Байбихьи 22

Аллагьас Ибрагьимил хӀалбихьи

1Цинги Аллагьас Ибрагьимил хӀалбихьана.

«Ибрагьим!» – ин абуна гьес.

«Гьале дун!» – ин данде жаваб гьабуна Ибрагьимица.

2Цинги Аллагьас абуна:

«Гьев цохӀо вугев дурго хирияв вас ИсхӀакъги цадахъ вачун, Мория абулеб ракьалде а. Гьениб Дица бихьизабураб магӀарда тӀубан бухӀулеб къурбаналъе хъве дуца гьев».

3Нахъисеб къоялъ радал цудунго вахъун Ибрагьимица хӀама кьолона. КӀиго рагьтӀателги цадахъ вачана, жиндирго вас ИсхӀакъги вачана ва, къурбан бухӀизе цӀулги бичӀун, Аллагьас жинда абураб бакӀалдехун валагьун нухда вахъана Ибрагьим. 4Нухда вахъун лъабабилеб къоялъ, цеве валагьидал, Ибрагьимида рикӀкӀадасанго гьеб бакӀ бихьана.

5«Гьаб хӀамил тӀалаб гьабун гьанир чӀа нуж, – ин абуна гьес рагьтӀателазда. – Дунги васги Аллагьасе гӀибадаталъе ина ва гьанире нахъ руссина».

6Къурбан бухӀизе хӀадурараб цӀул гьес ИсхӀакъил мугъалда лъуна. Цинги цӀаги нусги босана ва, ИсхӀакъги вачун, гьев цевехун ана.

7«Дада!» – ян ахӀана ИсхӀакъица Ибрагьимиде.

«Щиб, дир вас?» – ин абуна Ибрагьимица.

Васас гьикъана:

«Нилъехъ цӀаги буго, цӀулги буго, къурбаналъе хъвезе кьегӀер кибха бугеб?»

8«Аллагьас бихьизабила, дир вас, Жиндиего къурбаналъе хъвезе кьегӀер киб бугебали!» – ян абуна Ибрагьимица.

Жеги церехун ана гьел кӀиялго.

9Аллагьас жинда абун букӀараб бакӀалде щведал, Ибрагьимица къурбаналъе бакӀ къачӀана ва гьениб цӀул рекъезабуна. Цинги гьес ИсхӀакъ вухьана ва, къурбаналъе къачӀараб бакӀалда цӀулада тӀад гьевги лъун, 10вас хъвезе нус кодобе босана. 11Амма цинтӀаго зобалаздасан БЕТӀЕРГЬАНАСУЛ Малаикас гьесде ахӀана:

«Ибрагьим! Ибрагьим!»

«Гьале дун!» – илан жаваб кьуна гьес.

12«Васасде квер борхуге, – ян абуна малаикас, – щибго гьабуге гьесие! Гьанже Дида лъана мун Аллагьасукьа хӀинкъулев чи вукӀин. ЦохӀо вугев дурго вас Дие кьезе барахщичӀо мун!»

13Цинги цеве валагьидал, Ибрагьимида бихьана гьениб хъархъазулъ лълъурдулги къан хутӀараб куй. АскӀове ун, гьес куй цебе бачана ва васасул бакӀалда тӀубан бухӀулеб къурбаналъе гьеб хъуна.

14Гьеб иш ккараб бакӀалда цӀар «БЕТӀЕРГЬАНАС Кьела»#22:14 ЖугьутӀ мацӀалда, ЙГЬВГЬ-Ире – гьелъул магӀна ккола «БЕТӀЕРГЬАНАС кьела», ялъуни «БЕТӀЕРГЬАНАС бихьизабила». абун лъуна Ибрагьимица.

(Гьелдасан бачӀараб буго: «БЕТӀЕРГЬАНАСУЛ МагӀарда сабаб батила», – ян абиги).

15Зобалаздасан кӀиабизеги БЕТӀЕРГЬАНАСУЛ Малаикас Ибрагьимиде ахӀана.

16Ва Гьес абуна:

«Дуца гьедин гьабуралъухъ, цохӀо вугев вас кьезе мун барахщичӀелъул, Дирго ЦӀаралдалъун гьедулев вуго Дун, 17Дица дуде баракат рещтӀинабила! Дица дуе гӀемерал наслаби кьела – зодихъ цӀвабигӀанги, ралъдал рагӀалда салигӀанги цӀикӀкӀинабила гьезул къадар. Ва дур наслабаз тушбабазул шагьарал кверде росила.

18Мун Дие мутӀигӀлъаралъухъ дунялалъул киналго халкъазе баракат щвела гьездасан».

19Цинги рагьтӀателал тун рукӀараб бакӀалде тӀад вуссана Ибрагьим ва гьелгун цадахъ Беэр-Шеваялде ана. Беэр-Шеваялда яшав гьабун чӀана Ибрагьим.

Нахорил наслаби

20Цо заманалдасан Ибрагьимида лъана жиндир вац Нахорилги рукӀин гьесул лъади Милкаца гьарурал васал: 21ГӀуцги (тӀоцевесев вас), гьесда хадусев Бузги, Кемуэлги (гьев ккола Арамил эмен), 22Кеседги, ХӀазоги, Пилдашги, Идлафги, Бетуэлги.

23Бетуэлие гьаюна яс Ривка.

Гьев микьавго вас гьавуна Милкаца Ибрагьимил вац Нахорие. 24Гьезда тӀадеги, Реума абун цӀар бугей Нахорил гъаравашалъги гьесие гьаруна Тевах, Гахам, Тахаш ва МагӀаха абурал лъимал.

Currently Selected:

Байбихьи 22: АварАК

Highlight

Copy