Байбихьи 23

Сара хвей

1Сараца бана нусиялда къоло анкьго сон. 2Гьей хвана Кирят-АрбагӀалда (Хевроналда), ханааниязул ракьалда. Гьениб Сарахъ магӀу тӀуна Ибрагьимица, гьелъул жаназаялде къулун гӀек-гӀекиялда гӀодана гьев. 3Цинги лъадул жаназаялда аскӀоса вахъун ун, гьев хитиязда кӀалъана:

4«Дун вуго къватӀиб ракьалдаса гочун вачӀарав апараг, нужеда гьоркьоб гӀумру гьабизе рес щварав чи. Дир хварай лъади юкъизе бакӀ кье дие нужер ракьалда».

5Хитияз Ибрагьимие жаваб кьуна:

6«ГӀенекке, бетӀерчӀахъад! Мун вуго къадруяв, Аллагьасе хирияв чи, – ян абуна хитияз. – Нижер хабалазул бищунго лъикӀаб бакӀ тӀаса бище ва гьений юкъе дурго лъади: бокьарав чияс изну кьела дуе жиндирго тухумалъул хабалалъ гьелъие бакӀ гьабизе».

7Гьеб ракьалъул гӀадамазе, ай хитиязе бетӀерги къулун, 8Ибрагьимица абуна:

«Дир хварай лъади гьаний юкъизе нужер изну бугеб батани, дир гьари къабул гьабун, Цохарил вас Эфронида абе, 9гьесул хурул рагӀалда бугеб Махпелаялъул нохъо дие кьейилан. Нужги нугӀзаллъун рукӀаго, дица гьеб бичун босила гӀураб багьаги кьун, хабалазе букӀине».

10Шагьаралъул кавудухъе годекӀанире ракӀарарал хитиязда гьоркьов гӀодов чӀун вукӀана живго Эфронги ва, киназдаго рагӀун, гьес Ибрагьимида абуна:

11«Бичун кьеларо, дир бетӀерчӀахъад. ГӀенекке дихъ, гьеб хурги нохъоги чӀобого кьолеб буго дица дуе. Гьал дир ракьцоязда цебесан дица дуе кьолеб буго гьеб, гьений дурго хварай лъади юкъизе».

12Гьеб ракьалъул гӀадамазе нахъеги бетӀерги къулун, 13Ибрагьимица киназдаго рагӀун Эфронида абуна:

«Гьарула дуда, гьеб хурухъ кколеб гӀарац босе дихъа, цинги дица дир хварай лъади юкъила гьений».

14Гьебмехалъ Эфроница абуна:

15«ГӀенекке, бетӀерчӀахъад! Гьеб хурул багьа буго ункънусго шекел гӀарцул. КӀудияб багьайищ гьеб бугеб дуеги диеги?! Дурго хварай лъади юкъе гьений».

16Эфроница абураб багьаялда рекъана Ибрагьим ва, хитиялги нугӀлъиялъе чӀезарун, гьес бихьизабураб къадаралда, базаргабазда гьоркьоб билълъанхъараб бакӀлъиялъул ункънусго шекел гӀарцул кьуна гьесие. 17Гьедин Мамреялъул бакъбаккул рахъалда Махпелаялда бугеб хурулги, гьелдаго цадахъ нохъодулги ва гьеб хурир ругелщинал гъутӀбузулги 18бетӀергьанлъун вахъана Ибрагьим. Гьелъие нугӀзаллъунги рукӀана шагьаралъул кавудухъ годекӀанире ракӀарарал хитиял.

19Цинги Ибрагьимица жиндирго лъади Сара юкъана ханааниязул ракьалда, Мамреялда (гьанже гьелда Хевронилан абула) гӀагарлъухъ Махпелаялъул хуриб бугеб нохъода. 20Гьеб хурги нохъоги, хабалазе бакӀ хӀисабалда, хитиязухъан Ибрагьимил бетӀергьанлъиялде бачӀана.

Currently Selected:

Байбихьи 23: АварАК

Highlight

Copy