Къанун 25

1КӀиго чиясда гьоркьоб дагӀба-къец ккани, гьел диванханаялде ине ккола ва диванчагӀаз хӀукмуги къотӀила: витӀарав ритӀухъ гьавила, гӀайибиясе тамихӀ гьабила. 2ГӀайибияв кьабизе мустахӀикъав ватани, биччанте диванчияс гьеб бакӀалдаго жиндирго беразда цебе, гӀодовги вегизавун, чан нухалъ кьабизе кколеб батаниги, гьедигӀанаб къадаралда гьесда кьабизе. 3Амма кӀикъогоялдаса цӀикӀкӀун кьабизе бегьуларо, цӀакъго гӀемерги кьабун дурго вац киназдаго цеве инжитлъизавичӀого вукӀине.

4ХӀалтӀулеб бугеб оцол кӀал бухьунге.

5КӀиго вац цадахъ гӀумру гьабун вугони ва васги нахъа течӀого цояв хвани, хварасул лъади чияе росасе ине бегьуларо. Биччанте гьей гьесул вацас ячине ва, вацасул бакӀалда, гьелъулгун рос-лъадулаб гӀумру гьабизе. 6Гьелдасан гьавурав тӀоцевесев вас хварасул васлъун рикӀкӀине ккола, ГӀизраилалда гьесул цӀар тӀагӀинчӀого букӀине.

7Амма гьесие бокьичӀони хварав вацасул йикӀарай лъади ячине, гьей ячӀине ккола шагьаралъул кавабахъе кӀудиял чагӀазухъе ва гьелъ абизе ккола: ‘Дир хварав росасул вацасе бокьун гьечӀо жиндирго вацасул цӀар ГӀизраилалда цӀунизе ва вацасул бакӀалде лъугьине инкар гьабулеб буго’, – ян. 8Гьебмехалъ шагьаралъул кӀудиял чагӀаз гьев ахӀила ва гьевгун кӀалъала. Амма гьес, тӀирун чӀун, гьей ячине инкар гьабуни, 9вацасул къоролай ячӀине те гьесда аскӀое, кӀудиял чагӀазул беразда йихьун; биччанте гьелъ гьесул цо сандала тӀаса бахъизе ва, гьесул гьурмадеги тун, абизе: ‘Гьадин гьабула жиндирго вацасул рукъ гӀуцӀуларев чиясе’, – ян. 10Гьев чиясул наслуялда гӀизраилаз тӀокӀцӀар лъезе буго ‘хьит бахъарасул агьлу’ абун.

11КӀигояв цоцалъ вагъулаго, цоясул лъади ячӀани росасе кумекалъе ва рос вухулесул гӀаврат къан ккуни, 12гьелъул квер къотӀе – гурхӀуге гьелда.

13Дур букӀунге кӀиго батӀияб гира – цо бакӀаб (бичун жо босизе), цо тӀадагьаб (вичаризе). 14Дур рокъоб букӀунге кӀиго батӀияб роцен – цо кӀудияб, цо гьитӀинаб. 15Дур гирабиги дур роценалги рукӀине те дурусал ва ритӀарал, БЕТӀЕРГЬАН Аллагьас дуе кьолеб бугеб ракьалда дурго гӀумру халалъизе. 16ХӀарам гьабулев чи, щив чи гьев ватаниги, БЕТӀЕРГЬАН Аллагьасе кутакалда рихарав вуго.

17Мисриялдаса нуж рачӀунелъул амалекияз гьабурабги кӀочонге. 18Нухда свакан тату хун нуж рукӀаго гьел нужеда тӀаде кӀанцӀана ва, Аллагьасукьаги хӀинкъичӀого, нахъа хутӀаралщинал хӀал дагьлъарал чӀвана гьез. 19Гьединлъидал, нужее кьураб ракьалда БЕТӀЕРГЬАН Аллагьас нуж парахалъизарураб ва киналго тушбабазда тӀад нужее бергьенлъи кьураб мехалъ, амалекиязул цӀар тӀагӀинабе дунялалдаса. Гьедин гьабизе кӀочонге!“

Currently Selected:

Къанун 25: АварАК

Highlight

Copy