Ап. керӧммез 12

1Сія кадӧ Ирод ӧксу пондіс дзескӧтлыны вичкусис мукӧд отирсӧ. 2Сы тшӧктӧм сьӧрті шыпуртӧн#12:2 шыпурт ─ меч вийисӧ Иоанлісь Яков вонсӧ. 3Иродыс адззис: лёк керӧмыс иудейеслӧ вӧлі сьӧлӧмви. Сэк сія тшӧктіс кутны Петрасӧ. Сія кадӧ вӧлісӧ Шӧмтӧм нянь сёян луннэз. 4Петрасӧ кутісӧ да пуксьӧтісӧ. Нёль воинӧс сувтӧтісӧ видзӧтны сы сьӧрын. Нія вежсьывлісӧ нёлись. Ыджыт лун бӧрын Иродыс мӧдӧм сійӧ петкӧтны отир одзӧ. 5Чижовкаас Петраыс сьӧрын бура видзӧтісӧ. Сы коста вичкуас отирыс Петраыс понда орӧттӧг кеймисӧ Енлӧ.

Петралӧ Енлӧн отсӧт

6Локтан лунас Иродыс Петрасӧ мӧдӧм петкӧтны. Сія вӧлі дорӧм кык воин коласын. Ойнас сія узис. Мӧдік воиннэз сулалісӧ ыбӧссэз дорын. 7Видзчисьтӧг мыччисис Енлӧн ангел. Чижовкаас лоис югыт. Ангелыс тойыштыштіс Петрасӧ, саймӧтіс сійӧ да висьталіс: «Чеччы чожажык». Петралӧн дорӧм киэс мезмисӧ. 8Ангел сылӧ висьталіс: «Йыась да кӧмась». Петраыс сідз и керис. Сыбӧрын шуис Петраыслӧ: «Пасьтав вевдӧрись паськӧмтӧ, лок ме сьӧрӧ». 9Петраыс петіс да муніс сы сьӧрӧ. Сія эз вежӧрт былись керсьӧмсӧ, а юрас пыртіс: адзза пӧ Енсянь мыччалӧм. 10Нія мунісӧ ӧтік да мӧдік видзӧтліссез дынӧт. Сибӧтчисӧ кӧртісь керӧм ыбӧссэз дынӧ. Нія вӧлісӧ карӧ петан ыбӧссэз. Ны одзын ыбӧссэс асьныс оссисӧ. Нія петісӧ да мунісӧ ӧтік улича. Сэтӧн ангелыс Петра син одзись ӧшис. 11Сэк Петраыс кыдз онісь саймис. Сія висьталіс: «Ме аслам синнэзӧн адззылі, кыдз Еныс ыстыліс Ассис ангелсӧ. Сія мездіс менӧ Иродыс киись да быдӧсісь, мый мӧдісӧ меным керны иудейес».

12Лоӧмсӧ вежӧртӧм бӧрын Петраыс локтіс Иоанлӧн Мария мам ордӧ. Иоанлӧн мӧд нимыс вӧлі Марк. Марияыс керкуын унаӧн ӧксисӧ кеймыны. 13Петраыс ёркӧтіс ыбӧсас. Ыбӧсыс дынӧ петіс Рода нима кысъялісь ныв. 14Сія Петрасӧ тӧдіс баитӧмыс сьӧрті. Гажувьяс эз осьт ыбӧссӧ. Родаыс котӧрӧн пырис да висьталіс, Петра пӧ ыбӧс саяс сулалӧ. 15Мӧддэс сылӧ висьталісӧ: «Эн я ӧшты мывкыдтӧ?» Но Родаыс орӧттӧг сідз баитіс. Мӧддэс сэк висьталісӧ: «Натьтӧ, сія Петралӧн ангел». 16Сы коста Петраыс дугдывтӧг ёркӧтіс. Нія осьтісӧ. Петрасӧ казялӧмсянь нійӧ диво кутіс. 17Сія кинас ӧвтыштӧмӧн тшӧктіс нылӧ чӧвны. Петраыс висьтасис чижовкасис Дӧсвидзись отсӧтӧн петӧм йылісь. Лоӧмыс йылісь тшӧктіс юӧртны Яковлӧ да мӧдік воннэзлӧ. Сэсся сія петіс да муніс мӧдіклаӧ.

18Асывнас воиннэс ӧддьӧн повзьӧмась. Нія абу тӧдӧмась, мый лоис Петраыскӧт. 19Иродыс тшӧктӧм кошшыны Петрасӧ. Сійӧ абу адззӧмась. Сэк Иродыс юасьӧм лоӧмыс йылісь. Юасьӧм бӧрын Петраыс сьӧрын видзӧтіссесӧ тшӧктӧм вийны. Сэсся Иродыс Иудеясис иньдӧтчӧм Кесария карӧ да сувтчӧм сэтчин.

Иродлӧн кулӧм

20Иродыс лӧгасьӧм Тирын да Сидонын оліссез вылӧ. Нія каррезісь отирыс баитчӧмась ӧтамӧд коласын да локтӧмась Иродыс дынӧ. Ӧксу керкуын веськӧтлісь Властсӧ кыскӧмась асланяныс. Корӧмась отсавны бурасьны ӧксукӧт. Ны муэзын оліссез эд вердчӧмась ӧксуыс мусянь. 21Висьталӧм лунӧ Иродыс пасьтасис ӧксу паськӧмӧ. Сія пуксис юралан пукӧс вылӧ да баитіс отирыс одзын. 22Отирыс горӧтлісӧ: «Эта Ен баитӧ, оз морт!» 23Но Иродыс эз ошкы Енсӧ. Сійӧн Енлӧн ангел уськӧтіс Иродсӧ. Сійӧ сёйисӧ гаггез, да сія куліс.

24А Енлӧн кылыс вынсяліс да паськаліс. 25Варнава да Савл Ерусалимӧ сьӧмсӧ вайӧм бӧрын бертісӧ Антиокия карӧ. Нія босьтісӧ сьӧраныс Иоанӧс, шуны мӧд нимнас кӧ, Маркӧс.

Савлӧс да Варнаваӧс ыстӧм

Currently Selected:

Ап. керӧммез 12: БЮ19

Highlight

Copy