Байбихьи 12
12
Аллагьас Ибрам тӀаса вищи
1БЕТӀЕРГЬАНАС Ибрамида абуна:
«Дурго улкаги, гӀагарлъиги, инсул рукъги рехун тун, Дица бихьизабураб ракьалде а! 2Дица дудасан кӀудияб халкъ лъугьинабила ва дуде баракат рещтӀинабила; Дица дур цӀар кӀодо гьабила ва мун баракатавлъун гьавила!
3Дуе баракат гьарулезда Дицаги баракат лъела!
Дуе нагӀана кьуразе Дицаги нагӀана кьела!
Дудасан баракат щвезе буго дунялалъул киналго халкъазе!»
4БЕТӀЕРГЬАНАСУЛ амруялда рекъон, Ибрам сапаралъ вахъана. ЛутӀги ана гьесда цадахъ. Харраналдаса къватӀиве вахъараб мехалда, Ибрамица бан букӀана лъабкъоялда анцӀила щуго сон. 5Гьес цадахъ рачана жиндирго лъади Сарайги, вацасул вас ЛутӀги, жиндирго боцӀи-панзги, Харраналда ричун росарал лагъзалги; ва гьелгун цадахъ Ибрамица Ханааналде сапар бухьана.
Ахирги гьел щвана Ханааналде, 6Шехем шагьаралда аскӀоб бугеб Морэ абулеб миккил гъотӀохъе. Доб заманалда гьеб ракьалда гӀумру гьабулеб букӀана ханаанияз. 7Гьенив БЕТӀЕРГЬАН загьирлъана Ибрамие ва Гьес абуна:
«Гьаб ракь Дица дур наслабазе кьезе буго!» – ян.
Жиндие загьирлъарав БЕТӀЕРГЬАНАСЕ Ибрамица гьениб къурбан-бакӀ бана. 8Гьелдаса хадув гьев ана Бет-Эл шагьаралъул бакъбаккуда ругел мугӀрузде ва гьениб чӀел гьабуна. Гьесдаса бакътӀерхьудехун букӀана Бет-Эл, бакъбаккудехун – Гай. Ибрамица гьениб цоги къурбан-бакӀ бана ва БЕТӀЕРГЬАНАСЕ гӀибадат гьабуна. 9Гьенисаги ана Ибрам, бакӀ-бакӀалда чӀелги гьабулаго, Негевалдехун валагьун.
Ибрам Мисриялде ин
10Квешаб ракъи тӀибитӀана гьеб ракьалда. ЦӀакъ кутакаб ракъи букӀана гьеб, гьединлъидал Ибрамица Мисриялде сапар бухьана. 11Мисриялде гӀагарлъараб мехалда, гьес Сарайида абуна:
«Дида лъала мун цӀакъ берцинай гӀадан йигеблъи. 12Мисриязда мун йихьила ва дир лъади йикӀин бичӀчӀила, цинги гьез мун чӀаго тела, дун чӀвала! 13Дуца гьезда абе мун дир яц йигилан, гьебмехалда, мун сабаблъун, гьел дидехун лъикӀ рукӀина ва дун чӀаго тела!»
14Ибрам Мисриялде щвана ва Мисриязда бихьана Сарайил берцинлъи. 15ПиргӀавнасул рагьтӀателаздаги йихьана гьей, ва гьез пиргӀавнасе беццана гьелъул берцинлъиги гьайбатлъиги, ва Сарай пиргӀавнасухъе кӀалгӀаялде ячун ана. 16Гьедин, Сарайие гӀоло Ибрамил иш лъикӀ букӀана: гьесие щвана гӀи-боцӀиги, хӀамулги, лагъзалги, гъаравашалги, варанабиги. 17Амма БЕТӀЕРГЬАНАС пиргӀавнасдеги гьесул чагӀаздеги квешал унтаби рещтӀинаруна, Ибрамил лъади гьес жиндихъего ячаралъухъ. 18Гьебмехалъ пиргӀавнас Ибрам тӀаде ахӀана ва гьесда абуна:
«Дуца дие гьабураб щиб? 19Гьай дур лъади йикӀин щай балъго гьабураб? Гьай яц йигилан щай абураб? Гьедин абидал гурищ дица гьай диего лъадилъун йикӀине ячарай!
Гьале дур лъади, яче гьейги, нахъе а!» – ян абуна пиргӀавнас.
20Цинги пиргӀавнас жиндирго чагӀазде амру гьабуна, цадахъ лъадигун, гӀи-боцӀигун ва кинабго бечелъигун, Ибрам гьениса нахъе витӀейилан.
Currently Selected:
Байбихьи 12: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
