रोमी 3

1त अब मितैं इन बता कि यहूदी लोग दुसरि जाति का लोगु से कनकै जादा बढी के छिन, अर जु खतना ऊंन करवै वेको क्या फैदा ह्‍वे? 2हे मेरा भै-बैंणो, या बात हरेक तरौं से भली च, किलैकि परमेस्वर को वचन सबसे पैलि यहूदी लोगु तैं ही दिये गै। 3अर अगर यहूदी लोगु मा बटि कुई मनखि बिस्वास नि करलु, त क्या पिता परमेस्वर की सच्‍चै बेकार साबित ह्‍वे गै? 4ना इन कभि नि ह्‍वे सकदु। सुणा, दुनियां को हरेक मनखि झूठ्‍ठु साबित ह्‍वे सकदु च, मगर पिता परमेस्वर ही च जु कि अपणा वचन को पालन करदु, इलै वेतैं सच्‍चु साबित होण द्‍या। जन कि पवित्रशास्‍त्र मा भि लिख्यूं च अर वा बात इन च कि,

# भजन 51:4 “हे मेरा परमेस्वर तुम अपणा मामला मा सच्‍चा छाँ,

अर तुम अपणु फैसला बड़ा न्याय से करद्‍यां।”

5पर अगर जु हमरा गळत काम करण से पिता परमेस्वर की अच्छे और भि जादा साफ ह्‍वेके हमरा समणि औन्दी, त फिर परमेस्वर हम पर किलै गुस्सा होन्दु अर किलै हमतै दण्ड देन्दु? (अरे, यू सब त मनखियों का अपणा विचार छिन जु कि गळत छिन)। 6अगर इन होन्दु त पिता परमेस्वर फिर ईं धरती का लोगु को न्याय कनकै करलु? 7अर अगर मेरा झूठ्‍ठ बोन्‍न की वजै से परमेस्वर को सच्‍चु होण और भि जादा परगट होन्दु, अर इन कैरिके वेकी और भि जादा बडै होन्दी, त फिर मितैं ये काम खुणि पापि ठैरै के परमेस्वर गळत न्याय करण वळु बणि गै। 8अर अगर या सच्‍च च त फिर हम भि बोलि सकद्‍यां कि, “चला, हम सब मिली के बुरै करद्‍यां, ताकि वां से भलै हो?” अर कुछ लोग हम पर इन इळजाम लगै के बुल्दिन, “अरे, यू लोग त बुरै की बातों तैं सिखौन्दिन।” अर न्याय का हिसाबळ जु दण्ड ऊं खुणि रख्युं च, उ ऊंतैं जरुर मिललु।

कुई भि धरमी नि च

9अर ज्वा बात मिन तुमतै बतै त क्या हम इन बोलि सकद्‍यां, कि हम यहूदी लोग दुसरा लोगु से भौत अच्छा छां? नऽ रे ना, इन बात नि च, किलैकि हमुन पैलि ही या बात बतैयालि की हरेक मनखि पाप का वश मा च, अब चै वु यहूदी जाति को हो या कुई और। 10अर जन कि पवित्रशास्‍त्र मा भि लिख्यूं च कि,

# भजन 14:1-3; भजन 53:1-3 “परमेस्वर की नजर मा कुई भि मनखि

धरमी नि च, ना एक भि नि च।

11अर कै का बिंगण मा नि औन्दु,

कि वेको काम करण को तरीका कन च।

अर कुई भि मनखि परमेस्वर तैं जनण कि कोसिस नि करदु।

12सब मनखि भटकी गैनी, वु सभ्या का सभि बेकार ह्‍वे गैनी।

अर कुई भि भलै का काम नि करदु, एक भि ना।”

13 # भजन 5:9 “अर ऊंका गौळा इन छिन जन कि एक खुलि कबर,

अर अपणी छल-कपट की बातों से वु लोगु तैं भरमौण की कोसिस करदिन।”

# भजन 140:3 “अर ऊंका गिच्‍चा बटि निकळण वळी बात गुरौ का बिस जन छिन।”

14 # भजन 10:7 “ऊंका गिच्‍चा बटि सिरफ दुसरो खुणि असगार अर बुरै ही निकळदि।”

15 # यशा 59:7-8 “अर लोगु को कत्ल करणु खुणि वु तुरन्त अटगदिन।

16अर जै बाटा पर वु जान्दा छिन, वे बाटा पर विणास अर मुसीबत ही च।

17“अर वु लोग शान्ति का बाटा का बारा मा कुछ नि जणदिन।”

18 # भजन 36:1 “अर ऊंका मनों मा परमेस्वर की डौऽर जरा भि नि च।”

19अर अब हम या बात जणदा छां की नियम-कानून हमतै जु कुछ भि बतौन्दिन, वु सिरफ ऊं लोगु खुणि ही च जु नियम-कानूनों तैं मणदिन, ताकि ऊं लोगु की टुपटी बन्द ह्‍वे जौ। अर पिता परमेस्वर ही च जु की सब गळत काम करण वळा लोगु को न्याय करण वळु च। 20किलैकि मूसा का नियम-कानूनों का आधार पर #भजन 143:2कुई भि मनखि परमेस्वर का समणि धरमी नि ठैरैये जालु, इलै परमेस्वर का नियम-कानूनों की वजै से हमतै इन ज्ञान मिलदु कि हम सब लोग पापि छां।

बिस्वास करण से धरमी बणण

21मगर जु मनखि प्रभु यीशु मसीह पर बिस्वास करदु, उ पिता परमेस्वर की नजर मा धरमी मनखि बणदु, अर यू मूसा रैबर्या का दियां नियम-कानून का मुताबिक नि होन्दु। हालांकि नियम-कानून अर परमेस्वर का रैबर्या ईं बात की ही गवै देन्दिन। 22अर यू सब कुछ तब होन्दु जब हम यीशु मसीह पर बिस्वास करद्‍यां, अर वेका द्‍वारा ही हम लोग धरमी ठैरैये जन्द्‍यां। अर जु कुई यीशु मसीह पर बिस्वास करदु, पिता परमेस्वर वे मनखि का दगड़ा मा कुई भेदभाव नि करदु। 23किलैकि सभ्यों न पिता परमेस्वर का खिलाप मा जैके गळत काम करिनी, अर ऊं पापों की वजै से वु लोग वेसे मिलण वळा आदर-सम्मान से दूर छिन। 24मगर तभि भि पिता परमेस्वर की महान किरपा न इन साबित कैरी, कि हम वेकी नजर मा धरमी छां। अर यू वेन अपणा पुत्र प्रभु यीशु मसीह का द्‍वारा कैरी, जब वेन हमतै हमरा पापों से माफी दिनी, अर वे दण्ड से छुटकारु दे जु कि हमतै मिलण वळु छौ। 25अर या पिता परमेस्वर की योजना छै, ज्वा कि वेन मनखि का समणि रखी कि लोग अपणा-अपणा पापों से पस्ताप कैरा। इलै वेन यीशु मसीह तैं ईं दुनियां मा भेजि अर वेको ल्वे क्रूस पर बुगये गै, ताकि जु कुई वे पर बिस्वास कैरो, पिता परमेस्वर वेका पापों अर वे पर लग्यां इळजामो तैं माफ कैरी सैको। अर पुरणा जमना मा वेन लोगु का पापों का हिसाब से ऊंतैं जादा दण्ड नि दिनी अर इन वेन इलै कैरी, किलैकि उ धरमी अर सबर रखण वळु च। 26मगर अब उ इन नि करदु, बल्किन मा आज का बगत मा उ लोगु का पापों अर ऊं पर लग्यां इळजामो की सजा देन्दु। अर इन उ इलै करदु, ताकि इन साबित ह्‍वे जौ कि उ अपणा हरेक मामला मा सच्‍चु अर सही न्याय करण वळु च। अर जु कुई भि वेका पुत्र यीशु मसीह पर बिस्वास करदु उ वे मनखि तैं स्वीकार करदु।

27अर या बात सच्‍च च, इलै बड़ु मोन करण को कुई फैदा नि च, कि हम त नियम-कानूनों का मुताबिक चलद्‍यां, किलैकि अब ईं बात से कुई फर्क नि पोड़दु कि हम नियम-कानून का मुताबिक चलद्‍यां कि ना, बल्किन मा फर्क त ईं बात से पोड़दु कि क्या हम बिस्वास करदा छां कि ना? 28इलै हम ये नतीजा पर पौछद्‍यां, कि मनखि नियम-कानून का मुताबिक ना, बल्किन मा यीशु मसीह पर बिस्वास करण से परमेस्वर की नजर मा धरमी ठैरदु। 29त अब क्या परमेस्वर बस यहूदी जाति का लोगु को ही परमेस्वर च? क्या उ दुसरि जाति का लोगु को परमेस्वर नि च? हाँ, ये मा कुई भि सक नि च की वु ऊं लोगु को भि परमेस्वर च जु यहूदी जाति का नि छिन। 30हाँ, परमेस्वर एक ही च, अर जौं यहूदी लोगु न खतना का रिवाज तैं पूरु कैरी वु ऊंतैं ऊंका बिस्वास का द्‍वारा धरमी ठैरान्दु, अर जौं लोगु को खतना नि च होयुं वु ऊं लोगु तैं भि वु ऊंका बिस्वास का मुताबिक धरमी ठैरान्दु। 31अब तुम सुचणा ह्‍वेल्या, कि जु कुछ भि हम बोन्‍ना छां वांको मतलब क्या च? त हम तुमतै बतै देन्द्‍यां कि जब हम इन बुल्द्‍यां की बिस्वास करण से ही हमतै छुटकारा मिलदु, त यां को मतलब यू नि च कि हम नियम-कानूनों तैं रद्‍द कना छां, बल्किन मा हम पिता परमेस्वर की बातों तैं पूरु करणा छां।

Currently Selected:

रोमी 3: GBM

Highlight

Copy