Къанун 26

ТӀоцебесеб бачӀин

1КватӀичӀого нуж щвела БЕТӀЕРГЬАН Аллагьас нужее кьолеб бугеб ракьалде ва, гьебги кверщаликье босун, гьениб нужеца гӀумру гьабизе байбихьила. 2Дуе БЕТӀЕРГЬАН Аллагьас кьураб ракьалдаса щвараб бачӀиналъул тӀоцересел нигӀматал, гьагьида жанирги лъун, БЕТӀЕРГЬАН Аллагьас тӀаса бищараб мукъадасаб бакӀалде щвезаре. 3Гьениб кашишасда абе: „БЕТӀЕРГЬАН Аллагь нижер умумузе гьедун вукӀана гьаб ракь нижее кьелилан, гьединлъидал дун вачӀун вуго гьаб ракьалда вугин дунилан абизе“. 4Цинги кашишас духъа гьегь босила ва БЕТӀЕРГЬАН Аллагьасул къурбан-бакӀалда цебе лъела. 5Гьебмехалъ БЕТӀЕРГЬАН Аллагьасда цебе дуца абе: „Дир некӀсияв эмен вукӀана арамеяв. Гьев Мисриялде вахъана дагьал чагӀигун ва гьенив гӀумру гьабун чӀана апараг хӀисабалда. Гьениб гьесдасан лъугьана кӀудияб, къуватаб ва рикӀкӀен гӀемераб халкъ. 6Амма мисрияз квешаб бербалагьи гьабизе лъугьана нижедехун – зулму-хӀал гьабун захӀматго хӀалтӀизарулел рукӀана ниж. 7Гьебмехалъ нижерго умумузул БЕТӀЕРГЬАН Аллагьасде ахӀи бана нижеца ва БЕТӀЕРГЬАНАС гьеб къабул гьабуна; Гьесда бихьана нижер къварилъиги, захӀматаб хӀалтӀиги, зулму-хӀалги. 8Ва БЕТӀЕРГЬАНАС ниж Мисриялдаса нахъе рачана Жиндирго къуватаб квералдалъун, гучал ишаздалъун, кӀуди-кӀудиял мугӀжизатаздалъун ва хӀикмалъабаздалъун. 9Гьес гьаб бакӀалде рачана ниж ва нижее рахьги гьоцӀоги чвахулеб гьаб ракь кьуна. 10Гьале гьанже, БЕТӀЕРГЬАН Аллагь, дица росун рачӀана Дуца кьураб ракьалдаса щвараб тӀоцебесеб бачӀиналъул нигӀматал“. Цинги гьегь БЕТӀЕРГЬАН Аллагьасда цебе лъе ва Гьесие сужда гьабе. 11БЕТӀЕРГЬАН Аллагьас дуеги дур хъизан-лъималазеги кьурабщиналдаса вохун, аваданлъи гьабе. Биччанте дур аваданлъи гӀахьал гьабизе левитазги нужеда гьоркьор чӀел гьабурал батӀиял халкъазул чагӀазги.

12Щибаб лъабабилеб соналъ, ай анцӀил бутӀабазул соналъ, кинабго жоялдаса анцӀил бутӀа батӀа гьабе ва гьеб кье левитазеги, чияр ракьалдаса рачӀарал чагӀазеги, бесдалазеги, къоролзабазеги – нужер шагьаразда гьелги гӀорцӀизегӀан кваназе рукӀине. 13Ва БЕТӀЕРГЬАН Аллагьасда абе: „Дица дирго рокъоса хиралъиялъул бутӀа босана ва, Дур амруялда рекъон, гьеб левитазеги, къватӀиса рачӀарал чагӀазеги, бесдалазеги, къоролзабазеги кьуна. Дида Дур цониги амру кӀочон течӀо ва гьеб тӀубазабичӀого течӀо. 14Хирияб анцӀил бутӀаялда тӀаса босун, чи хвараб бакӀалда дица щибго кваначӀо, хъублъун вукӀаго гьелда тӀаса щибго босичӀо ва хваразул рухӀазе гьелда тӀаса щибго кьечӀо#26:14 Чи хвараб бакӀалда кваначӀо ва хваразул рухӀазе гьелда тӀаса щибго кьечӀо – гьаниб бицунеб буго ВацӀцӀадав Аллагьасе рихарал ва ханааниязул рукӀарал хъубал диниял гӀадатазул. Аллагьас бичӀчӀизабулеб буго, гьал анцӀил бутӀаби хӀакъикъаталда Гьесул кколеллъи, Гьес мискинал пакъирал чагӀазе кьезе хъварал, гьединлъидал Гьесие кутакалда рихарал ханааниязул хъубал гӀадатал рикӀкӀад тезе кколеллъи.. Дица БЕТӀЕРГЬАН Аллагьас малъараб гьабуна – Дур амрабазда рекъон тӀубазабуна кинабго. 15Хирияв Аллагь, зобалаздаса Дурго тӀадегӀанаб Рокъоса валагье нижехъ – Дурго халкъ гӀизраилаздеги ва, Дуца нижер умумузе кьураб рагӀуда рекъон, нижее насиб гьабураб рахьги гьоцӀоги чвахулеб улкаялдеги баракат рещтӀинабе!“

БЕТӀЕРГЬАНАСУЛ амрабазда нахъ рилълъа

16Жакъа БЕТӀЕРГЬАН Аллагьас нуж ахӀулел руго гьал къануналги хӀукмабиги тӀуразариялде – тӀолабго рухӀги жанги кьун ракӀ-ракӀалъго тӀуразаре гьел! 17Жакъа нужеца абуна, БЕТӀЕРГЬАН вугин нужер Аллагь, Гьесул нухда хьвадизе ва Гьесул къануналги, амрабиги, хӀукмабиги тӀуразаризе ругин ва Гьесухъ гӀин тӀамизе бугин. 18Жакъа БЕТӀЕРГЬАНАСГИ абуна, Гьес цебеккунго абун букӀаралда рекъон, нуж Гьесул къимат тӀадегӀанаб ирс кколин ва нужеца Гьесул амраби цӀунизе кколин. 19Гьес абуна Жинца дунялалда рижаралщинал халкъазда гьоркьоса тӀадегӀан гьарилин нуж; нужее реццги, кӀодолъиги, къадруги кьелин ва, Гьес цебеккун абуралда рекъон, нуж рукӀине ругин Гьесул тӀаса бищараб хирияб халкълъун».

Currently Selected:

Къанун 26: АварАК

Highlight

Copy