ሮመ 10
10
1ታ እሻቶ፥ ታ ኩመ ዎዛናን ታ አሞተይነ ፆሰ ዎሰይ እስራኤለይ አታና መላሳ። 2ኤንቲ ፆሳስ ምሸቶሶናሽን፥ ቱማ ኤራተን ምሸቶናይሳ ታ ማርካታይስ። 3ኤንቲ ፆሳ ፅሎተ ኦግያ ኤሮና እፅድ፥ ባንታ ሁጰ ፅሎተ ካልዶሶናፐ አትሽን፥ ፆሳ ፅሎተ ኮይቦኮና። 4አስ ኡባይ አማኖን ፅላና መላ ክርስቶስ ህግያ ፖልስ።
አቶተ ኡባሳ
5አስ ህገ ናግድ ኤክያ ፅሎተባ ሙሰይ ፃፍሸ፥ “ህገ ናግያ ኦንካ ሄ ህግያ ናግዳ መላ ደኤስ”#ሌወ 18:5. ያግስ። 6ሽን አማኖን ኤክያ ፅሎተባ ጌተትዳይ ሀይሳ፦ “ነ ዎዛናን፥ ‘ኦን ሳሎ ከያኔ?’ ያጎፓ፤ ሄስ ክርስቶሳ ዎሳናሳ።#ዛረ 30:12-14. 7ዎይኮ፥ ‘ዱገ ሳአ ጋርስ ዎናይ ኦኔ?’ ጎፓ፤ ሄስ ክርስቶሳ ዱፎፐ ከሳናሳ። 8ሽን ያግድ ፃፈትስ፦ ‘ፆሳ ቃላይ ነ ማታና፤ ነ ዶናንነ ነ ዎዛናን ደኤስ’ ኑኒ ህንተዉ ኦድያ አማኖ ቃላይ ሀይሳ።
9“የሱሲ ጎዳ” ጋዳ ነ ዶናን ማርካትኮነ ፆሳይ እያ ሀይቆፐ ደንዳይሳ ነ ዎዛናን አማንኮ፥ ነ አታና። 10አስ ባ ዎዛናን አማንድ ፅሌስ፤ ባ ዶናን ማርካትድ አቴስ። 11ጌሻ ማፃፋይ፥ “እያን አማንያ ኦንካ ዬላተና”#እሳ 28:16. ያጌስ። 12እስ ፆሳይ ኡባ ጎዳ ግድያ ግሾ፥ አይሁደታ ግዶንነ አይሁደ ግዶና አሳ ግዶን ዱማተ ባዋ። እ ባና ፄግያ ኡባስ ዳሮ ኬሀ። 13ጌሻ ማፃፋይ፥ “ጎዳ ሱን ፄግያ ኦንካ አታና”#እዩ 2:32. ያጌስ።
14ያትን፥ ኤንቲ አማኖና ደእሸ ዋንድ እያ ፄጋናዉ ዳንዳኦና? ኤንቲ እያባ ስኦና ደእሸ ዋትድ እያ አማናናዉ ዳንዳኦና? ቃስ ኤንታዉ ቃላ ኦድያ አስ ባይና ደእሽን፥ ዋንድ ስአናዉ ዳንዳኦና? 15ኪተትዳ አስ ባይና ደእሽን፥ ቃላይ ዋንድ ኦደታናዉ ዳንዳኢ? ጌሻ ማፃፋን፥ “ኡፋይሳ ዎንገላ ኦድያ አሳ ቶሆት ዋንድ ሎኦና!”#እሳ 52:7. ያግድ ፃፈትስ።
16ሽን እሳያስ፥ “ጎዳዉ፥ ኑ ማርካተ ኦን አማንዴ?”#እሳ 53:1. ያግዳይሳዳ፥ ኡባይ ዎንገላ አማንቦኮና። 17ሄሳ ግሾ፥ አማኖይ ስሳፈ ዬስ፤ ስስ ክርስቶሳ ቃላፐ ዬስ።
18ግዶሽን፥ እስራኤለ አሳይ ቃላ ስእቦኮና ጉሰዬ? አካይ፥ ስእዶሶና። ጌሻ ማፃፋን፥
“ኤንታ ቃላይ ቢታ ኡባን ስኤትስ፥
ኤንታ ኦዳይ ሳኣ ጋፃ ጋክስ”#ማዝ 19:4.
ያገትስ። 19ሽን እስራኤለ አሳይ ኤርቦኮና ጉሰዬ? ሙሰይ ካሰ፥
“ታኒ ህንተና ለቀትዳ አሳን ቂሮይሳና፤
ቃስ ኤያ አሳን ህንተና ይሎያና”#ዛረ 32:21. ያግስ።
20ቃስ እሳያስ፥
“ታና ኮይቦና አሳስ በንታስ፤
ታና ኦይችቦና አሳስ ቆንጫስ”#እሳ 65:1.
ያግድ ያዮና ኦድስ።
21ሽን እሳያስ እስራኤለታባ ኦድሸ፥
“ኡባ ጋላስ ኪተቶና አሳስነ
ታና እፅያ አሳስ ታ ኩሽያ ምጫስ”#እሳ 65:2. ያጌስ።
Currently Selected:
ሮመ 10: GFBEVF
Highlight
Share
Copy
Want to have your highlights saved across all your devices? Sign up or sign in
The Word for the World International and The Word for the World Ethiopia
