Luqaasa Mishiraachcho 24

Hayqoppe Yesusa Denth

(Mato 28:1-10; Mar 16:1-8; Yoha 20:1-10)

1Wogga wontta maaladora maccassati ba giigsida shittoza ekkidi Yesusa woththida duufozakko bida. 2Shuchchayka duufoza doonappe genderidi dizayssa be7ida. 3Gido attiin giddo gelidi Yesusa ahaa demmontta aggida gishshas, 4isttas hanzaazi dhayiin istti tollu gidaashe qoppontta xolqettiza may7o may7ida nam7u asati istta achchan eqqida. 5Maccassatikka keehi babbidi duge biitta xeellishin, «He asati paxidi dendidayssa hayqeththata giddon ays koyeetii? 6Izi dendides! Haan baa. Qasseka izi Galilan dishe inttes kase ay gidaakko ane qopite. 7Asa Nay nagaranchchata kushen aadhdhi imettanaassinne kaqettanaas, hayqoppeka heedzdzanththo gallas dendanaas bessees» giidi yooti woththides.#Mato 16:21; 17:22-23; 20:18-19; Mar 8:31; 9:31; 10:33-34; Luqa 9:22; 18:31-33

8Maccassatikka he wode kase izi gida qaalaa akeekida. 9Maccassati duufosoppe simmidi hessa ubbaa Yesusa kaalliza tammanne issinetassinne haratas yootida. 10Hessaka Hawaaretas yootiday Magdale gizasoppe yida Maaramonne Yohaano geetettizaarira Yaaqoobe Maaramonne isttara issife diza hara maccassata. 11Gido attiin isttas maccassati yootidayssi agumo misatiin ammanibeettenna. 12Gido attiin Phexroosi woththan Yesusa duufokko gakki hokkidi duufoza giddo xeellishin iza ahaza xaaxida may7oy xalla dizayssa be7idi keehi malalettishe baso simmides.

Bana Kaalliza Nam7atas Yesusa Qoncceth

(Mar 16:12-13)

13He gallas iza kaallizaytappe nam7ati Yerusalaameppe tammanne issi kilo metire haakkiza Emahoose geetettiza katama beettes. 14Bishe istti he wode hanida Yesusa hayqo gishshas ba giddon haasayetteettes. 15Istti haasayettishin Yesusi isttako shiiqidi isttara issife bishin, 16istti iza erontta mala istta ayfey oykettides.

17Yesusi istta, «Hayssi oge hemettishe intte intte giddon haasayettizayssi aazee?» gides. Isttika dagamara modhettishe sitti gi eqqaa gida. 18Istta giddofe issoy Qaliyopha geetettizayssi zaaridi, «Ha mata gallassatan Yerusalaamen hanidayssa erontta imaththa asi nena xallaa?» gides.

19Izikka isttas zaaridi, «Aazi hanidee?» giin istti qasse zaaridi, «Xoossa sinththaninne asa ubba sinththan oosoninne qaalan mino nabe gidida Naazirete Yesusa gishshassa» gida. 20Izakka qeeseta halaqatinne daannati hayqo pirdas aaththi immidanne kaqqida. 21Nuni gidikko, « ‹Isra7eele wozzanay iza› giidi ufayettidosishin harappeka hessi haniin qasse hach heedzdzanththo gallassa. 22Qasse nu giddofe issi issi maccassati nuna keehi malalisida; isttika maalado wonttara gede iza duufokko biidi, 23iza ahay beettontta ixxiin yiidi izi paxa dizayssa isttas yootiin Kiitanchchata be7idayssa nuus yootida. 24Nuuppeka issi issi asati iza duufokko biidi maccassati gida mala be7ida attiin Yesusa demmibeettenna» gida.

25Izikka isttas, «Intteno wozinan woththonttaytoo! Intte wozinay kase nabeti yootidayssa ammananaappe takkidaytoo! 26Xoossafe kiitettidayssi ha metoza ekkanaassinne gede ba bonchchoso gelanaas bessennee?» gides. 27Museppenne nabetappe doommidi Geeshsha Maxaafatan iza gishshas xaafettidayssa isttas lo7eththi yootides.

28Istti ba bizaso matida wode Yesusi aadhdhi bizaa misatides. 29Isttika qasse, «Gadey qammiza gishshas nunara aqa» giidi iza keehi woossiin isttara aqanaas gelides. 30Isttara issife maaddan uttidi uketh ba kushen oykkidi isttas menththi menththi immides. 31He wode istta ayfey doyettiin iza gididayssa erida; izikka istta ayfeppe geemmides. 32Isttika, «Nu yishe oge bolla dishin nuna haasayssidi Geeshsha Maxaafatakka qonccisidi nuus gelanaashe yootiin nu wozinay tama mala xuugettibeennee?» giidi issoy issaara haasayettida.

33Heerakka dendidi Yerusalaame simmi bida; tammanne issinetinne isttara issife dizaytikka issi bolla shiiqi dizayta demmida. 34Isttika ba giddon issoy issaas, «Goday tumu dendides! Simoonaska beettides» gida.

35Iza kaallizaytappe nam7ati oge bolla hanidayssanne Yesusi ukeththaa menththi menththi immida wode istti wostti eridaakko isttas yootida.

Yesusi Bana Kaallizaytas Qoncceth

(Mato 28:16-20; Mar 16:14-18; Yoha 20:19-23; Hawa 1:6-8)

36Hessa gishshas istti ba giddon haasayettishin Yesusi istta giddon eqqidi, «Saroy inttes gido!» gides.

37Gido attiin istti moytille be7idaa misatiin keehi dagammida. 38Izikka isttas, «Aazas daro qoppeetii? Aazas intte wozinara sidheetii? 39Ta kushetanne ta tohota haa xeellite; tanakko; qasseka tana oykki be7ite; tana intte be7izayssa mala moytilles ashoynne meqeththi deenna» gides.

40Hessa gi simmidi ba tohotanne ba kusheta istta bessides. 41Isttika ufayssa daroppenne malaleteththafe dendidayssan buro ammanontta dishin Yesusi, «Hessan aykko mizaazi dizee?» giidi istta oychchides. 42Isttika mole xiixa issi bars izas immida. 43Izikka ekkidi istta sinththan mides.

44Izikka, «Inttenara ta diza wode, ‹Muse wogan nabetaninne yeththa Maxaafatan ta gishshas xaafettidayssi wurikka polettanaas bessees› gaada ta inttes yootida ta qaalay hayssako» gides.

45He wode Geeshsha Maxaafata istti erana mala wozina isttas doydes. 46Isttaskka, «Kirstoosi waaye beyana; heedzdzanththo gallas hayqoppe dendana geetetti xaafettides. 47Yerusalaameppe doommidi ubba deres nagarappe simoynne maaroteththi iza sunththan yootettana. 48Intteka hayssas markkatta. 49Tanikka ta Aaway immida ufayssaa inttes yeddana; intte qasse wolqqa bollafe may7ana gakkanaas Yerusalaame kataman takkite» gides.#Hawa 1:4

Pude Salo Yesusa Buus

(Mar 16:19-20; Hawa 1:9-11)

50Hessafe guye istta ekkidi Bitaaniya geetettizaso kezides. Ba kushetakka denththidi istta anjjides.#Hawa 1:9-11 51Istta anjjishe isttafe shaakettidi pude salo bides. 52Isttika izas hokki goynnida; keehi ufayettishe Yerusalaame simmida. 53Ubba wode Xoossa Keeththan Xoossaa galatishe gam7ida.

Currently Selected:

Luqaasa Mishiraachcho 24: GM

Highlight

Copy