Байбихьи 7

1БЕТӀЕРГЬАНАС НухӀида абуна:

«Дурго хъизан-лъималги рачун, гамида жаниве лъугьа. Дида бихьулеб буго, гьаб гӀелалда гьоркьов Дида цеве ракӀбацӀцӀадав чи цохӀо мун вугеблъи. 2Дуца цадахъ раче хӀалалал хӀайваназул киналго тайпабаздасан анкьго бихьинабги анкьго цӀуябги, квание хӀарамал хӀайваназул киналго тайпабаздасан цо бихьинабги цо цӀуябги 3ва зобалазул хӀанчӀаздасанги анкьго бихьинабги анкьго цӀуябги – гьезул тайпаби ракьалда чӀаго хутӀизе рукӀине.

4Анкьго къоялдасан Дица ракьалде цӀад базабила – кӀикъого сордо-къоялъ гьоркьоб къотӀичӀого базе буго гьеб цӀад. Ва Дицаго ракьалда бижараб хӀухьел цӀалебщинаб жо Дица дунялалдаса тӀагӀинабизе буго».

5Гьедин БЕТӀЕРГЬАНАС амру гьабунщинаб тӀубазабуна НухӀица.

6Ракьалде тӀупан тӀезе байбихьараб мехалъ, НухӀица анлънусго сон бан букӀана. 7Жиндирго васалгун, лъадигун ва васазул лъудбигун цадахъ гамиде вахана гьев, тӀупаналдаса хвасарлъизе. 8РацӀцӀадалги хъубалги хӀайваназул, гьединго хӀанчӀазул ва ракьалда букӀарабщинаб рухӀчӀаголъиялъул, 9бихьинабги цӀуябги кӀи-кӀи рекъон бачӀана НухӀихъе ва гьел киналго гамида жанире лъугьана, Аллагьас амру гьабун букӀараб куцалъ.

10Анкьго къо ана ва ракьалде тӀупан тӀезе лъугьана. 11НухӀил гӀумруялъул анлънусабилеб соналъ, лъагӀалил кӀиабилеб моцӀалъ, гьеб моцӀрол анцӀила анкьабилеб къоялъ, кӀудияб гъварилъиялъул иццал къватӀире кӀанцӀана, зобалазул гордал рагьана 12ва кӀикъого сордо-къоялъ ракьалде тӀупан тӀуна.

13Гьеб къоялъ НухӀги, гьесул васалги – Шемги, Хамги, Яфетги – НухӀил лъадиги, лъабавго васасул лъудбиги гамиде рахана. 14Гьесда цадахъ гьенире рахана жанаваразул ва гӀи-боцӀул щибаб тайпа, ракьалдасан шурулел жалазул щибаб тайпа, киналго хӀанчӀазул ва роржунелщинал жалазул щибаб тайпа. 15-16НухӀиде Аллагьас амру гьабун букӀараб куцалъ, гьел киналго гьесда аскӀоре гамида жанире рачӀана кӀи-кӀиккун, хӀухьел цӀалебщиналъул бихьинабги цӀуябги.

Цинги Аллагьас НухӀида хадуб гамил нуцӀа къана.

17КӀикъого къоялъ гьоркьоса къотӀичӀого ракьалде лъим чвахана. Лъим тӀаде бахиндал, лъадаца гама кодобе босана. 18Лъим эхеде бахунебго бахунеб ва ракь лъадалъе тӀерхьунеб букӀана, гамаги лъедон унеб букӀана. 19Гьедин лъим эхеде бахана, зобалазда гъоркь ругел бищунго рорхатал мугӀрул гъорлъе тӀерхьинегӀан. 20Гьездасаги анцӀила щуго натӀалъ эхеде бахана лъим, мугӀрулги лъадалъе тӀерхьана.

21Гьебмехалда ракьалда букӀарабщинаб рухӀчӀаголъи хвана: хӀанчӀиги, хӀайваналги, ракьалдасан шурулел жалги ва киналго гӀадамалги хвана. 22МагӀарзухъан хӀухьел цӀалебщинаб ракъдаллъиялъул агьлу хвана. 23Ракьалда рукӀаралщинал киналго гӀадамалги, хӀайваналги, цогидал рухӀчӀаголъабиги – кина-щиналго ракьалдаса тӀагӀинаруна. ЧӀаго хутӀана гӀицӀго НухӀги, гьесда цадахъ гамида рукӀаралги.

24Нусиялда кӀикъоялда анцӀго къоялъ ракь лъадалъ гъанкъун букӀана.

Currently Selected:

Байбихьи 7: АварАК

Highlight

Copy