Байбихьи 11

Вавилоналъул си

1Доб заманаялда тӀолабго дунялалда букӀана цого мацӀ, цого лугъат. 2Бакъбаккул рахъалдасан гӀадамал рилълъана Шинар улкаялъул гӀатӀиракьалде щвезегӀан ва гьенир чӀана.

3«РачӀа нилъеца хӀарщул кирпичал гьаризе, цӀадулъги режун», – ин абуна гьез цоцазда.

Цинги гьез байбихьана ганчӀил бакӀалда хӀарщул кирпич хӀалтӀизабизе, хӀарщул бакӀалдаги къадае хъил хӀалтӀизабизе.

4«РачӀа нилъеца, зодиб цулеб сиги бугеб шагьарги бан, нилъерго цӀар кӀодо гьабизе, нилъго дунялалда киданиги рикьа-риххун инчӀого рукӀине», – ян абуна гӀадамаз.

5Гьебмехалъ БЕТӀЕРГЬАН гӀодове рещтӀана, гӀадамаз тӀаделъун балеб бугеб шагьарги сиги бихьизе. 6Цинги БЕТӀЕРГЬАНАС абуна:

«Гьале цолъараб халкъги киназулго цого мацӀги. Авалалдаго гьадинаб иш гьабизе байбихьун батани, гьезухъа гьабун бажарулареб жоги щибго букӀине гьечӀо! 7РачӀа, гьезухъе рещтӀун, Нилъеца гьезул мацӀал рикьизаризе, гьел цоцазда ричӀчӀулареб хӀалалъ!»

8Цинги БЕТӀЕРГЬАНАС гьел тӀолабго дунялалда рикьа-риххизаруна, ва шагьар бан лъугӀизабизе кӀвечӀо гьезда. 9(Гьединлъидал гьеб шагьаралда цӀарги буго Вавилон#11:9 Вавилон – жугьутӀ мацӀалда, «Бавел». Гьеб рагӀи релълъуна «балал» абураб рагӀуда ва гьелъул магӀна буго «хис-хисизабизе», яги «бикьизабизе», ялъуни «жубазабизе» абураб. – гьениб БЕТӀЕРГЬАНАС дунялалъул кинабго гӀаламалъул мацӀ хис-хисизабуна ва гӀадамалги, гьениса рикьа-риххизарун, тӀолабго дунялалда тӀиритӀизаруна.)

Шемил наслаби

10Гьале Шемил ва гьесдасан лъугьарал наслабазул хӀакъалъулъ къиса.

ТӀупаналдаса хадуб кӀиго лъагӀел индал, Шемица нусго сон бараб мехалда, гьесие гьавуна вас Арпахшад. 11Арпахшад гьавун хадубги Шемица бана щунусго сон ва гьесие жеги васал-ясалги гьаруна.

12Арпахшадица лъебералда щуго сон бараб мехалда, гьесие гьавуна вас Шелах. 13Шелах гьавун хадубги Арпахшадица бана ункънусиялда лъабго сон ва гьесие жеги васал-ясалги гьаруна.

14Шелахица лъеберго сон бараб мехалда, гьесие гьавуна вас Евер. 15Евер гьавун хадуб Шелахица бана ункънусиялда лъабго сон ва гьесие жеги васал-ясалги гьаруна.

16Еверица лъебералда ункъго сон бараб мехалда, гьесие гьавуна вас Пелег. 17Пелег гьавун хадуб Еверица бана ункънусиялда лъеберго сон ва гьесие жеги васал-ясалги гьаруна.

18Пелегица лъеберго сон бараб мехалда, гьесие гьавуна вас РегӀу. 19РегӀу гьавун хадуб Пелегица бана кӀинусиялда ичӀго сон ва гьесие жеги васал-ясалги гьаруна.

20РегӀуца лъебералда кӀиго сон бараб мехалда, гьесие гьавуна вас Серуг. 21Серуг гьавун хадуб РегӀуца бана кӀинусиялда анкьго сон ва гьесие жеги васал-ясалги гьаруна.

22Серугица лъеберго сон бараб мехалда, гьесие гьавуна вас Нахор. 23Нахор гьавун хадуб Серугица бана кӀинусго сон ва гьесие жеги васал-ясалги гьаруна.

24Нахорица къоло ичӀго сон бараб мехалда, гьесие гьавуна вас ТерахӀ. 25ТерахӀ гьавун хадуб Нахорица бана нусиялда анцӀила ичӀго сон ва гьесие жеги васал-ясалги гьаруна.

26ТерахӀица лъабкъоялда анцӀго сон бараб мехалда, гьесие гьаруна васал Ибрам, Нахор ва Гьаран.

27Гьале ТерахӀил ва гьесдасан лъугьарал наслабазул къиса.

ТерахӀие гьаруна васал Ибрам, Нахор ва Гьаран. Гьаранил вас вукӀана ЛутӀ. 28Гьаран хвана эмен ТерахӀ чӀаго вугеб мехалдаго, жиндирго ватӀаналда – халдеязул Ур абулеб бакӀалда. 29Ибрамицаги Нахорицаги лъудби рачана: Ибрамица ячана Сарай, Нахорица ячана Милка – Гьаранил яс. Гьаран ккола Милкалги Искалги эмен. 30Сарай йикӀана лъимер гьабуларей гӀадан.

31Халдеязул Урги тун, Ханааналъул ракьалдехун нухда вахъана ТерахӀ, цадахъ жиндирго вас Ибрамгун, васасул вас (Гьарунил вас) ЛутӀгун ва Ибрамил лъади жиндирго нус Сарайгун. Харран абулеб бакӀалде щведал, гьенир чӀана гьел. 32Гьенив, кӀинусиялда щуго соналъул гӀумруялде вахараб мехалда, ТерахӀ хвана.

Currently Selected:

Байбихьи 11: АварАК

Highlight

Copy