Иоанн 9
9
9 бетӀер
ГӀисаца бецав чиясда канлъи бихьизабула
1Гьениса унаго ГӀисада ватана эбелалъ гьавуралдасаго бецав цо чи. 2ГӀисада муридаз гьикъана, гьев чиясул мунагь букӀунищ яги гьесул эбел-инсул мунагь букӀунищ эбелалъул ургьивго гьев бецав вугев. 3ГӀисаца абуна:
– Я гьев чиясул, яги гьесул эбел-инсул мунагь букӀун гуро гьев бецлъарав, Аллагьасул къудрат гьесдалъун загьирлъизе бецлъана гьев. 4Дун витӀарав Аллагьас тӀадкъараб иш, бакъ цебе букӀаго, тӀубазе ккола нилъеца. ТӀаде щолеб буго лъиданиги щибниги гьабизе кӀолареб сордо. 5Гьаб дуниялалда дун вугебгӀан заманаялъ гьаб дуниялалъе Нур ккола дун.
6Гьединги абун, ГӀисаца ракьалде туна, хӀацӀуца хӀурги буцун, гьеб бахана бецасул беразда. 7Цинги ГӀисаца гьесда абуна:
– ШилоахӀ («Чапар» абураб магӀна ккола гьелъул) хӀавузалъухъеги ун, гьумер чуре дурго, – ян.
Гьениб гьумер чурарабго беразда канлъиги бихьун, тӀадвуссун вачӀана гьев чи. 8Гьесул мадугьалзабазги къватӀахъ гьарделев гьев вихьаразги цоцазда гьикъулеб букӀана дова садакъа гьарулев вукӀарав бецав чи гурищ гьавилан. 9Уйилан абулеб букӀана цо-цояз, цогидаз абуна дов гурин, досда релълъарав чи вугилан. Жив вугин гьевилан абуна гьес.
10– Кинха дуда канлъи бихьараб? – ан гьикъана гьез гьесда.
11Гьес жаваб кьуна:
– Цо ГӀиса абулев чияс жиндирго хӀацӀуца буцун хӀур бахана дир беразда. Цинги гьес дун ШилоахӀ хӀавузалъухъе гьумер чуризе витӀана. Гьениб гьумер чурарабго, дир беразда канлъиги бихьана.
12Гьев чи кив вугевилан гьикъидал, жинда лъаларилан абуна гьес.
«Дур бецал беразда канлъи кин бихьараб?»
13Бецав вукӀун канлъи бихьарав гьев чи фарисеязухъе вачана гьез. 14(ХӀацӀуца хӀурги буцун, гьесул беразда ГӀисаца канлъи бихьизабураб къо шамат къо букӀана.) 15Фарисеязги гьикъана гьесда дур бецал беразда канлъи кин бихьарабилан. Гьес гьезда бицана хӀацӀуца буцун хӀур баханин дос жиндир беразда ва гьумер чурараб мехалъ канлъиги бихьанилан. 16Цо-цо фарисеял гаргадизе лъугьана шамат къоялъул къанун цӀунуларев гьев Аллагьасдасан вачӀарав чи гурилан. Цогидаз абуна мунагь-хӀакъ тӀад бугев чиясда гьединаб мугӀжизат бихьизабизе кин кӀолебилан. Гьединаб дагӀба-къец ккедал, 17дов бецав вукӀун канлъи бихьарав чиясда гьикъана гьез нахъеги:
– Дур бецал беразда канлъи бихьизабурав чиясул хӀакъалъулъ щиб дуца абилеб?
Авараг вугин довилан кьуна гьес жаваб.
18Ягьудиязе бокьун букӀинчӀо бецав вукӀун гьев чиясда канлъи бихьанилан абураб жоялда божизе. Хадув чи витӀун гьесул эбелги эменги ахӀана гьенире. 19Цинги гьезда гьикъана:
– Эбелалъул ургьисаго бецав вукӀанилан нужеца бицунев гьав чи нужер васищ? Гьасул беразда канлъи кин бихьарабали лъалебищ нужеда?
20Эбелалъги инсуцаги абуна нижеда лъала гьев чи нижер вас вугевлъи ва эбелалъул ургьисаго бецав вукӀаравлъиги. 21Амма гьесда гьанже канлъи щай бихьулеб бугебалиги ва лъица гьев сахлъизавуравалиги нижеда лъаларо. Гьесда жиндаго гьикъе. Балугъав чи вуго, жинцаго бицине биччанте.
(22Ягьудиязул чӀухӀби-хӀакимзабазукьа хӀинкъун абуна гьаз гьедин: гьез лъазабун букӀиндалха, ГӀисал рахъалъ МасихӀ вугин гьевилан абурав чи синагогаялъуве виччазе гьечӀилан. 23Гьединлъидалин гьаз абураб жидер вас балугъав чи вугин, гьесда жиндаго гьикъейилан.)
24Ягьудияз нахъеги аскӀове ахӀун, гьесда абуна:
– Аллагьасда цебе гьереси бицунге! Нижеда лъарабин мун сахлъизавурав чи мунагьазул цӀурав чи вугевлъи.
25Гьес абуна:
– Дида лъаларо мунагьазул цӀурав чи вугевищ гьев яги гьечӀевищали. Дида лъала цо жо: дун бецав вукӀаравлъи ва гьанже дида канлъи бихьулеб бугеблъиги.
26Нахъеги гьикъана гьесда:
– Щиб дос дуе гьабураб? Кин дос дур беразда канлъи бихьизабураб?
27Гьес жаваб кьуна:
– Дица бицунеб мехалъ гӀенеккунищ нуж рукӀинчӀел? Цоги нухалъ гьелъухъ гӀенеккун щай нужее? Яги досул муридаллъун лъугьинейищ нужееги бокьун бугеб?
28– Нижни Мусал муридал руго. Мун вуго досул муридлъун лъугьун! – ан тӀаделъана гьесде фарисеял. 29– Нижеда лъала Мусада Аллагь кӀалъаравлъи, довин абуни, киса-щивалицин лъаларев чи вуго.
30Бецав вукӀун канлъи бихьарас абуна гьезда:
– ХӀикматаб жо буго нужеда дов киса-щивали лъалеб гьечӀолъи. Амма дос дир беразда канлъи бихьизабуна. 31Нилъеда лъала мунагь-хӀакъалъул агьлуялъухъ Аллагь гӀенеккуларевлъи. Аллагь гӀенеккула жиндие мутӀигӀав, жиндир амру тӀубазабулев чиясухъ. 32Киданиги рагӀун букӀинчӀо эбелалъул ургьисаго бецав чиясда лъицаниги канлъи бихьизабун бугилан. 33Дов чи Аллагьасдасан вачӀарав вукӀинчӀевани, щибго гьабун бажарилароан досухъа.
34Эбелалъ гьавуралдасаго мунагьазул цӀурав дуцагийищ нижее гӀакълу кьолеб бугебилан, ццин бахъун, къватӀиве гъуна гьез гьев.
РухӀияб бецлъи
35Гьез къватӀиве гъун вугилан рагӀидал, ГӀисаца гьев чи валагьана ва ГӀадамил Лъимада мун божулищилан гьикъана. 36Гьес жаваб кьуна:
– Я, БетӀерчӀахъад, гьесда божизе ккани, цин гьев лъазе ккеларищ?
37ГӀисаца гьесда абуна:
– Гьев дуда цевеги вихьана ва гьабсагӀат дуда кӀалъалевги вуго.
38– Я, БетӀерчӀахъад, дуда божула! – ян абуна гьев чияс ва гьебсагӀат ГӀисада цеве суждаялда чӀана.
39ГӀисаца абуна:
– Гьаб дуниялалде дун суд гьабизе вачӀун вуго: бецазда канлъи бихьизе, канлъи бихьулелал бецлъизе.
40Гьедин абулеб мехалъ аскӀор рукӀарал цо-цо фарисеяз гьикъана жалги бецалищха ругелан. 41ГӀисаца гьезда абуна:
– Нуж бецал рукӀаралани, нужее мунагь букӀинароан. Канлъи бихьулилан нужеца абулеб бугелъул, мунагь тӀаса инаро нужедаса.
Currently Selected:
Иоанн 9: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
