгдэдэг: 7 Теэд Лисий гэдэг түмэнэй дарга тэрэниие манһаа абаржа, шамда эльгээбэ. 8 Зэмэлжэ байһан маанадыешье хамта ошолсогты гэжэ захирба.. 8Энээниие өөрөө мүшхэжэ, манай гэмнэлгын зүбые баталха байхат.

9Тертуллай хэлэһэниинь үнэн гэжэ еврейнүүдшье баталан, тэрэниие дэмжэбэ.

Павел Феликсын урда өөрыгөө үмэглэнэ

10Захирагшын Павелда дохёо тэмдэг үгэхэдэнь, тэрэ иигэжэ хэлэбэ:

– Та олон жэлэй үргэлжэдэ манай арадай зарга шүүгшэ байгаат гэжэ мэдэдэг ушарһаа би өөрыгөө гүйсэд үмэглэхэб. 11Арбан хоёр үдэрэй урда тээхэнэ мүргэл хэхэеэ Иерусалим ерэһыемни та өөрөө лаблаха байхат. 12Намайе Һүмэдэ хэн нэгэнтэй арсалдажа, мүргэлэй гэртэ, али ондоо газарта үймөө татажа байхыемни хэншье хараагүй. 13Намда тохожо байгаа зэмэ эдэ зон өөһэдөөшье баримталан харуулжа шадахагүй. 14Буруу шажанай бүлгэм гэжэ эдэ зоной нэрлэдэг Зам баримталжа байһан дээрэһээл би үбгэ эсэгэнэрэйнгээ Бурханиие хүндэлнэб гэжэ танда мэдүүлнэб. Моисейн Хуулида болон лүндэншэдэй номууд соо бэшэгдэһэн бүхы юумэндэ би этигэнэб. 15Эдэ зоной Бурханда найдадагтал адляар би баһал үнэн сэдьхэлтэншье, бусадшье зон амидырха гэжэ найдадаг хүнби. 16Тиимэһээ би Бурханайшье, хүнүүдэйшье урда арюун һайн сэдьхэлтэй байха гэжэ ходо оролдодогби.

17Иерусалимда олон жэл ерэнгүй байгаад, һаяар би арадтаа мүнгэнэй туһаламжа хүргэхэеэ, үргэл асархаяа ерээ һэм. 18Эдэ зон намайе һүмэ соо бэеэ арюудхажа байхадамни хараа. Тэрэ үедэ хажуудамни олон зоншье байгаагүй, үймэлдөөншье болоогүй һэн. 19Харин хэдэхэн Асиин еврейнүүд лэ… Хэрбээ тэдэ зон намайе зэмэлхэ шалтагаантай байбал, урдатнай зогсожо, намайе зэмэлхэ ёһотойл. 20Зүблэлэй гэшүүдэй урда зогсоходомни ямар гэмтэ ябадалда хабаатай байһыемни тодоруулһанаа эдэ зон өөһэдөө хэлэжэ үгэг лэ. 21Тэдэнэй урда зогсожо байхадаа: «Үхэһэн зон амидырха гэһэн найдалтай байһанаймни түлөө таанад намайе мүнөөдэр шүүбэрилнэт!» – гэжэ хэлэһэнэймни түлөө үһөөрхэһэн байжа магадгүй.

22Эзэнэй Зам тухай хэнһээшье һайн мэдэжэ байһан Феликс хэрэгэй шиидхэбэриеэ хойшолуулан:

– Түмэнэй дарга Лисиин иишэ хүрэжэ ерэхэдэ би танай хэрэг шиидхэхэб, – гэжэ хэлэбэ.

23Павелые хатуу бэшэ харуул доро байлгагты, нүхэдэйнь туһалхада һаад бү хэгты гэжэ Феликс зуунай даргада захирба.

Павел Феликс болон Друзиилла хоёрой урда

24Хэдэн үдэрэй үнгэрһэн хойно Феликс Друзиилла һамгатаяа (тэрэнь еврей эхэнэр) ерэжэ, Павелые дуудажа асаруулаад, Христоос Иисүүстэ һүзэглэдэг тухайгаа хөөрэхыень шагнаба. 25Теэд Павелай үнэн зүб ажамидарха, бэеэ бариха тухай, ерээдүй зарга шүүбэри тухай хөөрэхэдэнь, Феликс айгаад:

– Зай, иигээд мүнөөдэр болоо. Яба. Сүлөө саг гарабал, би шамайе дуудуужаб, – гэжэ хэлэбэ.

26Тиихэдэ Павел мүнгэ үгэнэ аа гү гэжэ найдан, Феликс хойноһоонь оло дахин эльгээжэ, тэрээнтэй хөөрэлдэдэг байгаа.

27Хоёр жэлэй үнгэрһэн хойно Феликсын орондо захирагшын тушаалда Поркий Фест оробо. Феликс еврейнүүдэй һайшаалда хүртэхын тула Павелые харуул доро үлөөбэ.

Currently Selected:

Хэрэгүүд 24: BurBBL2024

Highlight

Copy