Luk 20

Soeto'onalaa sulia suukwa'ia tha Jisas

(Matiu 21:23-27; Mak 11:27-33)

1'Ana te'e fa thato, si manga tha Jisas 'e to'odoo sana imole ki laa bi'u abu tha God ma ka ngata sulia na fa'arongoa le'a, na wane naana'o 'ana fo'aa ki ma to'a ni to'odoo 'ana biibirangaa ki, bia tei wane naana'o ki la'u ki keka lae mai sana. 2Keka soeto'ona, “Fa'arongo kamali'a si mai, 'ana suukwa'ia ta na 'oki ilia si doo ne'e ki? Tei na falea suukwa'ia 'eri 'i femu?”

3Jisas ka lu'uda, “Nau kwai soeto'omulu'a 'ana te'e soeto'onalaa. Fa'arongo nau, 4si manga tha Jon kai babtaesi, suukwa'ia 'eri 'e lae mai fasia God mada fasi wane ni bana?”

5Ma keka u'unutania ma'alutadalu'a ma keka sore'a, “Mada sa kuki sore'a, ‘Fasi hefen,’ nia kai soeto'ona, ‘Uria taa na musi fa'amamanea?’ 6Sui taa mada sa kuki sore'a, ‘Fasi wane ni bana,’ figua ne'e keki 'uu fau kulu'a, sulia kera fa'amamanea tha Jon na profet baa.” 7Ma keka lu'ua, “Mili dora 'ania fei na suukwa'ia 'eri 'e lae mai fasia.”

8Ma Jisas ka sore'a, “Nau sa kwa fa'arongo kamalu'a la'u bo'o 'ana na suukwa'ia taa na ku ilia 'ana si doo ne'e ki.”

Tarifula sulia na to'a raalada ta'aa ki

(Matiu 21:33-46; Mak 12:1-12)

9Nia ka fa'arongoa la'u na tarifula ne'e sana figua 'eri, “Te'e wane 'e fasia te'e o'ole'e faene, ka alua tei wane ki keka lio sulia sui nia ka lae ura te'e fanua daa sulia si manga 'e tau. 10Si manga na foana 'ai ba ki 'e rafo na'a, wane 'eri ka falea te'e wanenira nia sana wane baa ki fasi keka falea tei fo'e doo ki fana fasia o'ole'e 'ai ba. Sui taa wane baa ki keka kwa'ea wanenira ba sui keka arasia ka tona oli bana. 11Nia ka falea la'u ta wanenira nia sui keka kwa'ea la'u bo'o, ma keka fa'ase'enoni 'ani nia sui keka tona olifania bada. 12Nia ka falea la'u uula wanenira ma keka kwa'e maala 'ania sui keka tari nia fasi kula 'eri. 13Sui wane 'eri ka manata 'una 'eri, ‘Taa na kwai ilia? Nau kwai falea kaluwane liiliothau nau, mada keki faare'inoto 'ani nia.’ 14Si manga na kera rikia, keka ngata ma'alutada kwailiu. Keka sore'a, ‘Wane na kai ta'e fulingana maka nia ne'e, kulu thaungia fasi kuka ngalia na doo ki na maka nia ki 'i fakulu'a.’ 15Ma keka 'abaa kau 'i thara 'ana o'ola 'eri sui keka thaumaelia.

“Ma taa na wane na o'ola nia kai ilia? 16Nia kai lae mai ma ka thaumaelia to'a 'eki sui bo'o, sui ka falea na o'ola ba fana tei wane ki la'u.”

Si manga figua 'eri kera rongoa na tarifula 'eri, keka sore'a, “God si alamatania si doo 'una 'eri si fuli!”

17Jisas ka lio fiifii uri kera ka soeto'oda, “Taa na to'olonga'ilana si keekeda abu ne'e,

“ ‘Gwa fau na wane ni kasibi'ulaa ki kera lalakwatania,

nia na gwa fau to'ongado 'ana bi'u 'eri.’

18Imole ki na kera taofa'i kera 'ana fau 'eri keki maga tatari'a, mani tei bana na gwa fau 'eri 'e 'asia faafia kai maga furifuri.”

19Ma si manga 'eri 'uu bo'o na to'a ni to'odoo 'ana biibirangaa bia na to'a gwaunga'i 'ana fo'alaa ki keka thathamia keki kani nia bona'a sulia kera thaito'omana na nia 'e ngata suli kera. Sui taa keka ma'u 'ana figua 'eri.

Falelana takisi fana tha Sisa

(Matiu 22:15-22; Mak 12:13-17)

20Ma keka lio laalae suli nia, keka falea to'a na kera abula mala to'a na kera kokota, ura keki ura'i nia. Kera thathamia keki fulato'ona ta si doo na tha Jisas kai sore'a na kai garo fasi keka ra'u nia faafia, fasia keki fale nia fana wane gwaunga'i#20:20 Wane gwaunga'i 'i Rom na 'e lio sulia 'i Jiudia, na tha Pontias Paelat 'i Rom. 21Ma to'a baa ki na keki ura'i nia keka soeto'ona, “Wane ni to'odoo, mili thaito'omana 'o sore'a ma 'oko to'oa taa na 'e mamana, ma 'oe 'o rikia to'a ki sui bana ka boobola ma 'oko to'oa na birangaa tha God 'ana kokotolaa. 22Nia 'e kokota ura na mika falea na takisi fana tha Sisa mada 'e a'i?”

23Nia ka riki thaito'omana bana na manatale'edoo ta'aa kera maka fa'arongo kera, 24“Faatania si mai ta fa seleni. Tei na nununa, ma thatana na 'e ni 'ania?”

Keka sore'a, “Nga Sisa.”

25Nia ka sore'a 'i sada, “'Una 'eri moko falea si doo nga Sisa fana nga Sisa, ma doo tha God fana tha God.”

26Ma 'e 'afeta'i uria na keki fulato'ona ta si doo na kai sore'a na keki kani nia faafia 'i maana figua ba'ita. Ma keka kwele 'asia na'a 'ana lu'ulaa nia ki ma keka too eno bona'a.

Na soeto'onalaa sulia na tata'elaa fasia maea

(Matiu 22:23-33; Mak 12:18-27)

27Ma tei Sadusii ki na kera sore'a na 'e a'i ta tata'elaa fasia maea, keka lae mai sana tha Jisas bia te'e soeto'onalaa. 28Keka sore'a, “Wane ni to'odoo, Mosis 'e kedaa 'i fakulu'a mada sa ta wane ka mae, ma nia ka a'i 'ana ta wela, na do'orana kai folia kuka'e na 'e 'akwasia neri, fasi keka too 'ana ta wela ura kai ngalia thatana wane mae 'eri. 29Aia, fiu do'ora ki keka too te'e si kula. Wane na'o 'e folia te'e kini, sui ka mae la'u bana si manga keero'a a'i 'uu 'adaro'a ta wela. 30Ruana wane ka folia sui ka mae, 31sui uula wane ka folia, ma ka lae bana 'una 'eri laalae fiu waido'ora 'eki keka mae te'e fau ma ka a'i bana ta wela. 32Sui kini baa ka mae la'u bo'o. 33Aia si manga na God kai tata'ea to'a ni sui fasi maea, tei 'i ada bo'o na kuka'e nia neri sulia fiu waido'ora 'eki kera folia te'efau kini 'eri?”

34Jisas ka lu'uda ka sore'a, “Imole ki 'ana uni'i wane ne'e na keki folikini ma keki to'owane. 35'Ana si manga 'e ni 'uu mai, imole ki na God 'e rikifaarada ura keki tata'e fasi maea, 'e a'i kesi folikini mada kesi to'owane, 36kera sa keka mae la'u a'i, sulia keki 'uria na'a na ensolo ki. Kera na wela tha God ki, wela na kera tata'e fasi maea. 37Ma 'ana manataa na to'a mae ki keki tata'e fasi maea mada 'e a'i, tha Mosis 'e fa'amamanea si manga 'e keekeda sulia 'ai baa na era 'akofia. Sulia tau na'a buira tha 'Abraham, 'Aesak ma tha Jakob kera mae sui na'a, nia ka 'alangia Lord 'ana, ‘God tha 'Abraham, God tha 'Aesak ma God tha Jakob.’ 38Nia na God to'a kera mae 'e a'i, nia God to'a na kera maruki, ma 'ana tha God kera maruki te'efau.”

39Tei wane to'odoo ki 'ana biibirangaa keka sore'a, “Wane ni to'odoo, lu'ulaa 'oe 'e kokota!” 40Ma ta wane si manata bona'a ura soelaa uria soeto'onalaa ki.

Tha Jisas wela 'ana kwalafaa tha Defeta

(Matiu 22:41; 23:36; Mak 12:35-40)

41Tha Jisas ka sore'a 'i sada, “Uria taa na keka sore'a na Kraest na kaluwane tha Defeta? 42Defeta talani nia 'e kedaa laa buka ba 'ana Saams ki,#Sams 110:1

“Tha God 'e sore'a sana Lord nau,

'ono 'ana kula ni gwaunga'i 'ana bali 'aba a'ola nau, 43uria na kwai alua na ma'alimae 'oe faara 'aemu.”

44“Defeta ka 'alangi nia 'ana ‘Lord’. Ade 'ufita na nia kai 'uria kaluwane nia?”

45Si manga na figua 'eri keki fafurongo bada, Jisas ka sore'a sana disaepol nia ki, 46“Muki fiia na to'a ni to'odoo 'ana biibirangaa ki. Kera thathamia lae kwailiu faafia na to'oni tekwa ki, ma keka thathamia imole ki keka 'arata'i le'a 'ani kera maana usia ki, ma keka thathami'i 'onolaa 'i laa si kula 'inoto ki fana 'onolaa laa bi'u ni fo'alaa, ma kula ni faafangaa ki. 47Keka bilia aludooa kini 'oru ki, ma ura rikilana bana, keka fo'a 'ana fo'aa ki na 'e tekwa. To'a 'eki keki todaa kwaakwa'ea na kai ta'a 'asia na'a.”

Currently Selected:

Luk 20: MLU

Highlight

Copy