Къанун 28

МутӀигӀлъаразе баракат

(Лев. 26:1-13; Къан. 7:12-16)

1РакӀ-ракӀалъго БЕТӀЕРГЬАН Аллагьасе мутӀигӀлъани ва жакъа дица нужее загьир гьарурал тӀолалго Гьесул амрабазда рекъон хьвадани, БЕТӀЕРГЬАН Аллагьас дунялалъулго халкъаздаса тӀадегӀан гьаризе руго нуж. 2БЕТӀЕРГЬАН Аллагьасе мутӀигӀлъани, гьале нужее букӀине бугеб баракат:

3шагьаралдаги баракат букӀина нужее, авлахъалдаги баракат букӀина;

4нужер наслу букӀина баракатаб, ах-хуралъул бачӀинги гьарзалъила, нужер гӀи-боцӀиги цӀикӀкӀина – гӀи-боцӀул къинлъиги гӀемерлъила;

5нужер гьегьги, хъабаги, хӀерчги тӀаса чвахила;

6къватӀире унелъулги – нужее баракат, рокъоре тӀадруссунелъулги – баракат.

7Нужеда данде рагъизе тушбаби рахъани, гьел гъуризе БЕТӀЕРГЬАНАС кумек гьабила нужее. Нужеда данде гьел цо нухккун рачӀина, амма анкьго нухккун нужехъа лъутила.

8БЕТӀЕРГЬАН Аллагьас баракат рещтӀинабила нужер гьор-бокьалде ва кинабго гьабулебщиналде. БЕТӀЕРГЬАН Аллагьас кьураб ракьалда Гьес баракаталлъун гьарила нуж.

9БЕТӀЕРГЬАН Аллагьасул амраби цӀунани ва Гьесул нухда хьвадани, Гьес кьураб рагӀуда рекъон, БЕТӀЕРГЬАНАС Жиндирго хирияб халкълъун гьарила нуж. 10Гьебмехалъ дунялалъулго халкъазда бихьила нуж БЕТӀЕРГЬАНАСУЛ халкълъун рукӀин ва гьел нужекьа хӀинкъила. 11Нужее кьелин нужер умумузе гьедун вукӀараб ракьалда БЕТӀЕРГЬАНАС кинабго гьарзаго кьела нужее: лъималги, гӀи-боцӀиги, ах-хуралъул бачӀинги.

12БЕТӀЕРГЬАНАС зобалаздаса Жиндирго бечелъиялъул гъамас рагьила нужее ва ригь-ригьалда цӀадги чвахизабила, гьабулебщиналда баракатги лъела. Нужеца гӀемераб халкъалъе гӀарац къарзалъе кьела, амма нужеца лъихъаго босизе ккеларо. 13Жакъа дица загьир гьарурал БЕТӀЕРГЬАН Аллагьасул амраби мухӀканго тӀуразарулел ругони, БЕТӀЕРГЬАНАС нуж, рачӀлъун гурел, бетӀерлъун гьарила ва кидаго тӀалъуда рукӀина, гъоркье ккеларо. 14Дица нужеда малъарал амрабазул цонигиялдаса доре-гьанире кьуруге, батӀиял аллагьзабазда нахъ рилълъунге ва гьезие хъулухъ гьабуге.

МутӀигӀлъичӀезе нагӀана

(Лев. 26:14-39)

15Амма нуж БЕТӀЕРГЬАН Аллагьасе мутӀигӀлъичӀони ва жакъа дица нужее загьир гьарурал БЕТӀЕРГЬАН Аллагьасул амрабиги къануналги мухӀканго тӀуразарулел гьечӀони, гьал киналго нагӀанаби рачӀине руго нужеда тӀаде:

16шагьаралдаги нужее нагӀана, авлахъалдаги нагӀана;

17нужер гьегьги, хъабаги, хӀерчги нагӀанадукье ккела;

18нужер лъималазеги нагӀана, ах-хуралъул бачӀиналъеги нагӀана ва нужер бачазеги, буртӀазеги, кьагӀазеги нагӀана;

19къватӀире унелъулги – нужее нагӀана, рокъоре тӀадруссунелъулги – нагӀана.

20БЕТӀЕРГЬАНАС нужеда тӀаде биччала нагӀана – талихӀкъосинги, гьабулебщиналъулъ битӀгьечӀолъиги; Дунги рехун тун гьарурал квешлъаби сабаблъун, нуж тӀагӀинарила ва хехаб ахирги ккела нужее. 21БЕТӀЕРГЬАНАС квешал унтаби риччалелго риччалел рукӀина нужеда тӀаде, нужеца кверде босизехъин бугеб ракьалдаса нуж тӀуран тӀагӀинегӀан. 22БЕТӀЕРГЬАНАС нужеда тӀаде биччала гьуърузул унтиги, цӀадул унтиги, бакъул бухӀиги, ракъдаллъиги, бухӀараб гьуриги, ккал чӀвайги. ТӀуран тӀагӀинегӀан гьел балагьаз тезе гьечӀо нуж. 23Зобал нужее пахьуде сверила, ракь маххуде сверила. 24БЕТӀЕРГЬАНАС хӀурул цӀад базабила нужер ракьалде, ва гьеб балебго балеб букӀина нуж тӀуран хвезегӀан.

25БЕТӀЕРГЬАНАС нужер тушбабазе нужеда тӀад бергьенлъи кьела: цо нухккун гьезда данде рагъизе ина нуж, анкьго нухккун гьезухъа лъутила. Гьеб къисмат бихьарабго, тӀолалго халкъалги хӀинкъила. 26Нужер жаназаби зодил хӀанчӀазегун гӀалхул жанаваразе давлалъун рукӀина ва гьел нахъе гъезе чи вукӀинаро. 27БЕТӀЕРГЬАНАС нужеда тӀаде риччала Мисриялъул, сахлъизаризе кӀоларел, рецӀцӀуца кваналел тӀихьалги#28:27 Бал. Тархъ. 9:8-11., ругъналги, хъирисги. 28БетӀерсвериги, беццлъиги, гӀакълу босиги биччала БЕТӀЕРГЬАНАС нужеда тӀаде. 29БецӀаб дунялалда беццал чагӀи гӀадин, къад къоялъги квер кващун нух балагьулел хутӀила нуж. Гьабулебщиналъулъ битӀ гьечӀеллъун лъугьина, къойидаса къойиде нужее гьабулеб зарал ва цӀогь цӀикӀкӀина – нужее кумекалъеги щивго вукӀинаро.

30Васасе яс абила, амма батӀияв вегила гьейгун. Мина бала, амма гьениб жаниб гӀумру гьабиларо. ЦӀолбол ах чӀела, амма гьениса тӀоцебесеб пихъ бакӀаризецин щвеларо. 31Беразда цебе жиндирго оц хъуниги, хӀалбихьизецин гьелъул гьан щвеларо; нужер хӀама бачун ина ва тӀокӀалъ гьеб тӀад буссинабиларо; нужер гӀи-цӀани тушбабазе щвела ва нужее кумекалъе щивго вукӀинаро. 32Нужер васалги ясалги чияр халкъалъухъе кьела, берал сваказегӀан гьел ралагьулел нужги хутӀила – щибго гьабун бажарунгутӀиялъ малъкъосиялде ккела. 33Нуж тӀад хӀалтӀун, нужерго ракьалда гӀезабурабщинаб жо нужеда бихьа-рагӀичӀеб халкъалъ кванала; нужееян абуни, цӀоб тараб зулму-хӀал букӀина гӀумруялъго. 34Ва нужеца хӀехьезе ккарабщиналъ нуж гӀадаллъила. 35Квешал, сахлъизаризе кӀоларел ругънал риччала БЕТӀЕРГЬАНАС нужер накабаздегун бохдузде, ва хӀатӀил килщидаса тӀоноцӀалде щвезегӀан гьел нужер черхалдаго тӀиритӀила.

36БЕТӀЕРГЬАНАС нужги нужедаго тӀад лъурав пачаги нужедаги нужер умумуздаги бихьа-рагӀичӀеб халкъалъул кверщаликье кьела. Ва гьенир нуж лъугьина цӀулалги ганчӀилги гьарурал ясикӀо-аллагьзабазе хъулухъ гьабизе. 37БЕТӀЕРГЬАНАС нуж рахъинарурал ракьазул халкъаз нуж хӀакъир гьарила, гьел нужеда тӀад релъанхъила ва гьенир инжитлъиялда рукӀина.

38Нужеца хурибе гӀемераб хьон хьала, амма бачӀин мукъсанаб гурони щвеларо, щайгурелъул ракъул гарцӀалъ кванан букӀун гьеб. 39Нужеца цӀолбол гъабу чӀела ва гьелъул ах гӀезабила, амма гьениса цӀибил цӀцӀун чагъир гьекъеларо, щайгурелъул нужер цӀолбода хӀапара бан букӀун. 40Киса-кирего улкаялда зайтуналъул гъутӀби рижила, амма зайтуналъул нах нужеда бихьиларо, щайгурелъул зайтун цебего гъенон букӀун. 41Нужее васалги ясалги гьарила, амма гьел нужгун хутӀиларо, щайгурелъул асирлъуде рачун ун рукӀун. 42Нужер тӀолалго гъутӀбиги хурул бачӀинги хӀутӀ-хъумуралъул давлалъун ккела.

43Нужеда гьоркьоб гӀумру гьабулел батӀиял халкъазул гӀадамал къойидаса къойиде тӀадегӀанлъила, нужин абуни, къойидаса къойиде гӀодорегӀанлъила. 44Гьезда цере налъукье ккела нуж, нужерин абуни, гьезие кьезе щибго букӀинаро. Гьел рукӀина бетӀерлъун, нуж – рачӀлъун.

45Гьал киналго балагьал рещтӀина нужеде тӀаде – нужеда хадур лъугьина гьел, нуж теларо гьез. БЕТӀЕРГЬАН Аллагьасухъ гӀенеккичӀолъи ва Гьес тӀад къарал амрабиги къануналги тӀуразаричӀолъи сабаблъун, нуж тӀагӀинарила. 46Гьел балагьал рукӀина нужееги нужер наслабазеги абадиял нугӀзаллъун ва гӀаламатлъун. 47ГӀорцӀараб гӀумру бугеб мехалда нужеца БЕТӀЕРГЬАН Аллагьасе разиго ва аваданго хъулухъ гьабичӀелъул, 48БЕТӀЕРГЬАН Аллагьас нужеда тӀаде риччарал тушбабазда цере хӀалтӀила нуж, ракъиги, къечги, гӀицӀлъиги, мискинлъиги хӀехьолаго. Тушманас нужер горбода маххул рукь бала, гьеб гӀазаб-гӀакъубаялда нужги хвезарила.

49РикӀкӀадаса, дунялалъул рагӀалдаса, нужеда бичӀчӀулареб мацӀалъул халкъ тӀамила БЕТӀЕРГЬАНАС нужеда тӀаде. ЦӀум кинигин нужеда тӀад речӀчӀила гьел. 50Гьеб буго вахӀшияб халкъ: харабазул адаб гьабулареб, лъималазда гурхӀулареб. 51Нужер гӀи-боцӀиги ах-хуралъул бачӀинги гьез кванан лъугӀизабила, нужги хвела. 52Тушманас нужер улкаялъул киналго шагьарал сверун кквела, нужер шагьаразул рорхатал щулиял къадазги нуж цӀуниларо ва, гьезде хьулги лъун нуж рукӀаниги, гьел щущахъ разарила. БЕТӀЕРГЬАНАС нужее кьураб улкаялъул киналго шагьарал сверун кквела.

53Шагьарал сверун ккурав тушманас нужее кьураб гӀазабалъул кутаклъиялъ, БЕТӀЕРГЬАН Аллагьас кьурал нужерго лъималазул – васазулги ясазулги – гьан кваназе буго нужеца. 54Нужер бищун хӀеренавги хӀалимавги гурхӀизе гьечӀо жиндирго вацасдаги, лъадудаги, хутӀарал лъималаздаги 55ва, гьезиеги кьечӀого, жинцаго кваназе буго жиндирго лъимадул гьан. Тушманас нужер шагьаралги сверун ккун, нуж кӀудияб балагьалъукье ккараб мехалъ, нужее тӀокӀалъ кваназе жо букӀине гьечӀелъул. 56Бищун хӀеренайги хӀалимайги чӀужугӀадан, рагӀизабун жинца гӀодоб хӀетӀе чӀоларей, ццидалъ ялагьизе йиго жиндирго росасухъги, васасухъги, ясалъухъги 57ва, балъго лъимерги гьабун, жинцаго кваназе буго гьебги гьелда цадахъ къватӀибе бачӀарабщинаб жоги. Тушманас нужер шагьарал сверун ккураб мехалъ, гьединаб гӀазаб букӀине буго нужее.

58Гьаб тӀехьалда хъвараб Къануналъул щибаб рагӀи мухӀканго тӀубазабичӀони ва БЕТӀЕРГЬАН Аллагьасул тӀадегӀанаб цӀар кӀодо гьабулеб гьечӀони, 59БЕТӀЕРГЬАНАС нужедеги нужер наслабаздеги кидаго рукӀинчӀел вахӀшиял балагьалги, гӀасиял, тӀасаго унарел унтабиги риччазе руго. 60Гьес нужеда тӀаде риччазе руго Мисриялъул киналго вахӀшиял унтаби ва гьел нужеда тӀаса ине гьечӀо. 61БЕТӀЕРГЬАНАС нужеда тӀаде риччазе руго гьаб Къануналда рехсечӀелги унтабигун балагьал – нуж тӀагӀинаричӀого тезе гьечӀо. 62Зодир цӀвабигӀан нуж гӀемерлъун рукӀаниги, нужер дагьал чагӀи гурони хутӀизе гьечӀо, нужерго БЕТӀЕРГЬАН Аллагьасе нуж мутӀигӀлъичӀолъи сабаблъун. 63Нужее лъикӀлъиги гьабулеб, нужер къадарги цӀикӀкӀинабулеб мехалъ Гьев вохун вукӀаравго гӀадин, гьединго нуж гъуриялдасаги щущахъ разариялдасаги вохизе вуго Гьев. Ва нужеца кверде босизехъин бугеб ракьалдаса нуж нахъе хъамизе руго.

64Цинги БЕТӀЕРГЬАНАС нуж, дунялалъул цояб рагӀалдаса цогияб рагӀалде щвезегӀан, халкъазда гьоркьор рикь-рикьизарила. Гьенир батӀиял аллагьзабазе хъулухъ гьабулел рукӀина нуж – я нужеда, я нужер умумузда лъалел рукӀинчӀел цӀулалги ганчӀилги гьарурал аллагьзабазе. 65Гьел халкъазда гьоркьоб нужее парахалъи букӀинаро, нужер хӀатӀазе хӀалхьи щвеларо. Гьениб БЕТӀЕРГЬАНАС нужер гӀакълу ургъалабазул цӀезабила, беразул канлъи свинабила ва рухӀалъул чара къосинабила. 66Нужер гӀумруялъе кидагосеб хӀинкъи букӀина, рекӀелъ парахалъи бугеб мехго щвеларо, къасиги къадги хӀинкъун сородулел рукӀина, чӀаго хутӀилищ хутӀиларищ лъаларого. 67Радал дуца абила: „Вай, хехго сордо щолебани!“ – къаси: „Вай, хехго рогьунебани!“ – ян, бихьа-тарабщиналъ рекӀелъ рещтӀараб хӀинкъи сабаблъун. 68Гумуздаги рекӀун БЕТӀЕРГЬАНАС Мисриялде тӀад руссинарила нуж. Нуж тӀокӀалъ гьенире тӀад руссине гьечӀин абун букӀаниги, БЕТӀЕРГЬАНАС гьенире ритӀила нуж ва гьенир тушбабазе нужго лагълъиялде ричизе лъугьина, амма нуж ричун росулев чиги вукӀинаро».

Currently Selected:

Къанун 28: АварАК

Highlight

Copy