Марк 13
13
1Вежа Керкусис петӧм коста ӧтік велӧтчись Исусыслӧ шуис: «Велӧтісь, видзӧт, кытшӧмӧсь иззэс да кытшӧмӧсь керкуэс!» 2Исусыс сылӧ висьталіс: «Адззан этнӧ ыджыт керкуэсӧ? Нійӧ быдӧс разясӧ, эстӧн из вылын из оз кольччы».
3Виягӧд керӧс вылын Вежа Керкулӧ паныт пукалікӧ Петра, Яков, Иоан да Ӧндрей юалісӧ Исусыслісь: 4«Висьтав миянлӧ, кӧр эта быдӧс лоас? Мый сьӧрті позьӧ тӧдны сійӧ кадсӧ?»
5Исусыс нылӧ пондіс баитны: «Видзӧтӧ, медбы тіянӧс некин эз ылӧт. 6Уна локтасӧ Менам нимӧн да шуасӧ, сія пӧ Ме, да унаӧс ылӧтасӧ. 7Тійӧ кылат тышкасьӧммез йылісь, уналаись кывсяс тышкасьӧмыс. Сэк тійӧ эд повзьӧ. Сідз и колӧ лоны. Но сія абу на векпон#13:7 векпон ─ конец века. 8Отир отир вылӧ лэбтісяс, ӧксу ─ ӧксу вылӧ. Уналаын пондасӧ тшыгьявны. Уналаын муыс пондас зэгавны. Отирыс лоасӧ кыдз ӧшӧмӧсь. А эта эд дзир кага вайисьлӧн зубытыс пондӧтчӧ.
9Тійӧ видзӧтӧ ас сьӧраныт. Тіянӧс пондасӧ вайӧтны судитаніннэзӧ, синагогаэзын тіянӧс пондасӧ вартлыны. Тіянӧс Ме понда сувтӧтасӧ юраліссез да ӧксуэз одзӧ, медбы тійӧ висьтасит нылӧ Ме йылісь. 10Но сія кадӧдз колӧ Бур Юӧрсӧ висьтасьны быд отирпӧлӧслӧ. 11Кӧр тіянӧс вайӧтасӧ судитанінӧ, одзлань эд тӧждісьӧ, юраныт эд видзӧ, мый пондат баитны. Сія кадӧ тіянлӧ лоас сетӧм, мый висьтавны. Сэк тійӧ одӧ пондӧ баитны асьныт, тіян пытшкын пондас баитны Вежа Лолыс.
12Вон ассис вонсӧ сетас вийны, ай ─ ассис челядьсӧ. Челядь лэбтісясӧ ай-мамныс вылӧ да нійӧ виясӧ. 13Ме понда тійӧ син вылӧ одӧ пондӧ ковны быдӧнныслӧ. Кин медбӧрӧдз вермас видзсьыны, сія мезмас».
Сьӧкыт кад йылісь
(Мт. 24:15-28; Лк. 21:20-24)
14«Этія йылісь гижӧм Енсянь юӧртісь Даниил: ─ Лыддьӧтісьыс ась вежӧртӧ! ─ Тійӧ казялат сэрпӧсьтӧмсӧ сэтісь, кытӧн сылӧ оз туй лоны. Сія сэрпӧсьтӧмыс вайӧтас разьсьӧм-киссьӧмӧдз. Сэк Иудеяын оліссез ась пышшӧны керӧссэзӧ. 15Кин лоас керку вылын, ась оз лэдзчы мыйкӧ босьтны керкусис. 16Кин лоас ыб вылын, ась оз берт босьтны ассис паськӧмсӧ. 17Нія луннэзӧ ӧддьӧн сьӧкыт лоас новйӧтчись да нимӧтчись инькаэзлӧ! 18Кеймӧ, медбы эз ковсьы пышшыны тӧлӧн. 19Сэк лоас ӧддьӧн сьӧкыт. Быдӧс аркмӧтӧмсянь ӧнӧдз сэтшӧмыс эз на вӧв да сэсся оз ни ло. 20Дӧсвидзисьыс оз кӧ джендӧт сійӧ кадсӧ, то ӧтік ловья морт оз кольччы. Но Аслас бӧрйӧммез понда сійӧ кадсӧ Еныс джендӧтас.
21Висьталасӧ кӧ тіянлӧ: "Кристосыс татӧн", шуасӧ: "Кристосыс сэтӧн", эдӧ веритӧ. 22Сэк локтасӧ отир, кӧдна асьнысӧ пондасӧ пуктыны Кристосӧ да Енсянь юӧртіссезӧ. Нія ыджыт пассэз да адззывлытӧммез пондасӧ керны, медбы и бӧрйӧммесӧ ылӧтны, вермасӧ кӧ. 23Видзӧтӧ, Ме тіянлӧ одзланься лоӧмсӧ висьталі».
Морт Зонлӧн локтӧм
(Мт. 24:29-44; Лк. 21:25-36)
24«Ӧддьӧн сьӧкыт луннэз бӧрын сэтӧн жӧ шондіыс пемдас. Тӧлісьыс кусас, 25енӧжсис кӧдзуввес#13:25 кӧдзув ─ звезда усяласӧ, енӧжись выннэс зэгаласӧ. 26Сэк казяласӧ кымӧррез вылӧт ыджыт вынӧн да югьялӧмӧн Морт Зонлісь локтӧмсӧ. 27Сія иньдас Ассис ангеллэсӧ му вылас нёльнан ладорӧ. Нія ӧктасӧ Сылісь бӧрйӧммесӧ енӧж увтсис ӧт дорсянь мӧд дорӧдззас».
28Инжир пусянь велӧтчӧ. Сы уввез вылӧ видзӧттӧн тійӧ адззат: гаррез#13:28 гар ─ почка потӧны, мыччисьӧны листтэз. Сэк тійӧ тӧдат, гожумыс матын ни. 29Сідзкӧ, кӧр тійӧ казялат Менам кыввез сьӧрті керсьӧмсӧ, тӧдӧ: сія кадыс матын ни, ыбӧс дорас. 30Быльсӧ тіянлӧ висьтала: быдӧс лоас ӧння кадӧ оліссез дырни. 31Муыс енӧжнас ӧшасӧ, а Менам кыввезӧ кольччасӧ вынаӧсь.
Лӧсьӧтчӧмӧн овны тшӧктӧм
(Мт. 24:36-51; Лк. 21:34-36)
32«Этӧ лунсӧ да кадсӧ некин оз тӧд. Озӧ тӧдӧ енӧжын ангеллэс, оз тӧд Зоныс, тӧдӧ ӧтнас Айыс. 33Видзӧтӧ, лоӧ лӧсьӧтчӧмӧсь, кеймӧ, тійӧ эд одӧ тӧдӧ, кӧр локтас сія кадыс. 34Сія кадыс кыдз морт, кӧда петӧ туйӧ, ассис керкусӧ кольӧ раббез киӧ. Быдыслӧ сетӧ удж, а ыбӧс сьӧрын видзӧтісьлӧ оз тшӧкты и син куньны. 35Сідзкӧ, лоӧ лӧсьӧтчӧмӧсь! Тійӧ эд одӧ тӧдӧ, кӧр локтас кӧзяиныс: рытнас, ойшӧрнас, петук китсасикӧ али югдандорӧ. 36Видзчисьтӧг локтӧм коста ась оз адззы тіянӧс узиссезӧн! 37Мый тіянлӧ баита, сійӧ и быдӧнныслӧ висьтала: лоӧ лӧсьӧтчӧмӧсь!»
Исусӧс вийны баитчӧм
(Мт. 26:1-5; Лк. 22:1-2; Ин. 11:45-53)
Currently Selected:
Марк 13: БЮ19
Highlight
Share
Copy
Want to have your highlights saved across all your devices? Sign up or sign in
