Иоанн 11

11 бетӀер

Лазарил хвел

1Бетания шагьаралдаса Лазарилан абулев цо чи унтун вукӀана. 2Гьеб Бетаниялда яшав гьабун рукӀана цо Марям абулей гӀаданги гьелъул яц Мартаги. Гьеле гьей Марямицайин ГӀисал хӀатӀазда махӀ гьуинаб нах бахараб ва жиндирго ботӀрол расуца гьел ракъвазарурал. Гьелъул вац вукӀана Лазар. 3Яцаз ГӀисахъе ругьел битӀана: «Я, БетӀерчӀахъад, дуе хирияв чи унтун вуго», – ян. 4Гьеб ругьел бачӀиндал, ГӀисаца абуна:

– Гьеб унтуца Лазар холаро. Гьеб буго Аллагь машгьурлъизе ва Аллагьасул Васас живго гьелдалъун машгьурлъизавизе Лазариде тӀамураб унти.

5Марямги, гьелъул яцги, Лазарги цӀакъ рокьулаан ГӀисае.

6Гьев унтун вугилан рагӀидалги, кӀиго къоялъ гьенивго чӀана ГӀиса. 7Цинги гьес муридазда абуна Ягьудиялде тӀадруссине кколилан. 8Муридаз абуна:

– Я, Рабби, Ягьудиялда дуда ганчӀал речӀчӀизехъин рукӀаралдаса гӀемер заман инчӀогури. Гьениве тӀадвуссине щай дуе бокьун бугеб?

9ГӀисаца абуна:

– Цо къоялъе букӀуна анцӀила кӀиго сагӀат. Къад сапаралде вахъарав чи хӀетӀе тункун гӀодов кколаро, нухда гьесие канлъи букӀунелъул. 10Амма сардилъ сапаралде вахъарав чиясул хӀетӀе тарула, нухда канлъи букӀунарелъул.

11Цоги гьес абуна:

– Нилъер гьудул Лазар кьижун ккун вуго. Гьев вигьинавизе инехъин вуго дун.

12Муридаз абуна:

– Я, БетӀерчӀахъад, кьижун ккарав ватани, мадар лъугьина гьесул.

13ГӀисаца абулеб букӀана Лазар хун вугилан, амма муридазда бичӀчӀана гьадинго кьижун ккун вугилан абулеб бугилан. 14Гьебмехалъ ГӀисаца рагьун бицана гьезда Лазар хванилан.

15– Нужер талихӀ ккана дун дова вукӀинчӀолъи, гьанже нужее рес ккела дида божизе. Рилълъа доре.

16«КӀилъилав» абун тӀокӀцӀар бугев Фомаца цогидал муридазда абуна:

– Рилълъа МугӀалимасда цадахъ, гьев хваралъур хвезе!

«Дицайин хваралъуса рахъинарулел, дицайин чӀаголъизарулел!»

17ГӀиса Бетаниялде щведал, Лазар хабалъ вукъаралдаса ункъо къо бан батана. 18Иерусалималдаса Бетаниялде лъабго километр гурони букӀинчӀо. 19Мартахъеги Марямихъеги вацасул зигараялъ Иерусалималдаса рачӀарал гӀемерал ягьудиялги рукӀана гьенир. 20ГӀиса вачӀунев вугилан рагӀидал, Марямги магӀирокъойго тун, Марта ана гьесда данде. 21Мартаца ГӀисада абуна:

– Я, БетӀерчӀахъад, мун гьанив вукӀаравани, хвелароан дир вац! 22Амма гьанжеги ракӀчӀун лъала дида дур кинаб букӀаниги гьари-дугӀа Аллагьас нахъчӀвалареблъи.

23Дур вац хваралъуса вахъине вугилан абуна гьелда ГӀисаца.

24Мартаца абуна къиямасеб къоялъ гьев тӀаде вахъуневлъи жиндаги лъалин. 25ГӀисаца гьелда абуна:

– Дицайин хварал рахъинарулел, дицайин чӀаголъизарулел. Дида божарав чи хваравги чӀаголъила. 26Гьаб дуниялалда вугевщинав дида божулев чи абадул абадиялъ хвезе гьечӀо. Гьелда мун божулищ? – ан гьикъана ГӀисаца.

27Гьелъ жаваб кьуна:

– Я, БетӀерчӀахъад, дун божана дуниялалде вачӀине вугев Аллагьасул Вас МасихӀ мун вукӀиналда.

ГӀиса гӀодулев вуго

28Гьединги абун, рокъое ана Марта. Цогидаздаса балъго гьелъ Марямида абуна МугӀалим вачӀун вугин ва гьес мун ахӀулей йигин. 29ГьебсагӀат ГӀисада аскӀое ине гӀедегӀун къватӀие яхъана Марям. 30Росулъеги лъугьинчӀого, Марта жинда данде ячӀараб бакӀалда чӀун вукӀана ГӀиса. 31Марям гӀедегӀун къватӀие яхъун уней йихьидал, зигараялъ рачӀун рукӀарал ягьудиязда ккана вацасухъ гӀодизе хабаде уней ятилин гьейилан. Гьелги ана Марямида хадур рахъун. 32ГӀисада аскӀое щведал, гьесул хӀатӀазда цее кӀалагъоркье речӀчӀун, Марямица гӀодилаго абуна:

– Я, БетӀерчӀахъад, мун гьанив вукӀаравани, хвелароан дир вац!

33ГӀодулей Марямги гьелда цадахъ гӀодулел гӀадамалги рихьун, цӀакъго ракӀбакъван, къварилъахъдана ГӀиса.

34– Кив нужеца гьев вукъарав? – ан гьикъана ГӀисаца.

– Я, БетӀерчӀахъад, вилълъа дудаго бихьизабизе, – ян абуна гьез.

35ГӀиса гӀодана гьебмехалъ. 36ГӀиса гӀодулев вихьидал, гӀадамаз абуна Лазар гьасие вокьулев вукӀун вугеб куц бихьуларищилан. 37Бецасда канлъи бихьизабурав чиясда Лазар хвалдаса ворчӀизавизеги кӀвелаанилан абуна цо-цояз.

Хун ункъо къо барав Лазар чӀаголъизавула ГӀисаца

38Дагьабги ракӀбакъван, ГӀиса Лазарил хабаде ана. Хоб букӀана нохъода жаниб, кӀалтӀа гамачӀги букӀана. 39ГӀисаца абуна гьеб гамачӀ нахъе босейилан. Хварасул яц Мартаца абуна:

– Я, БетӀерчӀахъад, Лазар вукъаралдаса ункъабилеб къо буго, махӀ бахъун батила.

40ГӀисаца гьелда абуна:

– Дица абичӀищ дуда, мун божани, Аллагьасул хӀалкӀолъи бихьилин дудаян.

41ГамачӀ нахъе босана.

Зобалаздеги валагьун, ГӀисаца абуна:

– Я, дир Эмен, дица дуе рецц гьабулеб буго гьари-дугӀа дуда рагӀаралъухъ. 42Дида лъалаан дир гьари-дугӀа дуда кидаго рагӀизе букӀин. Дица гьадин абулеб буго дун дуца витӀаравлъи гьанир дида аскӀор ругезда лъазе.

43Цинги ГӀисаца ахӀана:

– Лазар! КъватӀиве вачӀа! – ян.

44Кверазда ва бохдузда мусралги жемухъего хабалъа къватӀиве лъугьун вачӀана Лазар. КвербацӀцӀалъ бухьун гьумерги букӀана гьесул.

– Гьасдаса мусрал риче, – ян абуна ГӀисаца, – ва рокъове ваче.

ГӀиса чӀвазе хӀукму гьабула

45Марямихъе зигараялъ рачӀун рукӀун ГӀисал гьеб мугӀжизат бихьарал гӀемерал ягьудияз гьесде иман лъуна. 46Амма цо-цояз, фарисеязухъе ун, бицана ГӀисаца гьениб бихьизабураб мугӀжизаталъул хӀакъалъулъ.

47Гьебмехалъ чӀахӀиял кашишзабиги фарисеялги тӀадегӀанаб судалъе данделъана. Гьез абуна:

– Щибдай нилъеца гьабун лъикӀ? Гьадав чияс гӀемерал мугӀжизатал рихьизарулел руго халкъалда. 48Додин виччан тани, кинабго халкъ досда хадуб ина. Цинги Рималъул боги бачӀун, нилъер Мукъадасаб Рукъги щущазабила, халкъги гъурун тӀагӀинабила.

49Гьеб соналъ бищунго кӀудияв кашишлъун вукӀарав Кайафаца абуна:

– Нужеда щибниги лъалеб гьечӀоха. 50Нужеца пикру гьабулеб гьечӀо тӀолабго халкъ хун тӀагӀинабиялдаса халкъалъе гӀоло цо чи хвезавиго лъикӀаб букӀиналъул.

51Кайафал жиндирго гӀакълу хадуб гӀунтӀун абурал рагӀаби рукӀинчӀо гьел. Гьеб соналъ бищунго кӀудияв кашишлъун вукӀиндал, кашпу-карамалъи щунин гьес абураб халкъалъе гӀоло ГӀиса хвезе вугилан. 52ЦохӀо халкъалъе гӀоло гуревха. ТӀолабго дуниялалда щущан ругел Аллагьасул лъимал данде ракӀариялъе гӀоло хвезе вуго ГӀиса.

53ГӀиса чӀвазе хӀукму гьабуна гьеб къоялъ гьез. 54Гьединлъидал гьанже тӀатун хьвадулев вукӀинчӀо гьев Ягьудиялъул ракьалда. Гьениса вахъун, жиндирго муридалги рачун, ГӀиса ана гӀицӀаб авлахъалъул рагӀалда бугеб Эфраим абулеб шагьаралде.

55ЖугьутӀазул Пасха тӀаде щолеб букӀана. Улкаялъул киналго бакӀаздаса гӀемерал гӀадамал Иерусалималде рачӀунел рукӀана Пасха тӀаде щвелалде жалго рацӀцӀалъизариялъул гӀадат тӀубазабизе. 56Гьез ГӀиса валагьулев вукӀана. Мукъадасаб Рокъоре лъугьиндал, гьез цоцазда цӀехолеб букӀана:

– ГӀиса вачӀинадай Пасхаялъул байрамалде? Дидани вачӀинин кколаро. Дуда кин кколеб?

57ЧӀахӀиял кашишзабазги фарисеязги буюрухъ кьун букӀана нагагь ГӀиса вугеб бакӀ лъарав чияс жидеда лъазабеян, жидеца гьев, ккун вачун, жанив тӀамизе вугилан.

Currently Selected:

Иоанн 11: АварАК

Highlight

Copy