Ап. керӧммез 11

1Апостоллэзлӧ да Иудеяись воннэзлӧ кывсис: и мӧдік отир босьтӧмась пӧ сьӧлӧманыс Еныслісь Кывсӧ. 2Кӧр Петра локтіс Ерусалимӧ, вундыштыштӧм воннэз пондісӧ сійӧ ӧмавны#11:2 ӧмавны ─ упрекать. 3Нія баитісӧ: «Тэ ветлін отир дынӧ, кӧдна абу вундыштыштӧмӧсь да сёйин ныкӧт».

4Петраыс пондіс нылӧ висьтасьны быдӧс, кыдз-мый вӧлі. Сія баитіс: 5«Иоппия карын ме кейми. Сы коста адззылі мыччалӧм. Енӧжсянь лэдзчисис мыйкӧ ыджыт ӧн кодь. Нёль пельӧсӧт видзӧмӧн моз сія лэдзчисис ме дынӧ. 6Ме понді видзӧтны, мый сэтӧн, да казялі му вылісь быдпӧлӧс нёль кока вӧрпаэзӧс, виклясиссезӧс да енӧжись кайезӧс. 7Ме кылі баитан шы. Сія висьталіс меным: "Петра, чеччы, начкыв да сёй!" 8Ме шуи: "Дӧсвидзисьӧ, ме ог понды сёйны! Сэрпӧсьыс да мый абу сӧстӧм, сія некӧр эз шедлы менам ӧмӧ". 9Енӧжсянь мӧдпырись кыліс висьталӧм: "Мый Еныс сӧстӧмтіс, сійӧ эн шу сэрпӧсьӧн". 10Сідз вӧлі куимись. Сэсся бӧр быдӧс лэбтісис енӧжӧ.

11Сы коста куим морт сувтӧмась керку одзас, кытӧн ме вӧлі. Нійӧ вӧлі ыстӧмась ме дынӧ Кесария карсянь. 12Вежа Лолыс тшӧктӧм сьӧрті ме повтӧг муні ныкӧт. Миянкӧт мунісӧ этна квать вонным. Мийӧ локтім менӧ корись морт ордӧ. 13Мортыс миянлӧ висьтасис гортас ангелӧс адззылӧм йылісь. Ангелыс сылӧ висьталӧм Иоппия карӧ ыстыны отирӧс. Сэтчинісь тшӧктӧм корны Симонӧс, мӧднёж кӧ шуны, Петраӧс. 14Петраыс пӧ висьталас тэныт кыввез. Нія кыввезсянь пӧ тэ гортіссеткӧт мезман. 15Кӧр ме понді баитны, ны вылӧ лэдзчисис Вежа Лолыс, кыдз одзжык и миян вылӧ. 16Сэк ме уськӧті тӧдвылам Дӧсвидзисьлісь кыввесӧ. Сія баитліс: "Иоаныс пыртіс ваӧн. А тійӧ пыртчатӧ Вежа Лолӧн". 17Еныс сетіс нылӧ козинсӧ, кыдз и миянлӧ, Дӧсвидзись Кристос Исуслӧ веритіссезлӧ. Сідзкӧ, кин ме сэтшӧмыс? Позьӧ я меным Енсӧ падмӧтны?»

18Петрасӧ кывзӧм бӧрын нія лӧньсисӧ да ошкисӧ Енсӧ. Нія баитісӧ: «Тыдалӧ, и мӧдік отирлӧ Еныс сетіс бергӧтчыны умӧль керӧмныс дынісь Сыланьӧ, медбы и нылӧн вӧлі оланыс».

Антиокияын вичку

19Стефансӧ вийӧм бӧрсянь дзескӧтӧм-вашӧтӧммес рознитчисӧ. Нія локтӧмась Финикияӧдз, Кипрӧдз да Антиокия карӧдз. Нія Ен Кывсӧ висьтасьӧмась дзир иудейезлӧ, мӧдік отирлӧ абу баитӧмась. 20Но ны коласісь мукӧдыс вӧлісӧ Кипрись да Киринеяись. Нія Антиокия карӧ локтӧм бӧрын Дӧсвидзись Исус йылісь Бур Юӧрсӧ висьтасьӧмась и грек отирлӧ. 21Дӧсвидзисьлӧн киыс нійӧ вынсьӧтӧм. Сійӧн ӧддьӧн унаӧн веритӧмась да бергӧтчӧмась Дӧсвидзисьлань.

22Сы йылісь кывсис Ерусалимись веритіссезлӧ. Сэк Варнавасӧ тшӧктісӧ мунны Антиокия карас. 23Сэтчин локтікӧ сія казяліс Енсянь бурсетӧмсӧ. Варнаваыс сысянь гажмис. Сія велӧтіс отирсӧ быдсӧн сьӧлӧмнаныс кутчисьны Дӧсвидзисьлӧ веритӧмас. 24Ачыс Варнаваыс вӧлі бур морт, сія вӧлі тырӧм Вежа Лолӧн да веритӧмӧн. И ӧддьӧн уна отир бергӧтчисӧ Дӧсвидзисьлань.

25Варнаваыс сэсся муніс Тарс карӧ кошшыны Савлсӧ. Сэтчин сійӧ адззис да вайӧтіс Антиокия карас. 26Сэтӧн во гӧгӧр нія ӧксьывлісӧ веритіссескӧт да велӧтісӧ уна отирӧс. Антиокияас велӧтчиссесӧ медодз пондісӧ шуны Кристос отирӧн.

27Сія луннэзӧ Антиокия карас Ерусалимсянь локтісӧ Енсянь юӧртіссез. 28Ны коласісь Агав нима морт чеччис. Лов ӧзйӧтӧмсянь сія юӧртіс, му вылӧ пӧ локтас тшыгьялан кад. Сія тшыгьялӧмыс и лоис Клавдий ӧксулӧн юралӧм коста. 29Сэк велӧтчиссес баитчисӧ Иудеяын олісь воннэзлӧ ыстыны отсӧт. Быдыс сетас, мымда вермас. 30Сідз и керисӧ. Ӧктӧмсӧ ыстісӧ Варнавакӧт да Савлкӧт вичкуын веськӧтліссезлӧ.

Петраӧс пуксьӧтӧм

Currently Selected:

Ап. керӧммез 11: БЮ19

Highlight

Copy