Байбихьи 8

1Амма Аллагьасда кӀочон течӀо НухӀги ва НухӀида цадахъ гамида рукӀарал рукъалъул хӀайваналги гӀалхул жанаваралги. Аллагьас ракьалде гьури битӀана ва лъим нахъе къазе байбихьана. 2КӀудияб гъварилъиялъул иццалги къотӀана, зобалазул гордалги къана, цӀадал чвахиги лъугӀана.

3Лъим дагь-дагьккун ракьалдаса нахъе ине байбихьана. Нусиялда кӀикъоялда анцӀго къоялдасан ракьалдаса лъим жеги нахъе унеб букӀана, 4ва анкьабилеб моцӀалъул анцӀила анкьабилеб къоялъ гама Арарат магӀарда тӀад чӀана. 5ЛъагӀалил анцӀабилеб моцӀ щвезегӀан, лъим дагь-дагьккун нахъе унеб букӀана ва анцӀабилеб моцӀрол тӀоцебесеб къоялъ мугӀрузул тӀогьал къватӀире раккана.

6Гьелдаса хадубги кӀикъого къо ана. Гамил гордоги рагьун, 7НухӀица гъеду къватӀибе биччана. Цин ун, цинги тӀад буссун, боржанхъулеб букӀана гьеб, ракь бакъвазегӀан.

8Цинги миккиги биччана НухӀица, ракьалдаса лъим лъугӀун бугищали лъазе. 9Амма миккиялда рещтӀине бакъвараб бакӀ батичӀо ва, тӀолабго ракь жеги лъадалъ тӀерхьун букӀун, гьеб тӀадбуссун бачӀана. КъватӀибе кверги бегьун, тӀадбуссун гамида жанибе бачана НухӀица микки. 10Анкьго къоялдасан гьес микки нахъеги къватӀибе биччана. 11Къасиялдехун тӀадбуссун бачӀана гьеб, кӀалдиб ккун зайтуналъул гъотӀол тӀамахгун, ва НухӀида бичӀчӀана ракьалдаса лъим лъугӀун букӀин. 12Жеги анкьго къоялъги чӀун, нахъеги боржине биччана гьес микки, – гьеб тӀокӀалъ тӀадбуссун бачӀинчӀо.

13НухӀил гӀумруялъул анлънусиялда цоабилеб соналъул тӀоцебесеб моцӀалъул тӀоцебесеб къоялъ ракьалдаса лъим тӀубан нахъе ана ва, НухӀица гама рагьараб мехалъ, гьесда бихьана ракь бакъвалеб букӀин.

14КӀиабилеб моцӀалъул анкьабилеб къоялъ, ракь тӀубанго бакъвараб мехалъ, 15Аллагьас НухӀида абуна:

16«Хъизангун, васалгун, васазул лъудбигун цадахъ гамидаса къватӀиве лъугьа. 17Кинабго рухӀчӀаголъиги къватӀибе баче: хӀанчӀиги, хӀайваналги, ракьалдасан шурулел жалги. Биччанте гьез ракь цӀезабизе, биччанте гьезул тӀинчӀ-къед цӀикӀкӀине ва жалгоги гӀемерлъизе».

18Цинги васалгун, лъадигун ва васазул лъудбигун цадахъ НухӀ гамидаса къватӀиве лъугьана; 19гьездаго хадур жанаварал, ракьалдасан шурулел жал, хӀанчӀи – гьезул киналго тайпаби – цоялда хадур цоял къватӀире рахъана.

20Гьебмехалъ НухӀица БЕТӀЕРГЬАНАСЕ къурбан-бакӀ бана, ва киналго хӀалалал хӀайваназдасанги хӀанчӀаздасанги цо-цо жо тӀубанго бухӀулеб къурбаналъе хъуна. 21Къурбаналъе рухӀарал хӀайваназул ва хӀанчӀазул гьуинаб махӀ чӀвана БЕТӀЕРГЬАНАСДА, ва БЕТӀЕРГЬАНАС Жиндаго абуна:

«ГӀадамал сабаблъун ракьалъе нагӀана кьеларо Дица тӀокӀалъ. ГьитӀинаб мехалдасаго гьезул пикраби квешлъиялде руссарал ругониги, гьаб хӀалалъ кинабго чӀагоябщинаб тӀокӀалъ хвезабиларо Дица.

22Дунял бугебгӀан заманалда гьоркьоса къотӀиларо: рекьиги лъилъиги, цӀоройги хинлъиги, рииги хаселги, къоги сордоги».

Currently Selected:

Байбихьи 8: АварАК

Highlight

Copy