ሮመ 4

አብራሃመይ አማኖን ፅልስ

1ያትን፥ ኑ ማይዛይ አብራሃመይ አይ ደምዴ? 2አብራሃመይ ኦሶን ፅልዳባ ግድያኮ፥ እ ጬቀትያባይ ደኤስ፥ ግዶሽን፥ ፆሳ ስንን ጬቀታናዉ ዳንዳኤና። 3ጌሻ ማፃፋይ፥ “አብራሃመይ ፆሳ አማንስ፤ ፆሳይ ሄሳ እያዉ ፅሎተ ኦድ ኤክስ” ያጌስ።#መ 15:6፤ ጋላ 3:6.

4ኦያ ኡራይ ኤክያ ዳሞዘይ፥ እያ ኦሶ ዎልቃስ ጭገትያ ጋተፐ አትሽን፥ እያዉ እሞታ ግደና። 5ሽን ኦሶ ኦና ኦንካ ናጋራንቹዋ ፅልስያ ፆሳ አማንኮ፥ እያ አማኖይ እያዉ ፅሎተ ግድድ ታይበቴስ። 6ጌሻ ማፃፋን ዳዊቲ፥ ኦሶይ ባይና ፆሳይ ፅልስያ አሳት አይ መላ አንጀትዳኮ ሀይሳዳ ያግድ ቆንጭሴስ፦

7“ኤንታ ባላይ አቶ ጌተትዳይሳትነ

ኤንታ ናጋራይ ካመትዳይሳት አንጀትዳይሳታ።#ማዝ 32:1-2.

8ጎዳይ እያ ናጋራ ታይቦና አስ አንጀትዳይሳ” ያጌስ።

9ያትን፥ ዳዊቲ ኦድዳ አንጆይ ቃፃረትዳ አሳ ፃላላሰዬ? ዎይኮ ቃፃረትቦና አሳሴ? ኑኒ፥ “ጌሻ ማፃፋይ፥ ‘አብራሃመይ ፆሳ አማንስ፤ ፆሳይ ሄሳ እያዉ ፅሎተ ኦድ ኤክስ’ ያጌስ” ግዳ። 10ያትን፥ ሄስ አዉደ ሀንዴ? አብራሃመይ ቃፃረትነዬ? ዎይኮ ቃፃረቶና ደእሽኔ? ቃፃረታናፐ ስን ሀንስፐ አትሽን፥ ጉየ ግደና።

11አብራሃመይ ቃፃረታናፐ ስን እያ አማኖይ እያዉ ፅሎተ ግድድ ታይበትዳይሳ ኤርሳናዉ፥ እያ ቃፃሮይ ማላታ ግድስ። ሄሳ ግሾ፥ አብራሃመይ ቃፃረቶና አማነይሳታስነ አማኖን ፅለይሳታ ኡባስ አዋ ግድስ።#መ 17:10. 12እ ቃፃረትዳይሳታስካ አዋ። አብራሃመይ ኤንታዉ አዋ ግድዳይ ኤንቲ ቃፃረትዳ ግሾ፥ ፃላላስ ግዶናሽን፥ እ ቃፃረታናፐ ስን አማንዳ አማኑዋ ኤንቲ ካልዳ ግሾሳ።

13አብራሃመስነ እያ ሼሻስ፥ “አላምያ ታ ህንተዉ እማና” ያግዳ ኡፋይሳይ፥ አብራሃመይ አማኖን ፅልዳ ግሾሳፈ አትሽን፥ ህገ ናግድ ፖልዳ ግሾ ግደና።#መ 17:4-6፤ 22:17-18፤ ጋላ 3:29. 14ህገስ ኪተትዳይሳት ፆሳይ እማና ግዳ ኡፋይሳ ላተይሳታ ግድኮ፥ አሳ አማኖይ ማደና፤ ፆሳ ኡፋይሳይ ሀዳ ግድስ።#ጋላ 3:18. 15ህገ መንይ ፆሳ ሀንቆ ኤሄስ፥ ሽን ህገይ ባይናሶን ህገ መንይ ባዋ።

16ሄሳ ግሾ፥ ፆሳይ እምዳ ኡፋይሳይ አማኖን ኤከቴስ። ሀ ኡፋይሳይ አብራሃመ ሼሻ ኡባስ ፆሳ አ ኬሀተ ባጋራ እመትዳይሳ ቆንጭሴስ። ሄስካ ህገ ናገይሳታ ፃላላስ ግዶናሽን፥ አብራሃመዳ አማንዳ ኡባሳ። አብራሃመይ ኑ ኡባስ አዋ።#ጋላ 3:7. 17ጌሻ ማፃፋን፥ “ታ ነና ዳሮ ካዎተታስ አዋ ኦስ” ጌተትድ አብራሃመ ግሾ፥ ፃፈትስ። ሀ ኡፋይሳይ አብራሃመስ እመትዳይ ሀይቅዳይሳታስ ደኦ እመይስነ ኦራባ ኦያ ፆሳይ እያ ግደይሳ እ አማንዳ ግሾሳ።#መ 17:5.

18ፆሳይ አብራሃመስ ዳሮ ኮቸ እማናይሳ ጫቅስ። ኡፋይስ ኦናዉ አይኮካ ዳንዳኤቶና ዎደ አብራሃመይ ፆሳን አማንዳ ግሾነ ኡፋይስ ኦዳ ግሾ፥ ዳሮ ካዎተታስ አዋ ግድስ።#መ 15:5. 19አብራሃመስ ፄቱ ላይ ኩማና ሀንኮካ፥ ባ ዳቡርዳ አሳተነ ሳራ ናአ የላናዉ ዳንዳኦናይሳ ኤርሸ ባ አማኑዋን ዳቡርቤና።#መ 17:17.

20ግዶሽን፥ እ ባ አማኑዋን ምንድ ፆሳስ ቦንቾ እሚስፐ አትሽን፥ ፆሳይ እምዳ ኡፋይሳ አማኖና እፅድ፥ ስቤና። 21አብራሃመይ፥ ፆሳይ ጫቅዳ ጫቁዋ ፖላናይሳ ባ ኩመ ዎዛናን አማንስ። 22ሄሳ ግሾ፥ ፆሳይ እያ አማኑዋ ፅሎተን ታይብስ።

23ሽን፥ “እያዉ ፅሎተን ታይብስ” ግያ ቃላይ አብራሃመ ፃላላስ ፃፈትቤና። 24ሄ ቃላይ ኑ ጎዳ የሱሳ ሀይቆፐ ደንዳ ፆሳ አማንያ ኑስካ ኑ አማኖይ ፅሎተን ታይበታና መላ ፃፈትስ። 25ፆሳይ እያ ኑ ናጋራ ግሾ፥ ሀይቆስ አድ እሚስ፤ እ ኑና ፅልሳናዉ ሀይቆፐ ደንድስ።#እሳ 53:4-5.

Currently Selected:

ሮመ 4: GFBEVF

Highlight

Copy