Иоанн 10
10
10 бетӀер
Вехьасул мисал
1ХӀакълъун абулеб буго дица нужеда: нуцӀихъан гурони, цогидаб бакӀалдасан гӀиял чолониве лъугьарав чи ккола цӀогьор яги хъачагъ. 2НуцӀихъан вачӀуна гьезул вехь. 3ВорчӀухъанас гьесие нуцӀа ричӀула, чахъабазда гьесул гьаракь рагӀула. Цо-цоккун щибалъул цӀарги ахӀун, вехьас чахъаби чолониса къватӀире риччала. 4Жиндирго киналго чахъаби къватӀире риччараб мехалъ, вехь рехъада цеве вилълъуна, чахъабиги гьесда хадур уна, гьезда гьесул гьаракь лъалелъул. 5Амма цогидав чиясда хадуб унаро рехъен, гьесда аскӀоса лъутула чахъаби, чияр гьаракь гьезда лъаларелъул.
6Гьеб мисал бачун, ГӀисаца сундул хӀакъалъулъ бицунеб бугебали бичӀчӀичӀо гьезда.
«Дун вуго лъикӀав вехь»
7ГӀисаца цоги абуна:
– ХӀакълъун абулеб буго дица нужеда: дун вуго чахъабазул чолол кӀалтӀа бугеб нуцӀа. 8Дун вачӀиналде рукӀарал киналго руго цӀогьалги хъачагъалги. Гьединлъидал чахъаби гьезухъ гӀенеккичӀо. 9Дун вуго нуцӀа. Гьеб нуцӀа рагьаравщинав хвасарлъила, жанивеги ина, къватӀивеги вачӀина, квине жоги щвела. 10ЦӀогьор вачӀунаро – бикъизе, чӀвазе, хвезабизе гурони. Дун вачӀун вуго гӀумру кьезе, гьарзаяб гӀумру кьезе. 11Дун вуго лъикӀав вехь. ЛъикӀав вехьас чахъабазе гӀоло рухӀги кьола. 12-13Амма мухьдахъ ккурав вехь вехь гуро, чахъаби чияр ругелъул. БацӀ рехъалъе бачӀунеб бихьани, рехун гӀиги тун, лъутун уна гьев. БацӀ рехъалъ речӀчӀула, гӀи рахъ-рахъалде лъутизабула, мухьдахъ ккурав вехьасе гьезул ургъел гьечӀелъул. 14Дун вуго лъикӀав вехь. Дида дирго чахъабиги лъала, дирго чахъабазда дунги лъала. 15Гьелдаго релълъун, дир Инсуда дунги лъала, дида Эменги лъала. Дица дирго рухӀги кьела чахъабазе гӀоло. 16Гьеб рехъалъ гьечӀел цоги чахъабиги руго дир. Гьелги рачине ккола дица дирго рехъалъе. Гьелги гӀенеккизе руго дир гьаркьихъ. Гьебмехалъ букӀина цого рехъен ва цохӀо вехьги вукӀина. 17ЦӀидасан нахъе щвезелъун дица дирго рухӀ кьолеб бугелъулин Инсуе дун вокьулев. 18Лъицаниги тӀамулев гьечӀо дун дирго рухӀ кьезе. Дицаго кьолеб буго дица гьеб. Дир ихтияр буго рухӀ кьезеги, кьуни – гьеб нахъе босизеги буго дир ихтияр. Гьедин амру гьабуна дие Инсуца.
19Гьеб рагӀидал, ягьудиязул нахъеги дагӀба-рагӀи ккана. 20ГӀемерисез абулеб букӀана жундуз бетӀер сверизабун бугин гьесул, гьесухъ гӀенеккиго щайин нужеейилан. 21Цогидаз абулеб букӀана жундуз ккурав чи гӀадин кӀалъалев гьечӀин. Жундузда кӀолебищин бецал беразда канлъи бихьизабизе.
Халкъалъ ГӀисадаса инкар гьабулеб буго
22ТӀаде щвана Иерусалималда ЦӀилъиялъул байрам#10:22 ЦӀилъиялъул байрам – мажусияз кверде босун ва хъублъизабун букӀараб Иерусалималъул Мукъадасаб Рукъ цӀидасан баялъул байрам (нилъер эраялде щвелалде 164 сон). тӀобитӀулеб къо. Хасало заман букӀана гьеб. 23Мукъадасаб Рокъове вачӀун, Сулайманил рагъида дове-гьаниве хьвадулев вукӀана ГӀиса. 24ТӀаде гурун рачӀун, ягьудияз гьесда абуна:
– КидалъагӀан дуца ниж щакдаризе тӀамилел? Мун МасихӀ ватани, рагьун абе нижеда!
25ГӀисаца абуна:
– Дица абунагури нужеда, амма нуж божичӀо. Дир Инсуца тӀамун, дица гьарулел ругел ишаз нугӀлъи гьабулеб бугогури дие. 26Дир рехъадул чахъаби гурелъул, божулел гьечӀо нуж. 27Дир чахъабазда дир гьаракь рагӀула, дида гьелги лъала ва гьел дида хадурги рачӀуна. 28Дица гьезие абадияб гӀумруги кьола. Гьел абадул абадиялъго хвезе гьечӀо ва лъиданиги кӀвеларо гьел дида кодоса рахъизе. 29Дихъе гьел кьурав дир Эмен вуго бищунго хӀалкӀолъи кӀудияв БетӀергьан. Лъиданиги кӀвеларо гьел дир Инсуда кодоса рахъизе. 30Дир Эменги дунги – цого руго.
31Гьебмехалъ ягьудияз ГӀисада речӀчӀизе нахъеги ганчӀал кодоре росана. 32ГӀисаца гьезда абуна:
– Дир Инсул амруялдалъун гӀемерал лъикӀал ишал гьаруна дица нужеда цере. Гьел ишазул кинабаб сабаблъунха нужеца дида ганчӀал речӀчӀизехъин ругел?
33Ягьудияз гьесие жаваб кьуна:
– Дуца гьабураб лъикӀлъиялъухъ гуро нижеца дуда ганчӀал речӀчӀизехъин ругел. Аллагьасде дандечӀарал гӀасиял-пасикъал рагӀабазухъ речӀчӀулел руго. Инсан вугониги, дуцаго мунго Аллагьлъун рикӀкӀунев вуго.
34ГӀисаца гьезда абуна:
– Нужер къануналда хъван гьечӀищ гьадинаб калима: «Дица абуна нуж аллагьзаби ругилан». 35-36ТӀухьдузда хъван бугеб хисизабизе бегьуларо. Бичасул калам рещтӀаразда БетӀергьанасцин аллагьзабийилан абун буго. ВацӀцӀадав илчилъун гьавун, гьес дуниялалде витӀарав Дун Аллагьасул Вас вугилан абурал дир рагӀаби Аллагьасда дандечӀарал ругин абизе кин нужеда кӀолеб? 37Дир Инсуца гьабулеб иш дицаги гьабулеб гьечӀеб батани, божуге нуж дида. 38Дир Инсуца гьабулеб иш дицаги гьабулеб бугелъул, дида божичӀони, дир ишаздагӀаги божа. Гьебмехалъ лъала ва бичӀчӀила дилъ дирго Эмен вукӀин ва дирго Инсулъ дун вукӀин.
39ГӀиса кквезейилан лъугьана нахъеги ягьудиял, амма гьезда кодоса ворчӀана гьев. 40ГӀиса нахъеги Иорданалъул добцояб рахъалде, ЯхӀяца гӀадамал лъадалъ ччун рахъулел рукӀараб бакӀалде, ана ва гьенив чӀана. 41Гьениреги гӀемерал гӀадамал рачӀана ГӀисада хадур. Гьез абулеб букӀана:
– ЯхӀяца цониги мугӀжизат бихьизабичӀо, амма гьав Чиясул хӀакъалъулъ гьес абураб щибаб рагӀи битӀараб букӀун буго.
42Гьенире рачӀаразул гӀемерисез ГӀисаде иман лъуна.
Currently Selected:
Иоанн 10: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
