Къанун 27
27
Гевал магӀарда къурбан-бакӀ
1ГӀизраилалъул кӀудиял чагӀазда цебе Мусаца халкъалда абуна:
«Дица жакъа нужее загьир гьарурал тӀолалго амраби тӀуразаре. 2БЕТӀЕРГЬАН Аллагьас нужее кьолеб бугеб ракь кверде босизелъун Иордан гӀурул доб рахъалде щведал, гьениб кӀиго кӀудияб гамачӀ лъе, гьезда хъахӀаб гачги бахе. 3Гьел ганчӀазда Къануналъул киналго рагӀаби хъвай. Гьедин гьабе Иордан гӀурул доб рахъалде щведал, нужер умумузул БЕТӀЕРГЬАН Аллагьас кьураб рагӀуда рекъон, БЕТӀЕРГЬАН Аллагьас нужее кьолеб бугеб рахьги гьоцӀоги чвахулеб ракьалде нуж лъугьиналда цебе. 4Дица малъараб къагӀидаялъ, хъахӀаб гачги бахун, гьел ганчӀал лъе Гевал магӀарда, Иорданалъул доб цояб рахъалде щведал. 5Гьениб БЕТӀЕРГЬАН Аллагьасе, ганчӀил гьабун, къурбан-бакӀ бай, ганчӀида квартӀаги кӀутӀичӀого. 6БЕТӀЕРГЬАН Аллагьасе къурбан-бакӀ бай бекӀкӀичӀеб ганчӀил ва гьелда тӀад БЕТӀЕРГЬАН Аллагьасе цӀадул къурбанал гьаре. 7Гьединго ракълил къурбаналги хъве ва БЕТӀЕРГЬАН Аллагьасда цебе кванай къурбаназул гьан рохел-аваданлъиялда. 8Гьаб Къануналъул тӀолалго рагӀаби мухӀканго ва якъинго хъвай нужеца гьеб кӀиябго ганчӀида тӀад».
Гевал магӀарда тӀад нагӀана кьей
9Хадуб Мусацаги, левитазги, кашишзабазги тӀолабго ГӀизраилил халкъалда абуна:
«ГӀизраил, кӀвар кьун гӀенекке! Гьанже нуж рахъана БЕТӀЕРГЬАН Аллагьасул халкълъун. 10Нужерго БЕТӀЕРГЬАН Аллагьасухъ гӀин тӀаме ва жакъа дица нужее загьир гьарурал Гьесул амрабиги, къануналги тӀуразаре».
11Гьебго къоялъ Мусаца халкъалде гьадинаб амру гьабуна:
12«Иорданалъул доб цояб рахъалде щвараб мехалъ, Геризим магӀарде тӀадеги рахун, халкъалъе баракаталъул дугӀа гьабизе кколел къавмал гьале: Шимеонилги, Левийилги, Ягьудалги, Иссахарилги, Юсупилги, Буняминилги къавмал. 13Ва Гевал магӀарда тӀадеги рахун нагӀана кьеялъул дугӀа гьабизе кколел къавмал гьале: Рувимилги, Гадилги, Ашерилги, Зевулунилги, Данилги, Нафталилги къавмал.
14Биччанте левитаз, киназдаго рагӀулеб хӀалалъ, ГӀизраилил халкъалда абизе:
15„БекӀкӀун яги биун тӀун гьересиаллагь гьабурав ва балъгого гьеб лъурав чиясе нагӀана буго! Гьеб буго БЕТӀЕРГЬАНАСЕ рихараб жо, устарасул кверзул хӀалтӀи!“
Ва биччанте тӀолабго халкъалъ абизе: „Амин!“
16„Инсул яги эбелалъул адаб рехараб жо гьабурав чиясе нагӀана буго!“
Ва биччанте тӀолабго халкъалъ абизе: „Амин!“
17„Мадугьаласул гӀорхъи жанибе бачарав чиясе нагӀана буго!“
Ва биччанте тӀолабго халкъалъ абизе: „Амин!“
18„Беццав чи нухдаса къосинавурав чиясе нагӀана буго!“
Ва биччанте тӀолабго халкъалъ абизе: „Амин!“
19„Апарагзабазулги, бесдалазулги, къоролзабазулги ихтиярал цӀунуларев чиясе нагӀана буго!“
Ва биччанте тӀолабго халкъалъ абизе: „Амин!“
20„Инсул лъадуда аскӀов вегарав, ва гьелдалъун эмен инжит гьавурав чиясе нагӀана буго!“
Ва биччанте тӀолабго халкъалъ абизе: „Амин!“
21„Кинаб букӀаниги хӀайвангун хъубал гьоркьорлъаби гьарурав чиясе нагӀана буго!“
Ва биччанте тӀолабго халкъалъ абизе: „Амин!“
22„Жиндирго яцалда, ай инсул ялъуни эбелалъул ясалда аскӀов вегарав чиясе нагӀана буго!“
Ва биччанте тӀолабго халкъалъ абизе: „Амин!“
23„Якьадалда аскӀов вегарав чиясе нагӀана буго!“
Ва биччанте тӀолабго халкъалъ абизе: „Амин!“
24„Балъго чи чӀварасе нагӀана буго!“
Ва биччанте тӀолабго халкъалъ абизе: „Амин!“
25„ГӀарцухъ гӀайибго гьечӀев чи чӀварасе нагӀана буго!“
Ва биччанте тӀолабго халкъалъ абизе: „Амин!“
26„Гьаб Къануналъухъ гӀенеккуларев ва гьеб тӀубазабуларев чиясе нагӀана буго!“
Ва биччанте тӀолабго халкъалъ абизе: „Амин!“
Currently Selected:
Къанун 27: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
