Medhetethi 11
11
Babiloone Gimbe
1Sa7a bolla de7iya asi ubbay koyro issi doonan odetees. 2Enti doloha baggafe dendidi bida wode Sana7oora biittan demba bessi demmidi yan uttidosona.
3Enti issoy issuwako, “Haa yiite, xuube medhidi, minnana mela taman xuuggoos” yaagidosona. Enti shucha gisho xuube, urqa gisho made melaba, 4ekidi, “Haa yiite, nu sunthaa xeegisanawunne qassi nuuni ha sa7a bolla laaletonna attana mela issi gita katamaanne xeeray salo gakiya pooqe keexoos” yaagidosona.
5Shin Goday asati keexida gita katamaanne pooqiya be7anaw duge wodhis. 6Goday haysada yaagis; “Heko, enti issi asi; enti ubbayka issi doonan odetidosona. Enti ha7i haysa oothanaw doomidosona. Enti bantaw oothanaw halchidaba polonna aggokona. 7Yaaniya gisho, haayite; duge wodhidi enti issoy haasayiya doona issoy eronna mela enta doona dummayos” yaagis. 8Goday enta hessafe sa7a ubbaa bolla laallin, enti katama keexeysa aggaagidosona. 9Goday sa7an de7iya asa doona yan buqida gisho he katamaa sunthay Babiloone#11:9 Babiloone: Ibraawetho doonan ha suntha birshethay “Walaketis” guussu geetetis. Goday enta hessafe sa7a ubbaa bolla laallis.
Seema Yeletetha
10Seema yeletethay haysafe kaallidi xaafetidaysa; dhayo haathaafe guye, nam7u laythi gidin, Seemas laythi xeeta gidida wode, Seemi Arfakisaade yelis. 11Seemi Arfakisaade yelidaape guye, ichashu xeetu laythi de7is. Hara adde naytanne macca nayta yelis.
12Arfakisaadi 35 laythi de7idi, Salaha yelis. 13Arfakisaadi Saala yelidaape guye, 403 laythi de7is. Hara adde naytanne macca nayta yelis.
14Saali 30 laythi de7idi, Eboora yelis. 15Saali Eboora yelidaape guye, 403 laythi de7is. Hara adde naytanne macca nayta yelis.
16Eboori 34 laythi de7idi, Pelega yelis. 17Eboori Pelega yelidaape guye, 430 laythi de7is. Hara adde naytanne macca nayta yelis.
18Pelegi 30 laythi de7idi, Ra7a yelis. 19Pelegi Ra7a yelidaape guye 209 laythi de7is. Hara adde naytanne macca nayta yelis.
20Ra7i 32 laythi de7idi, Saruga yelis. 21Ra7i Saruga yelidaape guye, 207 laythi de7is. Hara adde naytanne macca nayta yelis.
22Sarugi 30 laythi de7idi, Nakoora yelis. 23Sarugi Nakoora yelidaape guye, 200 laythi de7is. Hara adde naytanne macca nayta yelis.
24Nakoori 29 laythi de7idi, Taara yelis. 25Nakoori Taara yelidaape guye, 119 laythi de7is. Hara adde naytanne macca nayta yelis.
26Taari 70 laythi de7idi, Abrame, Nakooranne Haarane yelis.
Taara Yeletetha
27Taara yeletethay haysafe kaallidi xaafetidaysa; Taari Abrame, Nakooranne Haarane yelis. Yaatin Haraani Looxe yelis. 28Haraani ba aaway Taari paxa de7ishin, ba yeletida Kaldaaweta biittan, gita Uure kataman hayqis. 29Abrameynne Naakorey nam7ayka machidosona. Abrame mache sunthay Soora. Qassi Nakoora mache sunthay Milko. Milka Haarana na7iw; Haaraney Milkanne Yosika aawa. 30Soora maynthi gidida gisho iw na7i baawa.
31Taari ba na7aa Abrame, ba na7aa Haarane na7aa Looxenne, ba na7aa Abrame machiw Soora ekidi, Kanaane biitta baanaw Kaldaaweta katamaa Uurepe dendis. Shin enti Kaarane katama gakidi yan uttidosona. 32Taari 205 laythi de7idi Kaaranen hayqis.
Currently Selected:
Medhetethi 11: GFBLVF
Highlight
Share
Copy
Want to have your highlights saved across all your devices? Sign up or sign in
The Word for the World International and The Word for the World Ethiopia
