Хэрэгүүд 10
10
Пётр Корнелий хоёр
1Кесарида Корнелий гэжэ нэрэтэй Италиин сэрэгэй зуунай дарга байгаа. 2Тэрэ гэр бүлөөрөө Бурханда һүзэглэдэг, Тэрээнһээ айн һүгэдэдэг, ядажа тулижа ябаһан зондо үргэл бадар ехээр асардаг, Бурханда үргэлжэ зальбардаг һэн. 3Нэгэтэ үдын гурбан саг багаар үзэгдэл харагдаба. Бурханай Эльгээмэл орожо:
– Корнелий, – гэжэ дуудахыень элеэр дуулаба.
4Корнелий тэрэниие айн шэртэжэ:
– Юун болооб даа, Эзэмни? – гэжэ асууба.
– Шинии зальбарал болон хэһэн буяншни Бурханда хүрөө. Тэрэ шамайе һанана, – гээд Эльгээмэл Корнелидэ хэлэбэ. – 5Мүнөө дээрээ Яафа руу хүнүүдые эльгээ, Пётр гэжэ нэрэтэй Симониие дуудуула. 6Тэрэ мүнөө арһа элдэгшэ Симонэйдэ далайн хажуудахи гэртэ айлшална.
7Эльгээмэлэй ябаһан хойно Корнелий хоёр зарасаяа, үнэн сэдьхэлтэ сэрэгэй нэгэ туһалагшаяа дуудажа, 8ушарһан бүхэниие тэдээндэ хөөрөөд, Яафа руу эльгээбэ.
9Үглөөдэрынь, үдын багта тэдэнэрэй хотодо ойртожо байхада, Пётр Бурханда зальбархаяа гэрэй орой дээрэ гараба. 10Тэрэнэй гэдэһэниинь ехээр үлдэжэ, тэрэ эдеэлхэеэ һанаба. Эдеэнэй бэлдэгдэжэ байхада, Пётр үзэгдэл хараба: 11огторгой нээгдэжэ, тэндэһээ дүрбэн үзүүрһээнь баряад газарта буулгагдажа байһан бүд хараба. 12Бүд дээрэ элдэб янзын дүрбэн хүлтэй амитадые, газар дэлхэйн мүлхигшэдые, тэнгэриин шубуудые хараба. 13Абяан гаража:
– Бодо, Пётр. Дуратай юумээ гаргаад эди, – гэжэ Пётрто хэлэбэ.
14– Үгы даа, яабашье эдихэгүйб, Эзэн. Би сэбэр бэшэ, бузар юумэндэ нэгэшье ама хүрөөгүй һэнби, – гэжэ Пётр харюусаба.
15Абяан хоёрдохиёо гаража:
– Бурханай сэбэрлэһэн юумые бузар бү гэ, – гэжэ Пётрто хэлэбэ.
16Энэнь гурба дахин дабтагдаба, тиигээд бүдэнь огторгой өөдэ татагдан абтаба.
17Хараһан үзэгдэлэйнгөө удхыень Пётрой тайлбарилжа ядан, гайхан һуухадань, Корнелиин эльгээһэн хүнүүд Симонэй гэрые оложо, үүдэнэйнь хажууда зогсобо. 18Пётр гэжэ нэрлэгдэдэг Симон эндэ байрлана гү гэжэ тэдэ шангаар һурабад.
19Хараһан үзэгдэл тухайгаа Пётрой бодомжолжо байхада, Арюун Һүлдэ тэрээндэ:
– Симон, гурбан хүн шамайе бэдэрнэ, харана гүш? 20Тэдэниие Би Өөрөө шамда эльгээгээ хүнби. Тиимэһээ энэ бэеэрээ доошоо буужа, татагалзангүй тэдэнтэй яба, – гэжэ хэлэбэ.
21Пётр доошоо буугаад, ерэһэн уладһаа:
– Бэдэрһэн хүнтнай би гээшэб. Ямар хэрэгээр таанад иишэ ерээбта? – гэжэ һураба.
22– Бидэниие зуунай дарга Корнелий эльгээгээ. Тэрэ үнэн сэдьхэлтэн, Бурханда һүзэглэдэг хүн, тэрэниие бүхы еврей зон ехээр хүндэлдэг. Хэлэһэн юумыетнай Корнелиин шагнахын тула Бурханай Эльгээмэл тэрэниие танда эльгээжэ, таниие гэртээ дуудажа асархыень захираа, – гэжэ харюусабад.
23Пётр тэдэниие гэртэ оруулжа айлшалуулба. Хойто үдэрынь Пётр түхеэрээд, ерэһэн зонтой хамта замда мордобо. Хажуудань хэдэн һүзэглэгшэд Яафаһоо нүхэр болон ошолсобод.
24Хойто үдэрынь Кесари хото хүрэжэ ерэбэ. Корнелий бүхы түрэлхидөө, хани нүхэдөө суглуулаад, хүлеэжэ байгаа. 25Пётрой орохотой сасуу Корнелий тэрэниие угтан, хүлдэнь мүргэн унаба.
26– Бодыш даа, – гэжэ Пётр тэрэниие бодхообо. – Бишни юрын хүн гээшэб.
27Пётр Корнелитэй хөөрэлдэһөөр гэртэнь орожо, сугларһан олон зонтой уулзаба.
28– Манай Хуулиин ёһоор еврей хүн ондоо яһатанаар харилсаха, гэртэнь орохо эрхэгүй гэжэ таанад һайн мэдэнэт. Теэд Бурхан намда ямаршье хүниие сэбэр бэшэ, бузар гэжэ тооложо болохогүй байһые харуулба. 29Тиимэһээ хойноһоомни эльгээхэдэтнай, би арсангүй ерээб. Ямар хэрэгээр таанад намайе дуудаабта гэжэ би мүнөө һураха һанаатайб, – гэжэ Пётр тэдэндэ хандан хэлэбэ.
30– Гурбан үдэрэй урда тээ эгээл энэ сагта, үдын гурбан сагай багаар би гэртээ Бурханда зальбаржа байгаа һэнби. Гэнтэ ялалзаһан хубсаһатай хүн урдамни зогсоод: 31«Корнелий, шинии зальбарал болон хэһэн буяншни Бурханда хүрөө. Тэрэ шамайе һанаандаа барижа байна. 32Яафа руу хүнүүдые эльгээ, Пётр гэжэ нэрэтэй Симониие дуудуула. Тэрэ мүнөө арһа элдэгшэ Симонэйдэ далайн хажуудахи гэртэ байна», – гэжэ хэлээ. 33Тиигээд би тэрэ дороо хойноһоотнай эльгээгээ һэнби. Танай ерэһэнтнай ехэ һайн гээшэ. Мүнөө бидэ булта Бурханай урда зогсожо, Эзэнэй танда хэлэ гэжэ захирһан бүхэниие танһаа дуулахаяа эндэ суглараабди.
Пётрой хэлэһэн үгэ
34– Бурхан яһа илгадаггүй гэжэ би одоол үнэн дээрээ ойлгооб, – гээд Пётр хэлэбэ. – 35Бурхан Тэрээндэ һүгэдэгшэ, үнэн сэхээр амидарагша ямаршье яһатанай хүниие хүлеэн абадаг. 36Амгалан байдал тухай номнолые Бурхан Иисүүс Христоосоор дамжуулан, бүхы Израилиин зондо айладхаа. Иисүүс Христоос хүн бүхэнэй Эзэн гээшэ. 37Иоаннай уһаар арюудхуулагты гэжэ хүнүүдые уряалһанһаа хойшо Галилейһээ эхилэн, бүхы Иудей соогуур юунэй болоһые таанад өөһэдөө һайн мэдэнэт. 38Назаредэй Иисүүсые Арюун Һүлдөөр болон хүсэ шадалаар Бурханай дүүргэхэдэнь, Тэрэ хаа хаанагүй ябажа, буянтай хэрэгүүдые үйлэдэжэ, шолмосто баригдаһан хүн бүхэниие эдэгээжэ байһыень таанад баһа мэдэнэт. Бурхан Тэрээнтэй хамта байгаа бшуу. 39Бидэ Иудейн орон нютагта болон Иерусалимда Иисүүсэй бүтээһэн бүхы хэрэгүүдэйнь гэршэнэрбди. Тэрэниие модон хэрээһэндэ хадажа саазалаа. 40Гэбэшье Бурхан Тэрэниие гурбадахи үдэртэнь амидыруулаа, хүнүүдтэ үзэгдэхэ арга олгоо. 41Харин бүхы хүнүүдтэ бэшэ, ганса Бурханай шэлэжэ абаһан гэршэнэртэ, бидэндэ Өөрыгөө Тэрэ үзүүлээ. Тэрэнэй амидырһан хойно бидэ Тэрээнтэй хамта эдижэ уужа ябаабди. 42Үхэһэн ба амиды хүнүүдэй Зарга шүүгшэ, Бурханай табисуурта гэжэ Тэрээн тухай гэршэлхыемнай, хүнүүдтэ Һайн Мэдээсэл номнохыемнай Тэрэ бидэндэ захяа. 43Тэрээндэ этигэһэн хүн бүхэндэ нэрэ алдарайнь хүсөөр нүгэлынь хүлисэгдэхэ гэжэ бүхы лүндэншэд гэршэлнэ.
Бусад арадууд Арюун Һүлдые тогтоон абана
44Пётрой үшөө хэлэжэ байха үедэ һургаал шагнажа байһан хүн бүхэндэ Арюун Һүлдэ бууба. 45Тиимэһээ Арюун Һүлдын бусад арадта үгтэһэн ябадалда Пётртой ерэһэн еврей һүзэглэгшэд ехэ гайхалдаба. 46Элдэб янзын хэлэнүүд дээрэ Бурханиие магтахые тэдэ дуулаба ха юм.
47– Эдэ хүнүүд бидэндэл адляар Арюун Һүлдые тогтоон абаа. Тиимэһээ мүнөө эдэнэй уһаар арюудхуулхада юун һаалта болохоб? – гэжэ Пётр хэлэбэ.
48Иисүүс Христоосой нэрэ алдараар уһаар арюудхуулхыень Пётр тэдэндэ захирба. Тиигээд һүзэглэгшэд Пётрые тэдэнтэй хамта хэдэн үдэр байлсахыень гуйба.
Currently Selected:
Хэрэгүүд 10: BurBBL2024
Highlight
Share
Copy
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
