ሮመ 3

አይሁደታ አማኖ እፆ

1ያትን፥ አይሁደ ግዶን አይ ዱማተ ደኢ? ዎይኮ ቃፃረተን አይ ማደይ ደኢ? 2ቱማካ አይሁደ ግዶይ ዳሮ ኦገራ ማዴስ። ኡባፈ ስን ፆሳይ ባ ቃላ ሀዳራ አይሁደታስ እሚስ።

3ያትን፥ ኤንታፈ እሶት እሶት ቃላ አማኖና እፅኮ፥ ኤንታ እፆይ ፆሳ አማነተ ድግዬ? 4ድገና! አሳ ኡባይ ዎርዳንቾ ግድኮካ ፆሳይ ቱማ ግዶ። ጌሻ ማፃፋን፥

“ነ ቃላን ነ ፅላሳ፤

ነና ሞተይሳ ፕርዳን ላሳ”

ጌተትድ ፃፈትስ።#ማዝ 51:4.

5ያትን፥ ኑ ናጋራይ ፆሳይ ፅሎ ግደይሳ በሲያባ ግድኮ፥ ኑ ዎይጋኔ? ፆሳይ ኑ ናጋራ ግሾ፥ ኑ ቦላ ፕርድኮ፥ ልከ ግደነዬ? ሀይሳ ታኒ አሳ ቆፋ ጋይስ። 6ሄስ ኡባራካ ሀነና። ሄሳዳ ሀንኮ፥ ፆሳይ ሀ አላምያ ቦላ ዋት ፕርዳኔ?

7ሽን ታ ዎርዶተይ ፆሳ ቱማ ቆንጭስድ፥ እያ ቦንቹዋ ዳርስ በሲያባ ግድኮ፥ ያትን፥ አይስ ታ ቦላ ናጋራንቾዳ ፕርዴቲ? 8እስ እስ አሳይ፥ “ሎኦይ ያና መላ ኢታ ኦስ” ያግድ ታማርስያዳ ኦድ ታና ሞቶሶና። ሄሳ መላ አሳ ቦላ ያ ፆሳ ፕርዳይ ልከ።

አስ ኡባይ ናጋራንቾ

9ያትን፥ ኑኒ ዎይጋኔ? ኑ አይሁደት፥ አይሁደ ግዶናይሳታፐ አናዬ? ግደና! አይሁደ ግድን፥ አይሁደ ግዶና እፅን ኡባይ ናጋራንቾ ግደይሳ ታኒ ካሰታዳ ህንተዉ ኦዳስ።

10ጌሻ ማፃፋን፥

“ፅሎ አስ እሶይካ ባዋ።#ማዝ 14:1-3፤ 53:1-3.

11አኬክያ አስ ባዋ፥

ፆሳ ኮይያ ኦንካ ባዋ።

12አሳ ኡባይ ፆሳስ ዞኮ ዛርዶሶና፤

ኡባይ እስፈ ፓናባ ግድዶሶና።

ሎኦ ኦያ ኦንካ ባዋ፤

እስ አስካ ባዋ።

13ኤንታ ዶናፐ ከይያ ቃላይ፥

ዶየትዳ ዱፎፐ ከይያ ፅንቆ መላ፤

ባንታ እንፃርሳን ጭሞሶና።

ኤንታ ዶናፐ አሰ ዎያ፥

ሾሻ ማርዘይ ከዬስ።#ማዝ 5:9፤ 140:3.

14ኤንታ ዶናን ጫሞ ኦዳይነ ባደ ኩምስ።#ማዝ 10:7.

15ኤንቲ ሱ ጉሳናዉ ኤለሶሶና።#እሳ 59:7-8.

16ኤንታ ኦግያን ዮይነ ቆሆይ ደኤስ።

17ኤንቲ ሳሮተ ኦግያ ኤሮኮና።

18ባንታ ደኡዋን ፆሳስ ያዮኮና”

ጌተትድ ፃፈትስ።#ማዝ 36:1.

19አሰ ኡባ ዶና ኦይናዉነ ኩመ አላምያ ፆሳ ፕርዳፈ ጋርሳን ሺሻናዉ፥ ህገይ እመትዳይ ህገፈ ጋርሳን አቀይሳታስ ግደይሳ ኑ ኤሮስ። 20ሄሳ ግሾ፥ ኦንካ ህገስ ኪተትድ ፆሳ ስንን ፅላናዉ ዳንዳኤና። ህገይ አስ ኡባይ ናጋራንቾ ግደይሳ በሴስ።#ማዝ 143:2፤ ጋላ 2:16.

ፅሎተ አማኖና

21ሽን ሀእ ፆሳይ አስ ህገይ ባይናሽን ፅልያ ኦገ ቆንጭስስ። ሄ ኦግያ ሙሰ ህገይነ ናበት ማርካትዶሶና። 22ሀ ፅሎተ፥ ፆሳይ የሱስ ክርስቶሳ ባጋራ አሳ ኡባስ ሻኮይ ባይና እሜስ።

23አሳ ኡባይ ናጋራ ኦዶሶና፤ ፆሳይ ኤንታዉ እምዳ ቦንቹዋፈ ሃክድ አትዶሶና። 24ሽን ኤንቲ ፆሳ አ ኬሀተን፥ ዎዝያ ክርስቶስ የሱሳ ባጋራ ጮ ፅልዶሶና። 25ፆሳይ የሱስ ክርስቶሳ ያርሾ ኦድ እምዳይ፥ እያ አማንያ ኡባይ እያ ሱን ናጋራ አቶተ ደማና መላሳ። ፆሳይ ሄሳ ኦዳይ ባ ዳንዳአን ካሰ ናጋራ ታይቦና አግድ፥ ባ ፅሎተ በሳናሳ። 26ሀእ ዎድያን የሱሳ አማንያ ኡባ ፅልስድ፥ ፆሳይ ባ ሁጰን ፅሎ ግደይሳ በሴስ።

27ያትን፥ ኑ ጬቀትያባይ አይብ ደኢ? አይብካ ባዋ። ኑኒ ጬቀተይ ህገስ ኪተትያ ግሾዬ? አካይ! አማኖ ግሾሳ። 28ፆሳይ አሰ ፅልሰይ አማኖናፐ አትሽን፥ ህገስ ኪተተን ግዶናይሳ ኑ አኬኮስ።

29ዎይኮ ፆሳይ አይሁደታ ፃላላ ፆሰዬ? አይሁደ ግዶናይሳታስ ፆሰ ግደነዬ? ቱማ፥ አይሁደ ግዶናይሳታስካ እ ፆሰ። 30ፆሳይ እሶ፤ አይሁደታነ አይሁደ ግዶናይሳታ አማኖን ፅልሰይ እያ።#ዛረ 6:4፤ ጋላ 3:20. 31ያትን፥ ኑኒ ህግያ አማኖ ግሾ ሻሮስ ጉሰዬ? ግደና! ህግያ ምንስፐ አትሽን።

Currently Selected:

ሮመ 3: GFBEVF

Highlight

Copy