Байбихьи 20

Ибрагьимги Авимелехги

1Ибрагьим гьениса Негевалде ана ва Кадешалдаги Шуралдаги гьоркьоб бугеб Гераралда яшав гьабун чӀана. 2Сара жиндир яц йигилан абуна гьес, гьединлъидал Гераралъул хан Авимелехица Сарада хадур чагӀи ритӀана ва гьей жиндихъего ячана. 3Амма цо сордоялъ макьилъ Аллагьас Авимелехида абуна:

«Гьей гӀадан духъего ячаралъухъ мун хвезе вуго. Гьелъул рос вуго».

4Авимелех жеги гьелда хъван вукӀинчӀо.

«Я дир БетӀергьан! – абун гьардана гьев. – ГӀайибго гьечӀеб халкъги хвезабилебищха Дуца? 5Гьев чияс дида абуна гьей жиндир яц йигилан! Гьелъ жинцагоги абуна гьев жиндир вац вугин! Гьеб ишалъулъ дир намус бацӀцӀадаб буго, дица мунагьги гьабичӀо!»

6«БитӀараб буго, – ян абуна Аллагьас макьилъ. – Дида лъала дур намус бацӀцӀадаб букӀин. Гьединлъидал Дица мун мунагьалдаса цӀунана – Дица виччачӀо мун гьелда хъвазе. 7Амма гьанже дуца гьей гӀадан росасухъе нахъ юссинае. Гьев авараг вугелъул, гьес дугӀа гьабила мун чӀаго хутӀагийилан. Дуда лъайха: гьей росасухъе нахъе кьечӀони, мунги дур тӀолабго гӀагарлъиги хваликьа рорчӀизе гьечӀо!»

8Радал Авимелехица жиндирго чукъа-рахьан данде ахӀана ва ккарабщинаб гьезда бицана. Гьебмехалъ гьел киналго кутакалда хӀинкъана. 9Цинги Ибрагьим жиндихъего ахӀана Авимелехица ва гьесда абуна:

«Дуца нижее гьабураб жо щиб? Дица дуе щиб квешлъи гьабун букӀараб, гьедигӀан кӀудияб мунагьалде дунги дир тӀолабго ханлъиги цӀазе ккани? Гьединаб жо гьабизе бегьуларогури! 10Щай дуца гьедин гьабураб?» – ин гьикъана Авимелехица Ибрагьимида.

11Ибрагьимица жаваб кьуна:

«Дида ракӀалде ккана гьаб ракьалда гӀадамал Аллагьасукьа хӀинкъулел гьечӀин ва лъади сабаблъун дунги чӀвалин. 12Гьелда тӀадеги, хӀакъикъаталдаги гьей дир яц ккола, дир инсуе цогидай чӀужуялъ гьаюрай яс йигелъул; гьей дир лъадилъун лъугьана. 13Ва, инсул рукъги рехун тун, сапаралде вахъайилан Аллагьас дие амру гьабураб мехалъ, дица гьелда абуна: „Дие лъикӀ букӀине бокьун батани, нилъ кире щваниги, дуца абе дун дур вац вугилан“».

14Гьебмехалъ Авимелехица Ибрагьимие гӀиги, гӀачиги, лагъзалги, гъаравашалги сайгъат гьаруна ва Сараги нахъе кьуна. 15Гьес Ибрагьимида абуна:

«Гьаб кинабго дир ракь дуда цебе буго: дуего бокьараб бакӀалда яшав гьабе».

16Сарада гьес абуна:

«Дица дур вацасе кьолеб буго азарго гӀарцул шекел. Дур ракӀ хвезабиялъухъ рецӀалие ва дур тӀолабго гӀагарлъиялда цее мун намус бацӀцӀадай йикӀин лъазе кьолеб буго гьеб».

17Цинги Ибрагьимица Аллагьасде дугӀа гьабуна, ва Аллагьас Авимелехги, гьесул лъадиги, гъаравашалги сахлъизаруна: нахъеги лъимал гьаризе байбихьана гьез. 18(Ибрагьимил лъади Сара сабаблъун Авимелехил къавулъ ругел киналго руччаби лъимал гьарулареллъун лъугьинарун рукӀана БЕТӀЕРГЬАНАС.)

Currently Selected:

Байбихьи 20: АварАК

Highlight

Copy