Байбихьи 16

ИсмагӀилги Гьажарги

1Ибрамил лъади Сарайие лъимер гьабулеб букӀинчӀо. Гьажарилан цӀар бугей Мисриялдаса гъараваш йикӀана гьелъул. 2Сарайица Ибрамида абуна:

«БЕТӀЕРГЬАНАС дие лъимер кьолеб гьечӀо. Гьай дир гъараваш яче – гьелдасагӀаги дие вас щвезе бегьула#16:2 НекӀсияб ГӀагардасеб Бакъбаккул рахъалда букӀараб гӀадаталда рекъон, лъимер гьабуларей чӀужугӀаданалъ жиндирго гъараваш кьолаан жиндирго росасе, ва гьелъ гьабураб лъимер жиндиего бачунаан.».

Ибрам Сарайихъ гӀенеккана. 3Гьелъ жиндирго гъараваш кьуна Ибрамие – Мисриялдаса Гьажар. Ибрам Ханааналда чӀун анцӀго сон араб заман букӀана гьеб. 4Ибрам Гьажарида аскӀов вегана ва гьелъул ургьибе лъимер ккана. Жийго лъимаде йикӀин лъайдал, хважаин хӀакъир гьайизе лъугьана Гьажар.

5«Дун хӀакъир гьайиялъе гӀайибияв мун вуго, – ян абуна Сарайица Ибрамида. – Дица дирго гъараваш дуда аскӀой егизе кьуна, гьанже лъимер ургьибе ккедал, гьелъ дун рикӀкӀуней гьечӀо. Биччанте БЕТӀЕРГЬАНАС хӀукму къотӀизе дудаги дидаги гьоркьоб!»

6Ва Ибрамица абуна:

«Гьей дур гъараваш йиго, дуего бокьараб гьабе гьелда».

Цинги Сарайица Гьажарие гӀумру къварид гьабуна, ахирги гьелда аскӀоса лъутун ине ккана Гьажар. 7ГӀицӀаб авлахъалда, Шуралде унеб нухда, цо иццухъ БЕТӀЕРГЬАНАСУЛ малаикасда ятана Гьажар. 8Гьес гьикъана:

«Я Сарайил гъараваш Гьажар, мун киса ячӀуней йигей ва кие уней йигей?» – абун.

Гьелъ жаваб кьуна:

«Дирго хважаин Сарайида аскӀоса лъутун уней йиго дун», – ин.

9БЕТӀЕРГЬАНАСУЛ Малаикас абуна:

«Дурго хважаиналда аскӀое тӀадюсса ва гьелъие мутӀигӀлъе».

10БЕТӀЕРГЬАНАСУЛ Малаикас жеги абуна:

«Дица дур наслуялъул гӀадамал рикӀкӀун хӀал кӀолареб хӀалалъ гӀемерлъизарила».

11«Дур ургьиб лъимер буго, – ян абуна БЕТӀЕРГЬАНАСУЛ Малаикас. – Дуе вас гьавила. ИсмагӀил лъе дуца гьесда цӀар, дур къварилъи БЕТӀЕРГЬАНАСДА рагӀун бугелъул.

12ГӀалхул хӀама гӀадав вас вукӀина дур,

киналгогун кьалда вукӀина гьев, киналго гьевгунги кьалда рукӀина».

Вацазулгун кьалда ина гьесул гӀумру.

13Жиндехун кӀалъарав БЕТӀЕРГЬАНАСДА Гьажарица лъуна «Эль-Рои#16:13 Эль-Рои – жугьутӀ мацӀалда гьелъул магӀна буго «дун йихьулев Аллагь».» абураб цӀар. Щайгурелъул, гьелъ пикру гьабидал: «Дун йихьулев Аллагь вихьана дида», – ян.

14(Гьединлъидал доб гъуялда цӀар буго Беэр-Лахай-Рои#16:14 Беэр-Лахай-Рои – жугьутӀ мацӀалда гьелъул магӀна буго «дун йихьулев ХӀакъикъиясул гъуй».. Гьеб буго Кадешалдаги Бередалдаги гьоркьоб.)

15Гьажарица Ибрамие вас гьавуна, ва гьев васасда цӀар ИсмагӀил лъуна Ибрамица. 16Гьеб заманалда Ибрамица бан букӀана ункъоялда анлъго сон.

Currently Selected:

Байбихьи 16: АварАК

Highlight

Copy