Medhetethi 34
34
Seekemanne Diina
1Liya Yayqoobas yelida na7iya Diina, he wode Kanaane maccasata be7anaw keyasu. 2He biitta haariya Hiwe addiya Hamoora na7a Seekemi iyo be7idi, dafidi iissis. 3Iya wozanay Yayqooba na7iw Diinas qadhetis. I iw mishetida gisho lo77o qaalara iyo odisis. 4Seekemi ba aawa Hamoora, “Taw ha na7iw macho oycharki” yaagis.
5Yayqoobi ba na7iw, Diina, azini dafidaysa si7ida wode iya adde nayti mehera bazzon de7oosona. Hessa gisho, enti yaana gakanaw si77i gis.
6Hessafe guye, Seekema aawa Hamoori Yayqooba odisanaw yis. 7Yayqooba adde nayti bazzofe yidi hessa si7idosona. Enti Seekemi Yayqooba na7iw dafidi, iissidi Isra7eele yeellayida gisho daro yilotidosona.
8Shin Hamoori entako, “Ta na7ay Seekemi hinte na7ees daro mishetees, hayyana iyo iyaw macho immerketi. 9Nuura eketitenne geletite, hinte macca nayta nuus immite, nu macca naytaka hintew ekite. 10Hinte nu giddon daanaw danda7eeta. Biittay daro dalga, iya oothidi zal7idi hintew aqo demmanaw danda7eeta” yaagis.
11He wode Seekemi Diina aawanne I ishata, “Taani hinte sinthan sabetiko, hinte koyiyaba aybiba gidikoka immana. 12Hinte mishira na7ees immanabaanne koyta hinte koyda mela tana oychite. Taani hinte tana oychidaba ubba immana. Shin taani machanaw na7iw taw immerketi” yaagis.
13Banta michiw Diina Seekemi tunisida gisho, Yayqooba adde nayti Seekemasinne iya aawa Hamooras wordotidosona. 14Entako, “Nuuni hessa mela palabaa oothanaw danda7oko, nuuni nu michiw qaxaretiboona asas immoko, hessi nuna kawushiyaba. 15Hinte nuus issiba ero giiko nu hintew ero gaana. Hessika, hinte biitta adde asa ubbay qaxaretidi nuuda haniko, 16nuuni nu macca nayta hintew immanaw Ero gaana. Hinte macca naytaka nuus ekana. Nuuni hinte giddon de7idi hintera issi ase gidana. 17Shin hinte qaxaretanaw ero goonna ixiko, nuuni nu michiw eki baana” yaagidosona.
18Yaatin ha enti gidabay Hamoorasinne iya na7a Seekemas lo77o daanis. 19He panthay ba aawa keethan de7iya ubbaafe aadhidi bonchetida gisho koydaba oothanaw iyaw maati de7ees. Yayqooba na7iw daro dosida gisho, enti gidaba oothanaw guye gibeenna. 20He wode Hamoorinne iya na7ay Seekemi banta katama dabaaba bidi, banta katama asaas haysada yaagidi odidosona. 21“Ha asati nuura siga de7oosona. Biittay daro dalga gidiya gisho enti ha biittan goyo zal7o. Enta macca naytaka nuuni ekana, entika nu macca nayta ekona. 22Shin nuura enti issi asada de7anaw nuuni issiba ero gaanaw koshshees. Hessika, enti qaxaretidaysada nu adde asa ubbay qaxaretanaysa. 23Nuuni hessada oothiko, enta meheynne, enta aqo ubbay nubaa gidennee? Hessa gisho, ane nuuni enti geysa ero goos. Entika nu giddon de7ana” yaagidosona.
24Katamaa dabaaba shiiqida asati ubbay Hamoorasinne iya na7a Seekemas, “Ero” gidoosona. Yaatin he katama adde asati ubbay qaxaretidosona.
25Heedzantho gallas, enti ubbay banta qaxara maduntha saketishin, Yayqooba adde naytape nam7ay, Diina ishati, Simoonaranne Leewera banta mashsha ekidi oonika eronna katama gelidi adde asa ubba wodhidosona. 26Hamooranne iya na7a Seekema mashshan wodhidi, banta michiw Diina Seekema keethafe eki bidosona. 27Yayqooba hara adde nayti ahata bolla gelidi banta michiw Diina tunisida katama ubbaa bonqidosona. 28Enta dorsa wudiya, miiza wudiya, hariya, katama giddon de7iyabaanne gaxan de7iyaba ubba ekidosona. 29Enta keethan de7iya aquwa ubba, enta nayta ubbaanne maccasata ubba di7idosona.
30Yayqoobi Simoonanne Leewe, “Hinte ta bolla gita meto ehideta. Ha biittan de7iya Kanaanetinne Parzeti tana ixana. Nuuni taybon guutha, enti issife gididi ta bolla dendiko, taaninne ta soo asay dhayana” yaagis.
31Shin enti, “Yaatin, I nu michiw layma maccasada oothanaw bessii?” yaagidosona.
Currently Selected:
Medhetethi 34: GFBLVF
Highlight
Share
Copy
Want to have your highlights saved across all your devices? Sign up or sign in
The Word for the World International and The Word for the World Ethiopia
