Байбихьи 6

ТӀупан

1Дунялалда гӀадамал гӀемерлъизе лъугьана ва гьезие ясалги гьарулел рукӀана. 2ГӀадамил ясазул берцинлъи бихьун, Аллагьасул васаз#6:2 Аллагьасул васал – гьаб рагӀул батӀи-батӀиял магӀнаби руго. 1. Аллагьас тӀаса рищарал чагӀи (бал. Тархъ. 4:22, 23; Къан. 14:1). Гьел рукӀине бегьула Шетил наслуялъул васал. 2. БетӀергьанасе мутӀигӀал, гӀадатиял гурел, зобалазул жал (Аюб 1:6; 2:1; 38:7; Заб. 28:1; 88:7). 3. Септуагинтаялда гьеб рагӀул магӀна гьабула битӀахъе (Забуралда), ялъуни буссинабула «Малаикзаби» абун (Аюб аварагасул тӀехьалда). гьел рачунел рукӀана, рекӀее йокьа-йокьарайги тӀаса йищун.

3Цинги БЕТӀЕРГЬАНАС абуна:

«Инсанасулъ дир хӀухьел-рухӀ абадиялъго букӀине гьечӀо. Гьев – гӀицӀаб гьанал черх, гьединлъидал гьесул гӀумруги нусиялда къого соналдаса тӀаде ине гьечӀо».

4Гьеб заманалдаги гьелдаса хадубги ракьалда тӀад рукӀана нефилималин абулел, борхатаб лага-черхалъул, залимал гӀадамал: Аллагьасул васал хьвадулел рукӀиндалха гӀадамазул ясазухъе ва гьездасан лъималги гьарулел рукӀиндал. Цебе заманалдаго цӀар рагӀарал гучал бахӀарзал рукӀана гьел.

5Цинги БЕТӀЕРГЬАНАСДА бихьана ракьалда гӀадамазул квешлъи хӀаталдаса ун гӀемерлъун букӀин, гьезул кинабго пикру-къасдги чӀечӀого квешлъиялъе хӀалтӀулеб букӀин. 6Ракьалда инсан вижиялдаса ракӀ бухӀана БЕТӀЕРГЬАНАСУЛ ва, кутакалда рекӀекълъун, 7БЕТӀЕРГЬАНАС абуна:

«Дицаго рижарал киналго гӀадамалги, гьездаго цадахъ хӀайваналги, жанаваралги, хӀанчӀиги ракьалдаса лъугӀизарила Дица. Дир ракӀ бухӀана гьел рижиялдаса».

8ГӀицӀго НухӀидаса разиго вукӀана БЕТӀЕРГЬАН.

9Гьале НухӀил ва гьесул наслуялъул хӀакъалъулъ къиса.

Доб заманалъул гӀадамазда гьоркьов гӀицӀго НухӀ вукӀана Аллагьасе мутӀигӀав, ракӀбацӀцӀадав ва витӀарав чи. 10НухӀил вукӀана лъабго вас: Шем, Хам ва Яфет.

11Аллагьасда цебе дунял тӀубан пасалъараб заман бачӀана – квешлъиялъги зулмуялъги цӀун букӀана ракь. 12Аллагьасда бихьана дунял пасалъун букӀин ва дунялалда бижарабщинабги къосун ккун букӀин.

13Цинги Аллагьас НухӀида абуна:

«Ракьалда бижанщинаб тӀагӀинабизе хӀукму гьабуна Дица, щайгурелъул гьезул квешлъиялъги зулмуялъги цӀезабун буго дунял. Дица гьелги гьездаго цадахъ ракьги тӀагӀинаризе руго.

14Амма дуца дуего гьабе гофер абураб цӀулал гама ва жанисанги къватӀисанги гьелда хъил бахе. 15Гьелъул халалъиялда букӀине ккола лъабнусго натӀ, гӀеблъиялда – кӀикъоялда анцӀго ва борхалъиялда – лъеберго натӀ#6:15 НатӀ – гӀага-шагарго 45 см.. 16Гамил тӀохги гьабе гьелъул цоцада данде бачараб бакӀалъул бегӀерлъи цо натӀица борхалъуледухъ. Хьибилалда нуцӀаги гьабе. Гамида жаниб букӀине биччанте тӀоцебесебги, кӀиабилебги ва лъабабилебги тӀала.

17Дицайин абуни, ракь лъадалъ тӀерхьинабила ва зобалазда гъоркь рухӀ бугебщинаб жоги тӀагӀинабила. Ракьалда бугебщинаб жо хвела.

18Амма дургун дица къотӀи гьабила. Дурго васалгун, лъадигун ва васазул лъудбигун цадахъ мун гамида жаниве лъугьина. 19Дуца цадахъ баче киналго рухӀчӀаголъабазул щибаб тайпаялъул цо бихьинабги цо цӀуябги, дуда цадахъ гьелги чӀаго хутӀизе. 20Щибаб хӀинчӀ-гъедуялъул, щибаб хӀайваналъул ва ракьалдасан шурулелщинал жалазул кӀи-кӀияб лъугьинабе дудаго цадахъ гамида жанибе, гьел чӀаго хутӀизе. 21БатӀи-батӀияб кванил нигӀматалги росе цадахъ, дуеги гьезиеги гӀолеб къадаралда».

22Гьедин Аллагьас амру гьабунщинаб тӀубазабуна НухӀица.

Currently Selected:

Байбихьи 6: АварАК

Highlight

Copy