Luqaasa Mishiraachcho 23

Philaxoosa Sinth Yesusa Shiiqo

(Mato 27:1-2,11-14; Mar 15:1-5; Yoha 18:28-38)

1Heen shiiqida asay wuri dendidi Yesusa Philaxoosakko ekki bides. 2«Hayssi addezi nu asay Qeesaares giira giirontta mala baleththishenne bana, ‹Tani Kirstoosi kawo› giidi baleththishin demmidos» giidi mootida.

3Philaxoosikka Yesusa, «Neni Ayhudata kawoo?» giidi oychchides. Yesusikka zaaridi, «Ne gida mala» gides.

4Philaxoosikka qeeseta halaqatassinne shiiqida asaas, «Hayssa addeza bolla iza mootisiza iita yo7o demmabeekke» gides.

5Istti zaaridi, «Hayssi addezi Galilappe hayssa gakkanaas kumeththa Yuhuda waayiso bolla dees» giidi minththi yootida.

Herdoosa Sinth Yesusa Shiiqo

6Philaxoosi asay gizayssa siyidi, «Yesusi Galila asakkonne» giidi lo7eththi eranaas oychchides. 7Yesusi Herdoosa Kawoteththa giddon dizayssa shaakki eridi he wode Herdoosi Yerusalaamen diza gishshas izakko Yesusa yeddides.

8Herdoosikka kase Yesusa beyanaas daro koyishe diza gishshas Yesusa be7idi keehi ufayides; iza gishshas kase siyidi izi ooththishin beyanaas koyidi ufayettides. 9Daro oyshatakka iza oyshereththides; gido attiin Yesusi iza oyshaa zaaribeenna. 10Qeese halaqatinne xaafeti heen iza matan eqqidi keehi wordo mooto mootida. 11Herdoosikka ba wottadaratara issife iza kadhida; kawo may7o mayzidi Philaxoosakko zaari yeddides. 12Herdoosinne Philaxoosi kase ba giddon issoy issaara ooshsha shin he gallas giigida.

Yesusa Bolla Pirdettida Hayqo Pirda

(Mato 27:15-26; Mar 15:6-15; Yoha 18:39-40; 19:1-16)

13Philaxoosi qeeseta halaqatara, dere daannataranne dere asaa shiishshidi, 14«Hayssi addezi asay wuri makkallana mala denththeththees giidi intte taakko ehiin ta qorada iza oyththiza issi iita miishshika demmabeekke. 15Qasseka Herdoosi issi iita miishshika iza bolla demmontta aggida gishshas haa nuukko zaari yeddides. Ha7i intte be7iza mala iza hayqos gaththiza issi iita miishshika ooththibeenna. 16Hessa gishshas qaxxayada ta iza yeddana» gides. 17Izi hessa giday istta ba7aale gallas qashettida asappe issaade birshiza wogay diza gishshassa.#23:17 Issi issi Geeshsha Maxaafati taybo 17 bolla diza qofa gujjeettes; qofazikka Marqoosan shempo 15:6 dizayssa misatees.

18Derey wurikka issi bolla, «Barbaane birshada hayssa addeza digga!» giidi waassides. 19Barbaaney katama giddon asaa makkalla yo7on denththeththidi as wodhi qashettida asa.

20Philaxoosikka Yesusa birshanaas koyida gishshas qasseka zaaridi oychchides. 21Asay zaaridi iza, «Kaqqa! Kaqqa!» giidi waassides.

22Philaxoosi heedzdzanththoka, «Aazas kaqqoo? Hayssi addezi ay iita ooththidee? Iza hayqos gaththiza iita ooso tani iza bolla beyabeekke; hessa gishshas qaxxayada ta iza birsha yeddana» gides.

23Asaykka qaalaa dhoqqu histtidi Yesusi kaqettana mala Philaxoosa keehi woossishe waassides. 24Hessa gishshas Philaxoosi istta oyshoy polettana mala azazides. 25Asaa makkallisidi shempo wodhida gishshas qashettidayssa birshana mala istti woossidaade birshidi qasseka Yesusa istti dosida mala ooththetto giidi deraas aaththi immides.

Yesusa Kaqeteth

(Mato 27:31-44; Mar 15:21-32; Yoha 19:17-27)

26Isttika Yesusa oykki ekki bishin Qareena geetettiza katamappe issi Simoona geetettiza addey haahoppe yizayssa demmida; Yesusi kaqettana masqale kocaa izi tookkidi Yesusa kaallana mala wolqqaththida.

27Daro dereynne ba tira icci icci yeekkiza maccassati, 28Yesusappe guyera iza kaallida. Yesusi isttako simmi xeellidi, «Intte Yerusalaame maccassay inttessinne intte naytas yeekkite attiin taas yeekkofte. 29‹Sinththafe intte hekko maynne gidida maccassati, yelontta ulotinne nay dhammontta dhanththati anjjettidayta!› gaana wodey sinththara yees. 30He wode asay, ‹Zumatoo! Nu bolla woddite; zumbullatikka nuna qottite!› gaana.#Hose 10:8; Ajju 6:16 31Histtiin qaye miththa bolla hayssaththo ooththidayti mela miththa bolla wosttaneesha?» gides.

32Izara issife hayqqana mala hara nam7u iita ooththida asata izara efida. 33Qaaraniyo geetettizaso gaththidi kaqqida; iita ooththidaytappe issaa ushachcha baggara, issaa hadirsa baggara kaqqida. 34Yesusikka, «Ta Aawawu! Hayti ba ooththizayssa eridi ooththontta gishshas isttas atto ga!» gides; isttika iza may7oza saama yeggidi ba giddon gishetti ekkida.#Maza 22:18 35Hessi hanishin asay wuri eqqi xeellides; daannatikka, «Izi hara asaa ashshides shin Xoossafe doorettida Kirstoosi iza gidikko ane ha7i bana ashsho» giidi qidhida.#Maza 22:7

36Wottadaratikka shiiqidi woyneppe agettida caala ushshu ushshidi iza qidhida.#Maza 69:21 37«Neni Ayhuda kawo gidikkii? Ane ha7i nena ashsha» gida.

38Iza hu7eppe bolla baggara masqale koca bolla, «Hayssi Ayhudata kawo» giza qaala xaafi qaaphida.

Nam7u Pangatara Yesusa Kaqeteth

(Mato 27:38-44; Mar 15:27-32)

39Iita ooththidi kaqettida asatappe issoy cashsha qaala Yesusa bolla qoqofides. «Ne Kirstoosa gidikkii? Ane nenakka nunakka ashsha» gides.

40Iita ooththidaytappe issoy, «Neni nees bessiza pirda ekkashe Xoossas babbikii? 41Nuni nu ooththida iita oosos bessizayssa ekkoos; hayssi addezi gidikko issi iitakka ooththibeenna» gides.

42Yesusa, «Neni ne kawoteththara yiza wode tana qoppa!» gides.

43Yesusikka zaaridi, «Ta nees tumu gays; hach ne tanara Gannaten daana» gides.

Yesusa Hayqo

(Mato 27:45-56; Mar 15:33-41; Yoha 19:28-30)

44He wode gadey seeta gallas gidishin biidi uddufun saate gakkanaas kumeththa biitta bolla dhumay dhumides. 45Arshe poo7oy digettides. Xoossa Keeththa magalashaykka daakettidi nam7u kezides.#Kessa 26:31-33 46Yesusikka keehi waassidi, «Ta aawawu! Tani ta shempo ne kushen immays» gida mala shempo kezides.#Maza 31:5

47Mato halaqay hessa be7idi, «Hayssi addezi tumappe xillo asakkoshin» giidi Xoossaa galatides.

48Hessa beyanaas heen shiiqidi derey wuri he hanidayssa be7idi tira icci iccidi simmides. 49Gido attiin Yesusa kase lo7eththi erizayti wuri qasseka Galilappera iza kaalliza maccassati hessa xeellishe haakki eqqida.#Luqa 8:2-3

Yesusa Moogeteth

(Mato 27:57-61; Mar 15:42-47; Yoha 19:38-42)

50Ayhudata duulata asaappe issoy izikka Yooseefe geetettizayssi daro kiyanne xillo asa. 51Izikka kase asay Yesusa bolla duulatishin he duulatan deenna; izikka Armatiyase geetettiza Ayhudata katama asa shin Xoossa Kawoteththi yaanayssa naagishe gam7ides. 52Izikka Philaxoosakko biidi Yesusa ahaa baas immana mala Philaxoosa woossides. 53Philaxoosi izas ero giin Yooseefey ahaa masqale kocappe woththida mala xaaxidi shuchchafe woocettida kase hara asi moogettontta duufon efidi woththides.

54He gallassay asay Sambatas giigettiza gallas gidida gishshas Sambatay gelana hanees.

55Galilappe dendidi Yesusara yida maccassatikka Yooseefe kaalli biidi duufoza be7ida. Yesusa ahaa wostti woththidaakko be7ida. 56Heeppe simmidi shittonne tiyiza miish giigsida. Wogay giza mala Sambata gallas shempida.#Kessa 20:10; Zaare 5:4

Currently Selected:

Luqaasa Mishiraachcho 23: GM

Highlight

Copy