Medhetethi 33
33
Yayqoobi Eesawera Gahetetha
1Yayqoobi dhoqu gidi xeelliya wode Eesawey ba oyddu xeetu asaara yeysa be7is. Hessa gisho, nayta Liyas, Raheelisinne nam7u aylletas shaaki immis. 2Aylletanne enta nayta sinthan, Liyanne I nayta enta geedon, Raheelonne Yoosefa wursethan wothis. 3Shin I baw sinthe aadhidi ba ishaako matishe sa7a gaki gaki laapuntoho ziggis.
4Shin Eesawey iyara gahetanaw woxi yidi iya qoodhiya qoomidi yeeris. Nam7ayka yeekidosona. 5Eesawey dhoqu gidi xeellidi maccasatanne nayta be7idi, “Ha neera de7eysati oonantee?” yaagidi oychis.
Yayqoobi, “Ta godaw, haysati Xoossay ne aylliyas ba keehatethan immida nayta” yaagis. 6Aylleti banta naytara shiiqidi iyaw ziggidosona. 7Kaallidi Liyaranne I naytara yidi ziggidosona. Wursethan Yoosefaranne Raheelira yidi ziggidosona.
8Eesawey, “Ha sinthan bishe taara gahetida wudey ubbay aybee?” yaagidi oychis.
Yayqoobi, “Ta godaw, hessi taani ne sinthan saba demmanaw yeddidaysata” yaagis.
9Shin Eesawey, “Ta ishaw, taw gidiya shaloy de7ees, nebay new gido” yaagis.
10Yayqoobi, “Hayyana, ha7i taani ne sinthan saba demmidaba gidiko, ha taani immeysa eka. Neeni tana moka ekida gisho, ta ne som7uwa be7eysi Xoossa som7o be7eysa mela. 11Taani new ehida ha imota eka. Xoossay taw keehi immida gisho kumis” yaagis. Yayqoobi woossidi aggonna ixida gisho, Eesawey iya imota ekis.
12Eesawey, “Ane yedha, taani neera issife baana” yaagis.
13Shin Yayqoobi, “Ta godaw, nayti shugo gideysa eraasa. Qassi taani galo marata dhanthiya dorsatanne miiza naaganaw koshshees. Asay enta hari attoshin, issi gallas minthi laagiko, mehe ubbay hayqana. 14Hessa gisho, ta godaw, ne aylletape sinthatada ba. Taani Sayren ta godaa gakanaw, ta sinthan de7iya mehiyanne nayta hemethaa mela loddan kaallada ta godaa taani Edoomen gakana” yaagis.
15Eesawey, “Yaaniko, taani ta asaape guuthara new asho” yaagis.
Shin Yayqoobi, “Koshshenna; taani ta godaa sinthan sabetidaysi taw gidana” yaagis.
16Hessa gisho, Eesawey he gallas ogen wodhidi Sayre simmis. 17Shin Yayqoobi Sukota bis. Yan baw keethe keexis, ba mehetas shaqara shaqaris. Hessa gisho, he bessa Sukota (Kuya woyko Gaabba) gidi sunthis.
18Yayqoobi Masephexoomepe simmidi Kanaane biittan de7iya Seekema katama saron gakis. I he katamas sintha baggara dunkaane tokidi uttis. 19Ba dunkaaniya tokidi uttida gadiya Seekema aawa Hamoora naytape issi xeetu bira santimen shammis. 20Yan yarsho bessi giigisidi, “Godaa, Isra7eele Xoossa” gidi sunthis.
Currently Selected:
Medhetethi 33: GFBLVF
Highlight
Share
Copy
Want to have your highlights saved across all your devices? Sign up or sign in
The Word for the World International and The Word for the World Ethiopia
