ሮመ 8

ጌሻ አያናን ደኦ

1ሄሳ ግሾ፥ ክርስቶስ የሱሳን ደኤይሳት ሀእ ፕርደቶኮና። 2ክርስቶስ የሱሳ ባጋራ ኑስ ደኦ እምያ ጌሻ አያና ህገይ፥ ታና ናጋራነ ሀይቆ ህገ አይለተፈ ከስስ። 3ኑ ናጋራ አሳተ ጋሶን፥ ህገይ ዳቡራንቾ ግድያ ግሾ ኑና አሻናዉ ዳንዳእቤና። ፆሳይ ባ ናኣ ናጋራንቾ አሳ ሌምሶን ናጋራስ ያርሾ ግዳና መላ ኪትድ ሄሳ ኦስ። ያትድ፥ ፆሳይ ክርስቶሳ አሹዋ ባጋራ ናጋራ፥ ናጋራንቾ አሳ ግዶን ፕርድስ። 4ፆሳይ ሄሳ ኦዳይ፥ ኑ አሾ አሞይ ኮየይሳዳ ግዶናሽን፥ ጌሻ አያናይ ኮየይሳዳ ደእያ ኑ ቦላ ህግያ ፅሎ ኪታይ ፖለታና መላሳ።

5ባንታ አሾ አሙዋ ካልድ ደኤይሳት ባንታና ኡፋይስያባ ቆፖሶና። ሽን ጌሻ አያና ሸነን ደኤይሳት ጌሻ አያና ኡፋይስያባ ቆፖሶና። 6ኑ ቆፋይ አሾ አሞስ ሃረትኮ ሀይቆ ኤሄስ፥ ሽን አያና አሞስ ሃረትኮ ደኦነ ሳሮተ ኤሄስ። 7አሾ አሞስ ሃረትያ አስ ፆሳ ህግያስ ኪተታናዉ ኮዮና ግሾነ ኪተታናዉ ዳንዳኦና ግሾ፥ ፆሳራ ሞርከ። 8ባንታ አሾ አሙዋስ ሃረተይሳት ፆሳ ኡፋይሳናዉ ዳንዳኦኮና።

9ሽን ፆሳ አያናይ ህንተናን ደእኮነ ህንተና ሃርኮ፥ ህንተ አያና ሸነን ደኤታፐ አትሽን፥ ህንተ አሾ አሙዋስ ሃረተከታ። ክርስቶሳ አያናይ ባይና ኦንካ ክርስቶሳባ ግደና። 10ሽን ክርስቶስ ህንተናን ደእኮ፥ ህንተ አሳተይ ናጋራ ጋሶን ሀይቅዳይሳ። ሽን ህንተ አያናይ ፅሎተ ጋሶን ደኦን ደኤስ። 11ሽን የሱሳ ሀይቆፐ ደንዳ ፆሳ አያናይ ህንተናን ደእኮ፥ ክርስቶሳ ሀይቆፐ ደንዳ ፆሳይ፥ ህንተናን ደእያ ባ ጌሻ አያናን ሀይቅያ ህንተ አሳተስ ደኦ እማና።#2 ቆሮ 3:16.

12ህዛ፥ ታ እሻቶ፥ ኑኒ ኑ አሾ አሙዋ ካልድ ዳናዉ በሰና። 13ህንተ፥ ህንተ አሾ አሙዋስ ደእኮ ሀይቃና፥ ሽን ጌሻ አያና ዎልቃን ናጋራ ኦሱዋ ዎኮ ህንተ ደኦን ዳና። 14ፆሳ አያናይ ካለያ ኡባይ ፆሳ ናይታ። 15ኑኒ፥ “አባ፥ ታ አዋዉ” ያግድ ፄግያ፥ ፆሳ ናይታ ኦያ ጌሻ አያና ኤክዳፐ አትሽን፥ ዛሪድ ያሻን ዳናዉ አይለ ኦያ አያና ኤክቦኮ።#ማር 14:36፤ ጋላ 4:6. 16ፆሳ አያናይ ኑ አያናራ ግድድ ኑኒ ፆሳ ናይታ ግደይሳ ማርካቴስ። 17ኑኒ እያ ናይታ ግድኮ ፆሳ አንጁዋ ላታና፤ ክርስቶሳራ ዎላ ሄ አንጁዋ ላታና። ቃስ ኑኒ ክርስቶሳራ መቱዋ ኤክኮ እያራ ዎላ እያ ቦንቹዋን ሻከታና።

ያና ቦንቹዋ

18ኑኒ ሀእ ዋየትያ ዋይያ፥ ስንፈ ኑስ ቆንጫና ቦንቹዋራ ጋ በእኮ፥ ግንሳናዉ ዳንዳኤተና ጋዳ ቆፓይስ። 19መተ ኡባይ ፆሳ ናይታ ቆንጨ ዳሮ ላሞትድ ናጎሶና። 20መተ ኡባይ ሀዳ ግድስ፤ ሄስካ፥ መተ ዶሮን ግዶናሽን፥ ኡፋይሳን ናጋና መላ ኦዳ ፆሳ ሸነን ሀንስ።#መ 3:17-19. 21መተይ ባ ሁጰን ዮ አይለተፈ ዎዘትድ፥ ፆሳ ናይታራ ዎላ ቦንቾ ላአ ሻከታና። 22መተይ እስፈ ሀኖ ጋካናዉ እቀ ኦይክዳ ማጫሳዳ ኦለንነ ኡንአን ደኤይሳ ኑ ኤሮስ። 23ቃስ ሄሳ መተ ፃላላ ግዶናሽን፥ ጌሻ አያና ባይራ እሞታዳ ኤክዳ ኑኒ፥ ኑ ሁጰን ኑ አሳተስ ዎዞ ግድዳ ፆሳ ናይታ ግዳና ኡፋይሳ ናግሸ ኑ አሳተን ኦሎስ።#2 ቆሮ 5:2-4. 24ሀ ኡፋይሳን ኑኒ አትዳ። ሽን ኑኒ ኡፋይስ ኦያባይ በንትያ ግድኮ ሄሳ ኦን ኡፋይስ ኦ? 25ሽን ኑ በኦናባ ደማና ግድ ኡፋይሳን ናግኮ ሄሳ ዳንዳአን ናጎስ።

26ሄሳዳ ጌሻ አያናይ ኑ ዳቡራን ማዴስ። ኑኒ ፆሳ ዋት ዎሳናዉ በሲያኮ ኤሮኮ፥ ሽን ጌሻ አያናይ ባ ሁጰን፥ አስ ኦዳናዉ ዳንዳኤቶና ቃላን ኑስ ጋናቴስ። 27ቃስ አሳ ዎዛና ኤርያ ፆሳይ ጌሻ አያና ቆፋይ አይበኮ ኤሬስ። ጌሻ አያናይ ፆሳ ሸንያዳ ጌሻታስ ጋናቴስ።

28ፆሳ ሲቀይሳታስነ እያ ሸንያዳ ፄገትዳይሳታስ ፆሳይ ኡባ ሎኦስ ኦይሳ ኤሮስ። 29ፆሳይ ኮይሮትድ ኤርዳይሳት ባ ናኣ ዳናና መላነ ናአይካ አማነይሳታ ግዶን ባይራ ግዳና መላ ኤንታ ዱማይድ ዎስ። 30ፆሳይ ኮይሮትድ ዱማይዳይሳታ ፄግስ፤ ሄ ፄግዳይሳታ ፅልስስ፤ ሄ ፅልስዳይሳታ ቃስ ቦንችስ።

ፆሳ ሲቆ

31ያትን፥ ኑ ሀ ኡባስ ዎይጋኔ? ፆሳይ ኑ ባጋ ግድኮ ኑራ ኦነ ኤቀታናይ? 32እ ሀር አቶሽን፥ ባ ናኣስ ቃቶናሽን፥ ኑ ግሾ አድ እሚስ። ያትን፥ ባ ናኣ ኑስ አድ እምዳይስ ዋንድ ኡባባ ጮ እመኔ?

33ፆሳይ ኤንታና ፅልስዳ ግሾ እ ዶርዳይሳታ ኦነ ሞታናይ? 34ያትን፥ ኤንታ ቦላ ፕርዳናዉ ዳንዳኤይ ኦኔ? ኦንካ ባዋ። ሀይቆፐ ደንድድ ፆሳ ኡሻቻን ኡትዳ፥ ክርስቶስ የሱሲ፥ እ ኑስ ጋናቴስ።

35ህዛ፥ ኑና ክርስቶሳ ሲቁዋፐ ሻካናይ ኦኔ? ዋየየ ዎይኮ መቶየ ዎይኮ ጎደየ ዎይኮ ኮሸየ ዎይኮ ካሎተየ ዎይኮ ያሸየ ዎይኮ ኦለዬ? 36ጌሻ ማፃፋን፥

“ኑኒ ነ ግሾ ኩመ ጋላስ ሀይቆስ፤

ሹካስ ኤፍያ ዶርሳዳ ታይበትዳ”#ማዝ 44:2.

ጌተትድ ፃፈትዳይሳ መላ ግድስ።

37ሽን ኑኒ፥ ኑና ሲቅዳ ክርስቶሳን ሀ ኡባ ፖሎ ፆኖስ።

38ሄሳ ግሾ፥ ሀይቆ ግድን ደኦ ግድን ኪታንቾታ ግድን ሃረይሳታ ግድን ሀእ ደኤይሳ ግድን ስንፈ ያናይሳ ግድን ዎልቃማታ ግድን፥ 39ሳሎ ዎልቃ ግድን ሳአ ዎልቃ ግድን አይ መተ ግድን ኑ ጎዳ፥ ክርስቶስ የሱሳን ደእያ ፆሳ ሲቁዋፐ ኑና ሻካናዉ ዳንዳኦናይሳ ታኒ ኤራስ።

Currently Selected:

ሮመ 8: GFBEVF

Highlight

Copy