Байбихьи 21
21
Ибрагьимие ИсхӀакъ гьави
1Жинцаго рагӀи кьун букӀараб къагӀидаялъ, БЕТӀЕРГЬАНАС Сараде баракат рещтӀинабуна: Жиндирго рагӀи БЕТӀЕРГЬАНАС тӀубазабуна.
2Сарал ургьибе лъимер лъугьана ва, Аллагьас абураб болжал щварабго, херав Ибрагьимие гьелъ вас гьавуна. 3Сараца гьавурав жиндирго васасда цӀар ИсхӀакъ лъуна Ибрагьимица 4ва, гьавун микьабилеб къоялъ, Аллагьасул амруялда рекъон, гьесие суннат гьабуна. 5ИсхӀакъ гьавураб мехалъ Ибрагьимица нусго сон бан букӀана. 6Гьебмехалда Сараца абуна:
«Релъанхъизе бачӀунеб иш гьабуна дие Аллагьас:
Гьаб хабар рагӀаравщинав чи велъанхъила»#21:6 ИсхӀакъ – гьаб цӀаралъул магӀна буго «гьев велъанхъулев вуго» абураб..
7Жеги гьелъ абуна:
«Керен кьун Сараца лъимер хахизабизе бугилан Ибрагьимида абизе лъидаго ракӀалдецин ккелароан. Амма гьале, хераб къоялъ, гьесие дица вас гьавуна!»
Гьажарги ИсмагӀилги
8Лъимер кӀудияб гӀолеб букӀана. Гьев карандаса тӀураб къоялъ Ибрагьимица кӀудияб сухӀмат гьабуна.
9Ибрагьимидасан мисрияй Гьажарица гьавурав вас жиндир вас ИсхӀакъгун васандулев вихьидал, 10Сараца Ибрагьимида абуна:
«Гьагъай гъараваш, гъолъул васгун цадахъ, нахъе ячахъе гьаниса! Дир вас ИсхӀакъида бащад гьев гъаравашалъул васги дур ирсилавлъун вукӀине гьечӀо!»
11Жиндирго васасул рахъалъ абурал гьел рагӀаби рекӀелъ хӀунсана Ибрагьимида, 12амма Аллагьас гьесда абуна:
«Я васасул, яги гьей гъаравашалъул пикрабаз ракӀ къварилъуге дур. Сараца абураб гьабе – ИсхӀакъидасан лъугьине руго дур наслаби. 13Амма гъаравашалъул васасдасанги Дица тӀубараб халкъ лъугьинабила. Гьевги дур лъимерлъидалха!»
14Нахъисеб къоялъ радал Ибрагьимица Гьажарихъе квенги лъадал цӀураб рахълъенги кьуна. Гьелъул мугъзада гьебги лъун, гьес абуна васги вачун нахъе айилан. Гьажар гьениса ана ва Беэр-Шеваялъул гӀицӀаб авлахъалда нухги къосун хутӀана. 15КватӀичӀого рахълъеналъуб букӀараб лъимги лъугӀана. Гьебмехалъ жиндирго васги цо хъархъида гъоркь тун, 16доегӀан ана гьей, холев вугев гьев вихьизе бокьичӀого. ЧӀорбутӀалъ речӀчӀулеб чӀорил манзилалъ рикӀкӀадеги ун, гӀодой чӀана ва гӀек-гӀекиялда гӀодана гьей. 17Амма Аллагьасда васасул гӀоди рагӀана, ва Аллагьасул малаикас зобалаздасан Гьажариде ахӀана:
«Дуе щиб, Гьажар? Мун хӀинкъуге! Дуца дова тарав вас гӀодулеб гьаракь рагӀана Аллагьасда. 18Яхъун гьанже дурго васасда аскӀое а ва гьев, кверги ккун, тӀаде вахъинаве. КӀудияб халкъ лъугьинабизе буго Дица гьесдасан».
19Ва Аллагьас Гьажарида бихьизабуна гъуй бугеб бакӀ. АскӀое ун, гьелъ рахълъен цӀезабуна ва васасе гьекъезе лъим кьуна.
20Гьелдаса нахъе Аллагьас гьев вас рехун течӀо. Гьев кӀудияв гӀуна, гӀалах-авлахъалда яшав гьабун чӀана, чӀорбутӀалъ чан гьабизе ругьунлъана. 21Паран абулеб салул авлахъалда яшав гьабулеб букӀана гьес, Мисриялдаса лъадиги ячана эбелалъ гьесие.
Беэр-Шеваялда гьабураб къотӀи
22Гьеб заманалда жиндирго бодул цевехъан Пихолгун цадахъ вачӀун, Авимелехица Ибрагьимида абуна:
«Дур кинабго кверрагъариялъулъ Аллагьас дуе кумек гьабулеб буго. 23Гьанже мун гьеде я дие, я дир лъималазе, я дир кинабго наслуялъе хиянат гьабиларилан ва дуе дир рагӀи хвечӀеб гӀадин, дие ва мун къабул гьавураб дир улкаялъе дур рагӀиги хвеларилан!»
24Ибрагьимица абуна:
«Дун дуе гьедила», – ян.
25Амма цин гьес Авимелехие бадибчӀвай гьабуна гьесул чагӀаца жиндир гъуй нахъе бахъанилан.
26«Гьеб лъица гьабурабали дида лъаларо, – ян абуна Авимелехица. – Дуца гьелъул рахъалъ дида щибго бицинчӀогури. ТӀоцебе рагӀулеб буго дида гьеб».
27Цинги Ибрагьимица Авимелехие сайгъат гьаруна гӀиги гӀачиги ва гьесулгун ракълил къотӀи-къайги гьабуна. 28Ибрагьимица анкьго хух батӀа чӀезабун букӀана. 29Ва Авимелехица гьикъана:
«Гьаб анкьабго хух дуца батӀа гьабиялъе гӀилла щиб?» – абун.
30«Гьелги раче дуего, гьаб гъуй дица бухъараб букӀиналда дур разилъи тасдикъ гьабун», – ин жаваб кьуна Ибрагьимица.
31(Гьединлъидал гьез цоцазе гьа бараб къоялдаса нахъе гьеб бакӀалда цӀар лъуна Беэр-Шева абун.)#21:31 Беэр-Шева – «Гьедиялъул гъуй» ялъуни «Анкьгоязул гъуй».
32Гьедин гьеб Беэр-Шеваялда гьез ракълил къотӀи-къай гьабуна, цинги Авимелехги гьесул бодул цевехъан Пихолги рокъоре – пилистимазул ракьалде – тӀадруссун ана.
33Ибрагьимица Беэр-Шеваялда тамарискалъул гъветӀ чӀана ва, Абадияв БЕТӀЕРГЬАН Аллагьасде гьардон, дугӀа гьабуна.
34Гьелдаса хадубги гӀезегӀан заманаялъ яшав гьабуна Ибрагьимица пилистимазул ракьалда.
Currently Selected:
Байбихьи 21: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
