Medhetethi 12
12
Abrame Xeegetethaa
1Goday Abrameko, “Ne biittafe, ne deriyape, ne soo asaape, shaaketada ta nena bessiya biitta ba. 2Ta nena wolqaama dere oothana, nena ta anjana ne suntha gita kessana; ne haratas anjo gidana. 3Taani nena anjeyisata anjana; nena baaddeyisata baaddana, biitta bolla de7iya dere ubbay ne gaasora anjetana” yaagis.
4Hessa gisho, Abramey Xoossay iya kiitidaysada keyis. Looxey iyara issife bis. Abramey Kaaranepe keyiya wode iyaw laythi laapun tammanne ichasha. 5Abramey ba machiw Soora, ba isha na7a Looxe, Kaaranen de7ishe shiishida shaluwanne ba aylleta ubba ekidi Kanaane biitta bidi gakidosona. 6Abramey Seekeman de7iya More geetetiya gita mithaako gakanaw kanthidi bis. He wode Kanaane asati he biittan de7oosona. 7Xoossay Abrames yan qoncidi, “Ha biitta taani ne sheeshas immana” yaagis. Ika ba qoncida Godaas he bessan yarsho bessi giigisis. 8He bessaafe dendidi Beetelepe doloha baggara de7iya zumako bis. Yan Beetele wuloha baggan, Gaye doloha baggan aggidi, ba dunkaaniya tokis; yan Godaas yarsho bessi giigisidi Godaa sunthaa xeegis. 9Hessafe guye, Abramey bessafe besse aadhishe Negebe gakis.
Abramey Gibxe Biittan
10He wode Kanaane biittan koshi keyis. Koshay minnida gisho guutha wode yan daanaw Abramey Gibxe biitta bis. 11Gibxe gelanaw matiya wode Abramey ba mache Soorako, “Neeni mala lo77o gideysa taani erayis; 12Gibxe asati nena be7idi, ‘Hanna iya machiw’ yaagidi tana wodhidi nena aggaagana. 13Hessa gisho, ne gisho gidi taw lo77oba oothana melanne ta shempiya attana mela ‘Ta iyaw micho’ yaaga” yaagis. 14Abramey Gibxe biitta gakida mela Gibxe asati Soora mala lo77o maccasi gidoysa be7idosona. 15Gibxe Paarona moorinnati iyo be7idi daro nashshidi kawa Faaronas odidosona, iyoka kawa sinthe efidosona. 16I gaason kawoy Abrame bonchidi mokis. Gujidika dorsata, miizata, hareta, gimaleta, adde aylletanne macca aylleta iyaw immis. 17Shin Goday Abrame mache Soora gaason Gibxe kawanne iya keetha gado hargen shocis. 18Hessafe guye, kawoy Abrame xeegisidi, “Ne ta bolla oothidabay haysi aybee? Iya ne macho gideysa ayis taw odabikii? 19Ayis ta micho gada wordotadii? Ta iyo macho oothada ekas, shin attis; ne machiya hannashu eka ba” yaagis. 20Hessafe guye, Abramenne iya machiw iyaw de7iyaba ubbara kessi yeddana mela Kawoy ba asata kiittis.
Currently Selected:
Medhetethi 12: GFBLVF
Highlight
Share
Copy
Want to have your highlights saved across all your devices? Sign up or sign in
The Word for the World International and The Word for the World Ethiopia
