Марк 14
14
1Ыджыт лунӧдз да Шӧмтӧм нянь сёян луннэзӧдз кольччис кык лун. Аркирейес да Туйдӧтӧ велӧтіссес кошшӧмась, кыдз ылӧтлӧмӧн кутны Исуссӧ да вийны. 2Нія баитчӧмась: «Вежалуныс#14:2 вежалун ─ праздник коста оз ков кутны, отирыс вермасӧ лэбтісьны миян вылӧ».
Исусӧс нард виӧн мавтӧм
(Мт. 26:6-13; Ин. 12:1-8)
3Исусыс вӧлі Вифанияын, проказаись веськӧтӧм Симон ордын. Сёйӧмныс коста сэтчӧ локтіс инька. Сія алебастр дозын вайис дона сӧстӧм нард#14:3 нард ─ быдмас, кӧдаись керӧны чӧскыт руа дона ви ви. Сія жугдіс дозсӧ да кисьтіс висӧ Исус юр вылӧ. 4Сэтшӧмсӧ казялӧмсянь мукӧд велӧтчиссес лӧгасисӧ. Нія шуисӧ: «Мыйлӧ вӧлі весь видзны сэтшӧм дона висӧ? 5Позис эд сійӧ вузавны куимсёся унажык динарий#14:5 куимсёся унажык динарий ─ уджалісьлӧн ӧтік воӧ шедтӧм сьӧм вылӧ да сетавны кориссезлӧ». Нія инькасӧ видісӧ.
6Исусыс висьталіс: «Мый тійӧ инькасӧ ӧштӧтат? Сійӧ эд видӧ. Сія Меным бурӧ керис. 7Кориссес пыр тіянкӧт, кӧр тіянлӧ позьӧ, вермат нылӧ отсавны. А Ме тіянкӧт пыр ог ло. 8Инькаыс керис, мый вермис: сія вывтырӧс мавтіс Менӧ дзебик кежӧ. 9Ме тіянлӧ быльсӧ висьтала: муыс пасьта, кытӧн пондасӧ висьтасьны Бур Юӧрсӧ, сэтчин инькасӧ касьтыласӧ, сылісь керӧмсӧ висьтасясӧ».
Исусӧс вузалӧм
(Мт. 26:14-16; Лк. 22:3-6)
10Искариот Иуда вӧлі даскык велӧтчись коласісь. Сія мунӧм аркирейес дынӧ, медбы вузавны нылӧ Исуссӧ. 11Кылӧмыссянь нія гажмӧмась. Иудаыслӧ кӧсйӧмась сетны эзысь сьӧм. Сэксянь Иудаыс пондӧм видзӧтчыны, кӧр лоас буржык вузавны Исуссӧ.
Ыджыт лунся сёйӧм
(Мт. 26:17-30; Лк. 22:7-23; Ин. 13:21-30; 1. Кор. 11:23-25)
12Шӧмтӧм нянь сёян медодзза лунӧ, кӧр начкылӧны Ыджыт лунся дзельӧс, велӧтчиссес юалісӧ Исуслісь: «Кытӧн мӧдан сёйны Ыджыт лунся дзельсӧ? Мийӧ мунам да лӧсьӧтам». 13Исусыс ыстіс кык велӧтчисьӧс да висьталіс: «Мунӧ карас, тіянлӧ пантасяс гырничын ва нуӧтісь морт. Тійӧ мунӧ сы бӧрсянь. 14Керкуас, кытчӧ сія пырас, сэтісь кӧзяиныслісь юалӧ: "Велӧтісьным юалӧ: кӧда жырын Ме Аслам велӧтчиссезкӧт верма сёйны Ыджыт лунся дзельсӧ?" 15Сія мыччалас тіянлӧ ыджыт вылісь жыр, сія лӧсьӧтӧм ни. Сэтчин и лӧсьӧтӧ Ыджыт лунся сёянсӧ». 16Велӧтчиссес мунісӧ карас. Сэтчин былись быдӧс лоис сідз, кыдз висьталіс нылӧ Исусыс. Нія лӧсьӧтісӧ Ыджыт лунся сёянсӧ.
17Рытнас Исусыс даскык велӧтчиськӧт локтіс керкуас. 18Нія пукалісӧ да сёйисӧ. Сэк Исусыс шуис: «Ме тіянлӧ быльсӧ висьтала: ӧтік тіян коласісь, кӧда ӧтлаын Мекӧт сёйӧ, вузалас Менӧ». 19Нія пондісӧ тӧждісьны да сьӧрсьӧн-бӧрсьӧн Сылісь юасисӧ: «Ог я ме?» 20Сія нылӧ висьталіс: «Даскыкыс коласісь ӧтік, кӧда тюкӧ Мекӧт ӧтік бекӧрись. 21Морт Зонкӧт сідз и лоас, кыдз Сы йылісь висьталӧм Вежа Гижӧттэзын. Но ӧддьӧн умӧль лоас Морт Зонсӧ вузалісь мортлӧ! Буржык бы сылӧ вӧлі, эз кӧ чуж бы».
Дари дорын#14:22 дари дорын ─ на причастии
(Мт. 26:26-29; Лк. 22:15-20; 1. Кор. 11:23-25)
22Сёйтӧнняс Исусыс босьтіс нянь, бласлӧвитіс, чегӧтіс, сетіс сійӧ велӧтчиссеслӧ да шуис: «Босьтӧ, сёйӧ, эта Менам Вывтырӧ». 23Сэсся босьтіс юан доз, буркывтіс да сетіс нылӧ. Сэтісь юисӧ быдӧнныс. 24Исусыс нылӧ висьталіс: «Эта Менам Вирӧ, Виль Йитӧтлӧн Вир, уна отир понда киссьӧ. 25Ме тіянлӧ быльсӧ висьтала: Енлӧн Юраланінын виль юансӧ ютӧдз виноградсис юансӧ ог ни понды юны».
Суськисьӧм йылісь Петралӧ висьталӧм
(Мт. 26:31-35; Лк. 22:31-34; Ин. 13:36-38)
26Енсӧ сьылӧтӧм бӧрын нія мунісӧ Виягӧд керӧсӧ. 27Исусыс шуис нылӧ: «Талуння ойӧ тійӧ быдӧнныт Менӧ колят. Вежа Гижӧтас висьталӧм: "Кувтӧдз уськӧта баляэз сьӧрын Видзӧтісьсӧ, и баляэс ӧтмӧдӧрӧ пышшасӧ". 28А Ме ловзьӧм бӧрам муна Галилеяӧ, тіянӧс сэтчин понда видзчисьны». 29Петраыс Сылӧ висьталіс: «Быдӧнныс кӧ Тэнӧ колясӧ, ме ог коль». 30Исусыс сылӧ шуис: «Ме тэныт быльсӧ висьтала: талуння ойӧ, петуклӧн кыкись китсӧвттӧдз, тэ куимись суськисян Менӧ тӧдӧмись». 31Но Петраыс ӧддьӧнжык шувліс: «Кӧть меным ковсяс кувны Тэкӧт, ог суськись». Сідз баитісӧ и мӧд велӧтчиссес.
Исуслӧн Гефсиманияын кеймӧм
(Мт. 26:36-46; Лк. 22:39-46)
32Нія локтісӧ Гефсиманияӧ. Исусыс Аслас велӧтчиссезлӧ висьталіс: «Пукалыштӧ эстӧн, Ме ветла кеймыны». 33Сія сьӧрас босьтіс Петраӧс, Яковӧс да Иоанӧс. Сэтчин Исусыс пондіс ӧддьӧн шогсьыны да тӧждісьны. 34Сія нылӧ висьталіс: «Менам лолӧ кувтӧдз пессьӧ. Олыштӧ эстӧн, эд узьӧ». 35Сія муныштіс одзлань, уськӧтчис му вылас да пондіс кеймисьны: «Айӧ, позьӧ кӧ, ась орддьӧ Менӧ сія кадыс». 36Исусыс шувліс: «Авва#14:36 Авва ─ арамей кылісь кыв, вежӧртӧтӧ: «дона айӧ»., Айӧ! Тэ быдӧс верман. Нуӧт Ме дынісь сійӧ дозсӧ, но ась оз ло Ме сьӧрті, а кыдз Тэныт колӧ».
37Исусыс бертіс велӧтчиссес дынӧ да казяліс, нія вӧлі узьӧны. Сэк Петраыслӧ шуис: «Симон, тэ узян? Тэ эн вермы узьтӧг ӧтік чассӧ олыштны? 38Эд узьӧ, кеймӧ, медбы эд ылалӧ! Мортлӧн лолыс вына, вывтырыс эд вынтӧм».
39Исусыс бӧра муніс да кеймис нія жӧ кыввезӧн. 40Кӧр Сія бертіс велӧтчиссес дынӧ, то казяліс, нія бӧра вӧлі узьӧны. Нылӧн синнэзныс куньсьӧмась, нія эзӧ тӧдӧ, мый Сылӧ висьтавны.
41Исусыс куимӧтісь ветліс да локтіс. Сія шуис нылӧ: «Тійӧ ӧнӧдз узят да шоччисят? Тырмас! Кадыс сибаліс. Морт Зонӧс сетӧны умӧльсӧ кериссез киӧ. 42Чеччӧ, мунамӧ. Менӧ вузалісьыс матын ни».
Исусӧс кутӧм
(Мт. 26:47-56; Лк. 22:47-53; Ин. 18:3-11)
43Исуслӧн баитӧм коста локтіс Иуда. Сія вӧлі даскык велӧтчись коласісь. Сыкӧт ӧтлаын локтӧмась беддезӧн, шыпурттэзӧн#14:43 шыпурт ─ меч уна отир. Нійӧ иньдӧмась аркирейес, Туйдӧтӧ велӧтіссес да бӧрйӧм пӧриссес. 44Исуссӧ вузалісьыс сьӧрас вайӧтӧммеслӧ висьталӧм: «Кӧдӧ ме окышта, Сія Исусыс. Кутӧ Сійӧ, син вылісь эд лэдзӧ да нуӧтӧ». 45Иудаыс веськыта локтіс Исусыс дынӧ да шуис: «Велӧтісь! Велӧтісь!» Сэсся Сійӧ окыштіс. 46Локтӧм йӧзыс уськӧтчисӧ Исусыс вылӧ да кутісӧ Сійӧ. 47Исускӧт сулаліссез коласісь ӧтік кыскис шыпуртсӧ да аркирей раблісь пельсӧ орӧтіс.
48Сэк Исусыс нылӧ висьталіс: «Шыпурттэзӧн да беддезӧн тійӧ петіт кутны Менӧ, кыдз лёк керисьӧс. 49Быд лун Ме вӧлі тіянкӧт Вежа Керкуын да велӧті. Сэк тійӧ Менӧ эдӧ кутӧ. Но ась лоӧ Вежа Гижӧттэс сьӧрті».
50Сэк быдӧнныс колисӧ Исуссӧ да пышшисӧ. 51Ӧтік зонка муніс Исусыс бӧрсянь, куш вывтырыс сылӧн вӧлі каттьыштӧм кытшӧмкӧ вевттьӧсӧн. Сійӧ кутісӧ, 52но зонкаыс нетшкӧвтчис, колис ны киын вевттьӧссӧ да пышшис пасьтӧг.
Исус юраліссез одзын
(Мт. 26:57-68; Лк. 22:54-55,63-71; Ин. 18:12-14,19-24)
53Исуссӧ вайӧтісӧ аркирей дынӧ. Сэтчӧ ӧксьӧмась бӧрйӧм пӧриссес, Туйдӧтӧ велӧтіссес да быдӧс аркирейес. 54Петраыс ылынкодя видзсьӧмӧн муніс Исусыс бӧрсянь аркирейлӧн керку дынӧдз. Сія пырис йӧрас да пуксис шонтісьны би одзӧ ӧтлаын кысъялісь отиркӧт.
55Аркирейес да быдӧс судитан чукӧрныс кошшӧмась мортӧс, кӧда бы мыйкӧ висьталіс Исусыс йылісь умӧльсӧ, медбы вӧлі мог Исуссӧ сетны вийны. Но сэтшӧмсӧ эзӧ адззӧ. 56Уна вовлісӧ Исусыс йылісь весись баитіссес, колана висьталӧмыс тай эз адззись. 57Мукӧдыс сувтӧмӧн висьталісӧ Сы йылісь вӧвлытӧмсӧ: 58«Мийӧ кылім, кыдз Сія баитіс: "Ме разя киӧн керӧм Вежа Керкусӧ и куим лун бӧрті лэбта мӧдікӧ, китӧг керӧмӧ"». 59Но и нылӧн висьталӧммес эзӧ лӧсялӧ.
60Сэк аркирейыс сувтіс шӧрас да юаліс Исусыслісь: «Мыля Тэ шы он сет, кӧр нія Тэ вылӧ умӧльсӧ висьтавлӧны?» 61Но Исусыс чӧліс, сылӧ нем эз висьтав. Аркирейыс бӧра юаліс Сылісь: «Тэ я Кристос-Мездӧтісьыс, Бласлӧвитӧмлӧн Зоныс?» 62Исусыс висьталіс: «Ме. Тійӧ казялат Морт Зонсӧ вына Енкӧт веськыт ладорас Пукалісьӧн, енӧжын кымӧррез вылӧт Локтісьӧн». 63Сэк аркирейыс косяліс ассис паськӧмсӧ да шуис: «Мыйлӧ ни миянлӧ мӧдік висьтавліссес? 64Тійӧ кыліт, кыдз Сія Еныс вылын сералӧ. Мый тійӧ висьталат?» Нія быдӧнныс шуисӧ: «Сійӧ колӧ сетны вийны!»
65Мукӧдыс пондісӧ Исусыс вылӧ сьӧлавны. Вевттисӧ Сылісь чужӧмсӧ, сӧталісӧ да шувлісӧ Сылӧ: «Енсянь Юӧртісь, висьтав, кин сӧтіс». И аркирейлӧн йӧзыс шовкйисӧ Сылӧ рожабаннэзас.
Петралӧн суськисьӧм
(Мт. 26:69-75; Лк. 22:56-62; Ин. 18:15-18,25-27)
66Петраыс вӧлі аркирей йӧрын. Сэтчӧ локтіс аркирейлӧн ӧтік кысъялісь нывка. 67Сія казяліс Петрасӧ би дынас шонтісьӧм коста, видзӧтіс сы вылӧ да шуис: «И тэ вӧлін Назаретісь Исусыскӧт». 68Петраыс суськисис: «Ог тӧд Сійӧ и ог вежӧрт, мый йылісь тэ баитан». Сія петіс ӧтӧрланись йӧрӧ. Сэтӧн китсӧвтіс петук. 69Нывкаыс казялӧм Петрасӧ да бӧра пондіс баитны сэтӧн сулаліссезлӧ, эта мортыс пӧ ны коласісь. 70Петраыс бӧра суськисис. Недыр мыйись сэтӧн сулаліссес бӧра пондісӧ баитны сылӧ: «Тэ и былись ны коласісь, тэ эд Галилеяись». 71Петраыс пондіс кыв сетӧмӧн#14:71 кыв сетны ─ поклясться да Еныс нимӧн суськисьны, ме пӧ ог тӧд Сійӧ Мортсӧ, Кӧда йылісь тійӧ баитат. 72Сэк жӧ мӧдпырся китсӧвтіс петук. Петралӧ тӧдвылас усисӧ Исуслӧн кыввес: «Петуклӧн кыкись китсӧвтӧмӧдз тэ куимись суськисян Менӧ тӧдӧмись». Петраыс пондіс горзыны.
Исус Пилат одзын
(Мт. 27:1-2,11-26; Лк. 23:1-5,13-25; Ин. 18:28-19:16)
Currently Selected:
Марк 14: БЮ19
Highlight
Share
Copy
Want to have your highlights saved across all your devices? Sign up or sign in
