ሮመ 9
9
እስራኤለ ዶረተ
1ታኒ ክርስቶሳን ቱማ ኦዳይስ፥ ዎርዶትከ። ጌሻ አያናይ ካለያ ታ ካሀይ ታኒ ዎርዶቶናይሳ ታዉ ማርካቴስ። 2ታ ዎዛናን እስራኤለታስ ዳሮ ቃታይስነ ቃማ ጋላስ ቆፓይስ። 3ታኒ፥ ታ እሻታ ግሾ፥ ክርስቶሳፐ ሻከታዳ ፆሳ ባደፈ ጋርሳን ደእዳኮ ዶሳይስሽን። 4ኤንቲ እስራኤለታ፥ ፆሳይ ኤንታ ባ ናይታ ኦስ፥ ባ ቦንቹዋ ኤንታዉ ቆንጭስስ። ኤንታራ ጫቅስ፤ ህግያ ኤንታዉ እሚስ። ኤንቲ ፆሳ ጎይናና ቱማ ኦግያ በስስ፤ ፆሳይ ኡፋይሳ ቃላ ኤንታዉ እሚስ።#ከሳ 4:22. 5ኤንቲ የለተን ማይዛታ ኮቸ፤ ቃስ ክርስቶስ አሾን ኤንታ ኮቸ ግድድ ይስ። ኡባፈ ቦላ ግድዳ ፆሳይ መርናዉ ጋላተቶ። አምንእ!
6ግዶሽን፥ ፆሳይ ገልዳ ቃላይ ፖለቶና አትስ ጉሱ ግደና። እስራኤለ አሳ ኡባይ ፆሳ አስ ግዶኮና። 7ቃስ አብራሃመ ዛረ ኡባይ አብራሃመ ናይታ ግዶኮና። ፆሳይ አብራሃመስ፥ “ነ ኮቻይ ይሳቃ ባጋራ ፄገታና” ያግስ።#መ 21:12. 8ሄሳ ጉሳይ አሾን የለትዳ ናይት ኡባይ ፆሳ ናይታ ግዶኮና። ሽን ቱማ እስራኤለ ናይት ፆሳይ አብራሃመስ ገልዳ ቃላዳ የለትዳ ናይታ።#መ 21:12. 9ፆሳይ እማና ግድ ገልዳ ቃላይ፥ “ታኒ ዎንቶ ላይ ሀኖደ ያና፤ ሳራካ አደ ናአ የላና”#መ 18:10. ያገይሳ።
10ሄሳ ፃላላ ግዶናሽን፥ እርብቅነ ይሳቅ የልዳ መንተ አደ ናይታባ አኬክተ። 11ኤንቲ የለታናፐ ዎይኮ ኢታ ዎይኮ ሎኦ ኦናፐ ስን ፆሳ ዶሮይ ኦሶን ግዶናሽን ፄሳን ግደይሳ ቆንጭሳናዉ፥ 12“ባይራይ ካሉዋስ ኪተታና” ያግድ ጎዳይ እርብቃስ ኦድስ።#መ 25:23. 13ሄስካ ጌሻ ማፃፋን፥ “ያይቆባ ዶሳስ፥ ኤሳዌ እፃስ”#ምልክ 1:2. ጌተትድ ፃፈትስ።
14ያትን፥ ኑኒ ዎይጋኔ? ፆሳይ አሰ አሳፐ ሻክዬ? ግደና። 15ጎዳይ ሙሰኮ፥
“ታ ማራናዉ ኮይዳይሳታ ማራና፤
ታ ቃታናዉ ኮይዳይሳታስ ቃታና”#ከሳ 33:19. ያግስ።
16ህዛ፥ ፆሳ ዶሮይ አሳ ሸነን ዎይኮ ኦሶን ግዶናሽን እያ ማሮተና።
17ጌሻ ማፃፋን፥ ግብፀ ካዋኮ፥ “ታኒ፥ ታ ዎልቃ ነናን በሳናዉነ ታ ሱንይ አላመ ኡባን ኤረታና መላ ሄሳስ ነና ካዎስ”#ከሳ 9:16. ጌተትድ ፃፈትስ። 18ህዛ፥ ፆሳይ ማራናዉ ኮየይሳ ማሬስ፤ ዎዛና ሙምሳናዉ ኮየይሳ ዎዛና ሙምሴስ።
ፆሳ ሀንቆነ ማሮተ
19ህንተፈ እሶይ፥ “ያትን፥ ፆሳይ አሰ ኢታ ኦሶ ግሾ አይስ ቦሪ? ፆሳ ሸንያ እፃስ ጋናይ ኦኔ?” ያግድ ኦይቻናዉ ዳንዳኤስ።
20ሽን ታ እሻዉ፥ ፆሳራ ፓላማናዉ ኔኒ ኦኔ? ኡርቃፈ መትዳ ሚሸይ ባና መዳይሳ፥ “ታና ሀይሳዳ ኦዳ አይስ መዲ?”#እሳ 29:16፤ 45:9. ግድ ኦይቻናዉ ዳንዳኢ? 21ዎይኮ ኡርቃ መይስ እስ ኡርቃፈ እሱዋ ቦንቾ ሚሸ፥ ሀንኩዋ ቃስ ቶሸ ሚሸ ኦድ መናዉ ማት ባዌ?
22ፆሳይ ባ ሀንቁዋ በሳናዉነ ባ ዎልቃ ኤርሳናዉ ኮይድ፥ ፕርዳስ ጊግዳ ሀንቆ ናይታ ዳሮ ገንጫን ዳንዳእዳኮ ነ አይ ኤራይ? 23ሄሳ እ ኦዳይ ኮይሮትድ ቦንቾስ ጊግስዳ፥ ባ ዶርዳ ናይታስ ባ ቦንቹዋ ቆንጭሳናሳ። 24አይሁደ ግድን፥ ዎይኮ አይሁደ ግዶና አሳ ኡባይ ፆሳን ዶረትዳ።
25ናብያ ሆሰ ማፃፋን፥
“ታ አሰ ግዶናይሳታ፥ ‘ታ አሰ’ ጋዳ ፄጋና።
ታ ሲቃቦና ደርያ፥ ‘ሲቀትዳይሳታ’ ጋዳ ፄጋና።#ሆሰ 2:23.
26ኤንቲ፥ ‘ታ አሰ ግደከታ’ ጌተትድ ፄገትዳ በሳን፥
‘ደኦ ፆሳ ናይታ’ ጌተትድ ፄገታና”#ሆሰ 1:10. ያጌስ።
27ናብያ እሳያስ እስራኤለ አሳባ፥
“እስራኤለ አሳይ አባ ጋፃን ደእያ ሻፈዳ ዳርኮካ፥
ኤንታፈ ጉ አሳ ፃላል አታና።#እሳ 10:22-23.
28ጎዳይ አላምያ ኡባ ቦላ ኤለስድ ፖሎ ፕርዳ ፕርዳና።”
29ቃስካ እሳያስ፥
“ኡባፈ ዎልቃማ ጎዳይ ኑስ ጉ ኮቸ አሾናባ ግድያኮ፥
ኑኒ ሶዶመነ ጋሞራ ካታማዳ ያናሽን”#እሳ 1:9.
ያግድ ኮይሮትድ ኦድስ።
30ያትን፥ ኑ ዎይጋኔ? ፅሎተ ኮይቦና አይሁደ ግዶና አሳይ አማኖን ፅሎተ ደምዶሶና። 31ሽን ፅሎተኮ ጋያ ህገይ ደእያ እስራኤለ አሳይ ፅሎተ ደምቦኮና። 32አይስ ደምቦኮና? ኤንቲ ፅሎተ አማኖን ግዶናሽን፥ ኦሶን ኤካናዉ ኮይዳ ግሾሳ። ያንያ ግሾ፥ ኤንቲ፥ “ብያ ሹቻን” በትዶሶና። 33ጌሻ ማፃፋን፥
“ታኒ ፅዮነን ቢ ኩንድስያ ሹቻ ዎና።
እያን አማንያ ኦንካ ዬላተና”#እሳ 28:16.
ጌተትድ ፃፈትስ።
Currently Selected:
ሮመ 9: GFBEVF
Highlight
Share
Copy
Want to have your highlights saved across all your devices? Sign up or sign in
The Word for the World International and The Word for the World Ethiopia
