Luk 21

Nga falelaa na te'e 'oru

(Mak 12:41-44)

1Si manga tha Jisas 'e ni laa Bi'u Abu tha God, nia ka rikia to'a riki'i doo keki alua falelaa kera ki 'i laa kula ni alulana falelaa ki. 2Ma nia ka rikia te'e 'oru siofa'a 'e alua roo kali fa malefo ki. 3Ma nia ka sore'a, “Nau ku fa'arongo mamana 'ani kamalu'a, na 'oru siofa'a ne'e 'e fale ka talua imole ne'e ki sui. 4Imole ne'e ki kera falea falelaa kera ki fasia riki'i doo 'oro kera ki, sui kini ne'e 'e siofa'a ma ka fale fasia si aludooa nia te'efau.”

Jisas 'e ngata sulia ogelana na Bi'u Abu tha God

(Matiu 24:1-21; Mak 13:1-19)

5Tei wane 'ana disaepol nia ki keki tangoa 'ada na fau ki na rikilana 'e le'a na kera thaungania 'ana Biu Abu tha God, bia laalaungia ki na kera alua 'ana bi'u 'eri. Sui tha Jisas ka sore'a, 6“Ma taa ki na mulu rikia ki, si manga 'eri kai fula mai na te'e gwa fau si too la'u 'i fafona ruana gwa fau, keki 'uu te'e fau 'ani kera 'i ano.”

7Keka soeto'ona, “Wane ni to'odoo, manga taa na doo 'eki kai fuli? Ma taa ki na maamalafoa na kai faatania na si doo 'eki karangia kai fuli?”

8Nia ka lu'uda, “Muka fiia na kesi lole kamalu'a. Sulia imole 'oro keki lae mai 'ana thataku, keki sore'a, ‘Nau na Kraest,’ keki sore'a, ‘Si manga ba 'e fula na'a!’ Sui 'e a'i musi fa'amamanea. 9Si manga mulu rongoa firua ma u'unua sulia firulaa, a'i musi ma'u. Si doo 'eki sui kai fuli fasi na'o, sui ma suusuilaa 'e a'i si fula 'uu mai neri.”

10Sui nia ka sore'a 'i sada, “Fanua keki firu bia ta fanua, ma 'inotoa keki firu bia ta 'inotoa. 11Na anunu ba'ita ki kai to'o, thaofaa ma mata'ia siisigi ba'ita ki kai fuli 'ana kula 'ee'eta 'oro ki, ma doo kwaifa'ama'ui ki ma maamalafoa ba'ita ki kai fuli mai laa maamatale'aa.”

12“Sui fata'i doo 'eki ka fuli, keki kani kamalu'a ma keka thaungi kamalu'a. Keki fale kamalu'a laa na bi'u ni fo'alaa ki ma keki alu kamalu'a la sela, ma keki ngali kamalu'a 'i na'ofana na king ki ma gavanaa ki, nunufana thataku. 13Ma muka falea si fa'arongoa suli nau. 14Sui musi manata isifuufuli la'u uria taa na muki lu'uda 'ania. 15Sulia nau kwai falea si ba'ea ki ma lioto'oa na a'i ta ma'alimae kamalu'a na tala'ana kai lu'u kamalu'a mada ka tofe kamalu'a. 16Ma maka ma thainamalu'a, do'ora ma waiwaena kamalu'a ki, inalamalu'a ma ruana kamalu'a ki keki falenga'i kamalu'a, ma keki thaungia tei imole 'i amalu'a. 17Imole ki sui keki lalakwata'i kamalu'a nunufaku. 18Sui 'e a'i ta ifuna gwaumulu'a kai dola. 19Takwe ngado, ma 'oki todaa marukia.”

20“Si manga mulu rikia na Jerusalem na omea ni firu kera kalia na'a, muka thaito'omana na fa'afunu'ilana ma'e toaa 'eri 'e karangi na'a. 21Si manga 'eri, to'a na kera ni Jiudia keka thaka ura tolo, ma to'a na kera ni laa ma'e toaa susu 'eri keka thaka fasia, ma to'a na kera ni mai thara 'ana ma'e toaa 'eri kesi kotho la'u la na toaa susu 'eri. 22Sulia nia si manga 'ana kwaakwa'ea fasia ka fa'amamanea na keekedalaa baa ki. 23Nia kai ta'aa 'asia na'a fana kini ki na kera iana ma keka fa'asusufa'i wela ki! Sulia 'afeta'ia ba'ita kai fula bia na kwaakwa'ea ba'ita kai fulato'ona imole ne'e 'eki. 24Keki mae 'ana nini ni firulaa ma keki kanida ma keki ngalida ura fanua daa ki. Ma Gentael ki keki uru faafia Jerusalem laalae ka fula bo'o 'ana si manga Gentael ki kai sui. 25Ma maamalafoa 'ee'eta ki kai fuli 'ana thato, madami ma buubulu loo ki. Ma fafo fanua nai iano, ma 'ana kula ki keki isifuufuli ma keka ma'u 'ana kuruulana ma sulatata'elana 'amali. 26Imole ki keki ma'u ni maelada 'ana taa na kai fulato'ona fanua nai iano, sulia na sukwa'ia ki na ni 'i thalo lo keki 'isu'isu. 27'Ana si manga 'eri keki rikia na kaluwane imole kai lae mai la datha lo bia suukwa'ia ma raralaa. 28Si manga doo ne'e ki 'e thafali kai fuli ki na'a, muka takwe ma muka kwaua maamulu'a 'i aa, sulia fa'amarukilaa kamalu'a 'e karangia na'a.”

29Nia ka fa'arongo kera 'ana tarifula ne'e, “Rikia fasi na fig bia 'ai ki sui. 30Si manga na kera ngoongotha'a, 'oko tala rikia bamu'a ma 'oko thaito'omana na uni'i thato 'e karangi na'a. 31Ka 'una 'eri la'u bo'o, si manga na 'o rikia si doo ne'e ki sui 'e fuli, muka thaito'omana na 'inotoa tha God 'e karangi na'a. 32'E mamana ku fa'arongo kamalu'a, na uni'i wane ne'e sa ka tatha bo'o 'e a'i, keki rikia si doo ne'e ki sui kai fuli. 33Ma maamatale'aa bia fanua nai iano keki sui bana, sui ma ba'elaku 'e a'i si sui.

34“Muka too kinakina 'ada mangomulu'a ka ngali kulu'a 'ana faafangaa, ma ku'ulaa ma isifuufulilaa 'ana marukia ne'e, ma fa thato 'eri ka fula fa'atona kamalu'a. 35Sulia fa thato 'eri kai fulato'ona imole ki sui fafona fanua nai iano. 36Muka too kinakina, ma muka fo'a fasia muka tala'ana thakalaa fasia si doo 'eki sui na kai fuli, ma fasi kamalu'a muki tala'ana takwelaa 'i na'ofana kaluwane imole.”

37Fa thato ki sui Jisas 'e to'odoo 'i laa Biu Abu tha God, ma 'ana fa tha'ulefia ki sui, nia ka lae ka too 'ana 'i gwauna fa tolo 'i 'Olif, 38ma imole ki sui keki lae mai 'i laa 'uu'usungadia ki, ura keki rongo nia 'i laa Bi'u Abu tha God.

Currently Selected:

Luk 21: MLU

Highlight

Copy