Пётрой 1-дэхи хандалга 3
3
Эхэнэрнүүдэй баримталха дүримүүд
1-2Эхэнэрнүүд, таанад баһал нүхэдэйнгээ мэдэлдэ байгты; хэрбээ тэдэнэрэй дунда Бурханай Үгэдэ этигэдэггүй хүнэй байбал, эхэнэрэйнгээ арюун сэбэр, һүзэгтэй ажамидаралые хараад, этигэхэл. Тиихэдэ таанадта юумэ хэлэжэ байхын хэрэг үгы. 3Гоё һайхан болохын тула таанад өөһэдыгөө гадна талаһаа шэмэглэжэ, үһэеэ гоёожо гү, али алтан зүүдхэлнүүдые зүүжэ гү, али зөөлэн хубсаһа үмдэжэ бү байгты. 4Харин Бурханда аргагүй һайшаагдадаг сэдьхэлэй даруу ба зөөлэн занһаа гараһан үнэн бодото мүнхын гоёолтоор өөһэдыгөө шэмэглэгты. 5Урдань Бурханда найдадаг эхэнэрнүүд өөһэдыгөө тиигэжэл шэмэглэдэг, нүхэдэйнгээ үгэ дууладаг байгаа. 6Сарра тиигэжэл Абраһаамай үгэ дууладаг, тэрэнээ эзэмни гэжэ нэрлэдэг һэн. Дэмбэрэлтэ хэрэгүүдые бүтээжэ, ямаршье юумэнһээ айдаггүй байбал, таанадшье баһал Саррын басагад гээшэт.
7Эрэшүүл, таанадшье һамгадаа хүндэлжэ, ойлгожо байгты, тэдэтнай таанадта орходоо һуланууд ха юм. Тиихэдэ тэдэтнай таанадтайл адлихан Бурханай ажамидаралай шагналда хүртэхэ. Бурханай үгын ёһоор эхэнэрнүүдтээ хандажа байбалтнай, ямаршье юумэн зальбархадатнай һаалта болохогүй.
Һүзэглэгшэдэй баримталха үшөө хэдэн дүримүүд
8Түгэсхэлдэнь хэлэхэдэ, таанад булта нэгэ һанал бодолтой, адляар юумэндэ хандажа байгты, бэе бэедээ аха дүүнэдтэл адли дуратай, бэе бэеэ хайрлажа, даруухан ажамидарагты. 9Таанадта муу юумэ хэхэдэнь, харюудань муу юумэ бү хэгты; таанадые хараахадань, урдаһаань бү хараагты. Харин буян хэшэгтээ хүртөөхын тула Бурхан таанадые уряалан дуудаа гэжэ мэдэн, дэмбэрэлтэ хэрэгүүдые бүтээжэ, һайн үгөөр үреэжэ байгты.
10«Танай дундаһаа хэн амиды байха,
жаргалтай үдэрнүүдые үзэхэ һанаатайб?
Тэрэ хүн муу үгэнүүдһээ хэлээ тэбшэн бариг,
худал хуурмаг яряанһаа амаа хизаарлаг.
11Тэрэ хүн дорой юумэнһээ буруу хаража,
һайн һайханиие үйлэдэг,
эб эеые бэдэрэн һэдэжэ,
энхэ тайбан байдалые найруулжа байг.
12Эзэн үнэн сэдьхэлтэниие хаража байдаг,
тэдэнэй зальбаралнуудые дуулажа байдаг,
харин муу юумэ үйлэдэгшэдые Тэрэ буруушаадаг», – гэжэ Нангин Бэшэг соо хэлэгдэнэ.
13Дэмбэрэлтэй юумэ бүтээхэеэ һэдэбэлтнай, хэн таанадта һаалта болохоб? 14Зүб юумэ хэжэ байһанайнгаа түлөө зоболон гаталжа байбалтнай, Бурхан ашыетнай харюулхал! Хэнһээшье бү айгты, һанаагаа бү зобогты. 15Харин зүрхэ сэдьхэлдээ Эзэн Христоосые аргагүй хүндэлжэ ябагты. Ямаршье хүнэй ажамидаралайтнай найдал тухай һурабалнь, хэзээшье харюу үгэхэдэ бэлэн байгты. 16Тиихэдээ дарууханаар, хүндэлһэнөө харуулан, харюусаарайт. Һэшхэлтнай арюун сэбэр байг, тиигэбэл Христоосто һүзэглэдэг танай ашатай ажамидаралые хардадаг хүнүүд өөһэдынгөө хэлэһэн үгэнүүдһээ эшэхэл. 17Бурханай хүсэлөөр нүгэл хэжэ байһанайнгаа түлөө бэшэ, харин дэмбэрэлтэ хэрэгүүдые бүтээжэ байһанайнгаа түлөө зобожо байһань дээрэ.
18Бидэниие Бурханда хандуулхын тула Христоос манай нүгэл шэбэлэй түлөө нэгэтэ зоболон эдлээ. Тэрэ үнэн сэдьхэлтэн хара һанаатай зоной түлөө бэеэ һүнөөлгэжэ, һүлдөөрөө амидыраа. 19Тиигээд һүлдөөрөө хаалтада байһан һүлдэнүүдтэ ошожо номноо. 20Нойн томо корабль барижа дүүргэхые Бурханай ехэ тэсэбэритэйгээр хүлеэжэ байха үе сагта тэдэ һүлдэнүүд мэдэлдэнь байхаяа арсаа бэлэй. Нойн бариһан корабльда үсөөн хүн, хамтадаа найман хүн уһанһаа абарагдаһан юм. 21Тиигэжэ уһанһаа абарагдаһаниинь мүнөө бидэниие абаржа байдаг уһан арюудхалай бэлгэ тэмдэг болоо. Уһан арюудхалга бэеын муухайе арилгана бэшэ, харин Иисүүс Христоосой амидыралгын ашаар һайн һайхан сэдьхэл үршөөхыень Бурханһаа гуйна. 22Христоос тэнгэридэ дэгдээд, бүхы Эльгээмэлнүүдые, тэнгэриин бүхы захиргаан, хүсэнүүдые эрхилэн, Бурханай баруун таладань оршоно.
Currently Selected:
Пётрой 1-дэхи хандалга 3: BurBBL2024
Highlight
Share
Copy
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
