Байбихьи 15

Аллагьас Ибрамие КъотӀи гьабуна

1Гьелдаса хадуб, илгьам#15:1 Илгьам гьаби (лъугьи) – Аллагьас Живго загьир гьави, цебетӀамиялдалъун инсанасухъе вачӀин. лъугьун, Ибрамида БЕТӀЕРГЬАНАС гьадин абуна:

«Мун хӀинкъуге, Ибрам,

Дун дуе хъалхъанлъун вукӀина,

Дуе щвезе бугеб шапакъат цӀакъ кӀудияб буго».

2Ибрамица абуна:

«Я дир ХӀалкӀолев БЕТӀЕРГЬАН, щиб Дуца дие кьелеб, лъимерго гьечӀев чиясе? Дир ирсилавлъунги гьав Дамаскалдаса Элиезер вукӀина».

3Ибрамица жеги абуна:

«Дуца дие наслу кьечӀелъулха, дир къавулъ гьавурав лагъ вукӀина дир ирсилавлъун!» – абун.

4Амма БЕТӀЕРГЬАНАСДАСАН гьадинаб калима рещтӀана Ибрамие:

«Гьев вукӀине гьечӀо дур ирсилавлъун,

дурго хьоналдасан лъугьина дуе ирсилав!»

5КъватӀивеги вачун, Гьес Ибрамида абуна:

«Зодихъе валагье ва дол цӀваби рикӀкӀе, гьел рикӀкӀине духъа бажарулеб батани!»

Цинги БетӀергьанас абуна:

«ГьедигӀанги гӀемер рукӀина дур наслаби!» – ян.

6Ибрам БЕТӀЕРГЬАНАСДА божана ва гьелдалъун БетӀергьанасда бихьана гьев Жиндие ритӀухъав чи вукӀин.

7Ибрамида БЕТӀЕРГЬАНАС абуна:

«Дун вуго, гьаб ракь дур мулклъун дуе кьезе, халдеязул Уралдаса мун гьаниве вачарав БЕТӀЕРГЬАН».

8«Я дир ХӀалкӀолев Аллагь! – ин абуна Ибрамица. – Гьаб ракь хӀакълъунго дир букӀиналда сундалъун дун божилев?»

9БетӀергьанас абуна:

«Гьанире Дида цере раче лъабго сон бараб гӀакаги, лъабго сон бараб цӀцӀеги, лъабго сон бараб лъабго куйги, гьединго рохьил миккиги миккидул тӀинчӀги».

10Ибрамица гьедин гьабуна. Гьес хӀайванал кӀихӀи къотӀана ва цояб ракьхъен цогидалда дандбитӀун лъуна#15:10 БетӀергьанасги Ибрамицаги КъотӀи гьабулеб буго некӀсияб бакъбаккул рахъалда тӀибитӀараб цебесеб гӀадаталда рекъон: къотӀи-къай щула гьабизелъун, къотӀи гьабулел чагӀи унаан кӀихӀи къотӀараб хӀайваналъул цоцада дандритӀун лъурал ракьхъеназда гьоркьосан. Гьелъул магӀна кколаан, гьеб кӀихӀи къотӀараб хӀайваналъул гӀадинаб къисмат букӀине бугин гьеб къотӀи-къай хвезабурав чиясул абураб (бал. Йирм. 34:18).. Амма хӀанчӀи кӀихӀи къотӀичӀо гьес. 11КватӀичӀого чудкал роржун рачӀана, амма Ибрамица аскӀоре къазе риччалел рукӀинчӀо гьел. 12Бакъ тӀерхьунеб гӀужалда Ибрамиде цӀакъ бакӀаб макьу рещтӀана. Ва гьале циндаго кутакалда хӀинкъараб бецӀлъукье ккана Ибрам.

13Ва БетӀергьанас гьесда абуна:

«Дуда лъан букӀа, ункънусго соналъ дур наслабаз чияр ракьалда лагълъиялдаги зулмуялдаги гъоркь яшав гьабизе буго. 14Амма гьел лагълъиялде ккезабураб халкъалъе дица диван къотӀила – гьебмехалъ дур наслабиги гьениса нахъе ина гӀемераб бечелъигун.

15Мунин абуни, парахатго ина дурго умумузда аскӀове –

гӀемерал соналги ран, херлъиялде вахиндал ина хабалъе.

16Дудасан лъугьарал наслабазул ункъабилеб кьер#15:16 ГӀага-шагарго 400 соналдасан. тӀадбуссина гьанибе, амориязул#15:16 Амориял – гьаб бакӀалда амориялин абулеб буго доб заманалда Ханааналда гӀумру гьабулел рукӀарал тӀолалго халкъазда. мунагьазул гьир жеги букӀине кколеб роцаде бахун гьечӀелъулха».

17Бакъги тӀерхьун дунял бецӀлъарабго, циндаго баккун бачӀана кӀкӀуйдуца бацараб боркьараб къоноги гьелегьараб цӀадулъ босараб сунтурги ва кӀихӀи къотӀарал хӀайваназул ракьхъеназда гьоркьосан ана.

18Гьеб къоялъ БЕТӀЕРГЬАНАС Ибрамилгун КъотӀи гьабуна:

«Дур наслабазе кьолеб буго Дица гьаб ракь, Мисриялъул лъарахъа#15:18 Мисриялъул лъар – гӀемерисел гӀалимзабаз абула гьеб «Аль-Ариш» абулеб, Ханааналъулги Мисриялъулги гӀорхъода бугеб лъар бугилан. бахъараб кӀудияб Ефрат гӀурухъе щвезегӀан: 19– кениязул, кенизиязул, кадмониязул, 20хитиязул, перизиязул, рефаимазул, 21амориязул, ханааниязул, гиргашиязул ва евусиязул тӀолалго ракьал».

Currently Selected:

Байбихьи 15: АварАК

Highlight

Copy