Хэрэгүүд 11

Иерусалимай һүзэглэгшэдэй бүлгэмдэ Пётрой хэлэһэн үгэ

1Бусад арадууд Бурханай үгые баһа мэдэбэ гэжэ Иудейн ороноор эндэ тэндэ байһан элшэнэр болон һүзэглэгшэд дуулаба. 2Тиимэһээ Пётрой Иерусалим ерэхэдэнь, еврей һүзэглэгшэд тэрэниие зэмэлэн:

3– Та бэлгээ отолуулаагүй хүнүүдэй гэртэ оробот, тэрээнһээ гадна тэдэнтэй хамта хоол барибат, – гэжэ гэмэрэлдэбэ.

4Пётр тохёолдоһон ушарые тэдэндэ эхинһээнь ойлгуулан хөөрэбэ:

5– Яафада Бурханда зальбаржа байхадаа би зальбаралдаа бүрин абтан, үзэгдэл хараа һэнби. Дүрбэн үзүүрһээнь баряад огторгойһоо доошоо буулгагдажа байһан ехэ бүд мэтэ юумые би харааб. Тэрэ бүд байһан газартамни бууба. 6Шагаажа, досоонь юун байнаб гэжэ харахадамни, тэндэ элдэб янзын дүрбэн хүлтэй амитад, зэрлиг ангууд, мүлхигшэд, тэнгэриин шубууд байба. 7Удаань: «Бодо, Пётр. Дуратай юумээ гаргаад эди», – гэжэ намда хандажа хэлэһые дуулааб. 8«Үгы даа, яабашье эдихэгүйб, Эзэн. Би нэгэтэшье сэбэр бэшэ, бузар юумэндэ ама хүрөөгүй һэнби», – гэжэ би харюусабаб. 9Огторгойһоо абяан хоёрдохиёо гаража: «Бурханай сэбэрлэһэн юумые бузар бү гэ», – гэбэ. 10Энэнь гурба дахин дабтагдаад, тиигээд тэрэ бүд огторгой өөдэ татагдан абтаа һэн. 11Эгээл тэрэ сагта айлшалжа байһан гэрэймни урда Кесариһаа минии хойноһоо эльгээгдэһэн гурбан хүн зогсожо байба. 12Татагалзангүй тэдэнтэй ошо гэжэ намда Арюун Һүлдэ хэлээ. Намтай энэ зургаан һүзэглэгшэд баһа ошолсоо, бидэ сугтаа тэрэ хүнэй гэртэ ороо һэмди. 13Тэрэ хүн бидэндэ Бурханай Эльгээмэлые гэртээ хараһан тухайгаа, мүн тэрэнэй: «Яафа руу хүнүүдые эльгээ, Пётр гэжэ нэрэтэй Симониие дуудуула. 14Тэрэ шамайе, гэрынхидыешни абарха мэдээсэл шамда хөөрэжэ үгэхэ», – гэһыень хэлэбэ. 15Минии хөөрэжэ эхилхэтэй сасуу бидэндэ урдань буудагтал тон адляар тэдээндэ Арюун Һүлдэ буугаа. 16Тиихэдэ би «Иоанн уһаар арюудхаа, харин таанад Арюун Һүлдөөр арюудхагдахат», – гэжэ Эзэнэй хэлэһые һанаандаа оруулааб. 17Эзэн Иисүүс Христоосто этигэхэдэмнай бидэндэ үгтэһэн буян хэшэгтэл тон адли буян хэшэгые Бурхан тэдэндэ хайрлаа. Тиихэдэ Бурханда һаалта хэхэ би хэн гээшэбиб?

18Эдэ үгэнүүдые дуулахадаа еврей һүзэглэгшэд Пётрые буруушаахаяа болижо:

– Тиихэдээ Бурхан бусад арадуудташье нүгэл хэхэеэ болихо арга олгожо, Амидарал үгэбэ! – гэжэ хэлэн, Бурханиие алдаршуулба.

Антиох хотын һүзэглэгшэдэй бүлгэм

19Стефанай наһа бараһан сагһаа хойшо хашалга мүрдэлгэнүүдһээ зугадаһан һүзэглэгшэд Финики, Кипр, Антиох ерэжэ, һургаалаа гансал еврейнүүдтэ номножо байба. 20Тэдэнэй дунда Кипрһээ, Хэрээнһээ уг гарбалтай хүнүүд байһан тула тэдэнэр Антиох ошожо, Эзэн Иисүүс тухай Һайн Мэдээсэлые грегүүдтэшье номнобо. 21Эзэн тэдэнээр байлсажа, ехэ олон зон Тэрээндэ һүзэглэн хандаба.

22Энээн тухай һураг Иерусалимай һүзэглэгшэдэй бүлгэм дуулаад, Антиох руу Барнаабые эльгээбэ. 23Барнааба Антиох хүрэжэ ерэхэдээ, Бурханай үршөөһэн буян хэшэгые өөрөө хаража, ехээр баярлаба. Тиигээд бүхы зүрхэ сэдьхэлээрээ Эзэндэ үнэн сэхэ байхыень хүн зониие уряалаа. 24Барнааба Арюун Һүлдөөр болон этигэлээр дүүрэһэн һайн хүн байгаа, тиимэһээ Эзэндэ үшөө олон зон һүзэглэбэ.

25Барнааба Саулые бэдэрхэеэ Тарс ошожо олоод, 26Антиох абажа ерэбэ. Тэдэнэр бүтэн жэл соо һүзэглэгшэдэй бүлгэмтэй байжа, хоюулан ехэ олон зониие һургаба. Тиихэдэ Антиохдо шабинарые анха түрүүшынхиеэ «христианууд» гэжэ нэрлэдэг болоо.

27Тэдэ үдэрнүүдтэ Иерусалимһаа Антиохдо хэдэн лүндэншэд ерээ. 28Агааб гэжэ нэрэтэй тэдэнэй нэгэн бодожо, бүхы газар дэлхэйдэ ехэ үлэсхэлэн болохо гэжэ Арюун Һүлдын ашаар уридшалан хэлэбэ. Тиимэ үлэсхэлэн Клавдий хаанай захирха үедэ болоо һэн. 29Тиихэдэ шабинар Иудейдэ ажаһуудаг аха дүүнэртээ шадаха зэргээрээ туһалха, юумэ эльгээхэ гэжэ шиидэбэ. 30Шиидэһэнээ хүсэлдүүлэн, Барнааба Саул хоёроор бүлгэмэй хүтэлэгшэдтэ өөһэдынгөө мүнгэн туһаламжа дамжуулба.

Currently Selected:

Хэрэгүүд 11: BurBBL2024

Highlight

Copy